ଶିଲଂ,୨୫।୨: ମୋଦିଙ୍କ କବର ଖୋଳିବୁ ବୋଲି କହିଥିବା ବିରୋଧୀ ଦଳ କଂଗ୍ରେସକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଡ଼ା ଜବାବ ଦେଇଛନ୍ତି। କବର ଖୋଳିବା ମନ୍ତବ୍ୟର ଜବାବର ଦେଶବାସୀ ‘ମୋଦି ତେରା କମଳ ଖିଲେଗା’ ବୋଲି କହୁଥିବା ପ୍ରଧାନମନ୍ତ୍ରୀ କହିଛନ୍ତି। ଶୁକ୍ରବାର ମେଘାଳୟ ରାଜଧାନୀ ଶିଲଂରେ ଏକ ନିର୍ବାଚନୀ ସଭାରେ ଉଦ୍ବୋଧନ ଦେଇ ମୋଦି କହିଥିଲେ, ଯେଉଁମାନେ ଅପମାନଜନକ ଭାଷା ବ୍ୟବହାର କରୁଛନ୍ତି ବା ଚିନ୍ତା କରୁଛନ୍ତି, ସେମାନଙ୍କୁ ଦେଶବାସୀ ଉପଯୁକ୍ତ ଜବାବ ଦେବେ। ଯେଉଁମାନଙ୍କୁ ଦେଶ ପ୍ରତ୍ୟାଖ୍ୟାନ କରିଦେଇଛି, ସେମାନଙ୍କୁ ଗ୍ରହଣ କରିବାକୁ ପ୍ରସ୍ତୁତ ନୁହେଁ। ଗୁରୁବାର ଛତିଶଗଡ଼ ଯିବାକୁ ଥିବା ବରିଷ୍ଠ କଂଗ୍ରେସ ନେତା ପଓ୍ବନ ଖେରାଙ୍କୁ ଦିଲ୍ଲୀ ବିମାନବନ୍ଦରରେ ବିମାନରୁ ଓହ୍ଲାଇ ଦିଆଯିବା ପରେ କେତେକ ଦଳୀୟ ନେତା ‘ମୋଦି ତେରି କବର ଖୁଦେଗି’ ବୋଲି ସ୍ଲୋଗାନ ଦେଇଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ପ୍ରଧାନମନ୍ତ୍ରୀଙ୍କ ବାପାଙ୍କ ନାଁକୁ ନେଇ ଖେରା ଅପମାନିତ କରିଥିବାରୁ ଆସାମ ପୋଲିସ ତାଙ୍କୁ ଗିରଫ କରଥିଲା। କିଛି ସମୟ ପରେ ତାଙ୍କୁ ଜାମିନରେ ଛଡ଼ାଯାଇଥିଲା। ତେବେ ଉକ୍ତ ବିବାଦ ସମ୍ପର୍କରେ ମୋଦି କିଛି କହି ନ ଥିଲେ। ମେଘାଳୟରେ ‘ପିପୁଲ୍ସ ଫାଷ୍ଟ’ ସରକାର ଗଠନ ପାଇଁ ପ୍ରଧାନମନ୍ତ୍ରୀ ଆହ୍ବାନ ଦେଇଥିଲେ। ମେଘାଳୟ ଲୋକେ ପରିବାର ପ୍ରଥମ ନୁହେଁ ଜନସାଧାରଣ ପ୍ରଥମ ସରକାର ଚାହାନ୍ତି। ତେଣୁ ଏଠାରେ ପଦ୍ମ ମେଘାଳୟର ଶକ୍ତି, ଶାନ୍ତି ଓ ସ୍ଥିରତାର ପ୍ରତୀକ ପାଲଟିଥିବା ମୋଦି କହିଥିଲେ।
