ଭୁବନେଶ୍ବର, ୭ା୨(ବ୍ୟୁରୋ):ପୂର୍ବତନ ମନ୍ତ୍ରୀ ନବ କିଶୋର ଦାସଙ୍କ ହତ୍ୟାକୁ ନେଇ ରାଜ୍ୟ ରାଜନୀତି ଏପଟ ସେପଟ ହୋଇଯାଇଛି। ମୁଖ୍ୟତଃ ଜଣେ କ୍ୟାବିନେଟ୍ ମନ୍ତ୍ରୀଙ୍କ ସୁରକ୍ଷା ଦାୟିତ୍ୱରେ ଆସିଥିବା ସ୍ଥାନୀୟ ଅଞ୍ଚଳର ଏଏସ୍ଆଇ ଗୁଳିକରି ହତ୍ୟା କରିବା କଥା ଅନେକଙ୍କୁ ଆଶ୍ଚର୍ଯ୍ୟ କରିଛି। ରାଜ୍ୟର ପ୍ରାୟ ସବୁ ନେତା, ମନ୍ତ୍ରୀ ମଧ୍ୟ ସୁରକ୍ଷା ବ୍ୟବସ୍ଥାକୁ ନେଇ ଭୟଭୀତ ଅବସ୍ଥାରେ ଅଛନ୍ତି। ନିଜ ନିଜର ସରକାରୀ ପିଏସ୍ଓଙ୍କୁ ଏବେ ନେତାମାନେ ବେଶି ମାତ୍ରାରେ ଡରିବାକୁ ଲାଗିଲେଣି। ତେବେ ଏହାରି ଭିତରେ ନବଙ୍କ ହତ୍ୟାକୁ ନେଇ ବିରୋଧୀ ପ୍ରତ୍ୟେକ ଦିନ ରାଜ୍ୟ ସରକାରଙ୍କ ବିରୋଧରେ ଅଭିଯୋଗ ଆଣିବାରେ ଲାଗିଛନ୍ତି। ତେବେ ସୋମବାର ଭାଜପା ବିଧାୟକ ସୁବାସ ପାଣିଗ୍ରାହୀ ଏକ ଗୁରୁତର ଅଭିଯୋଗ ଆଣିଥିବା ବେଳେ କଂଗ୍ରେସ ଘଟଣାର ତଦନ୍ତ ପ୍ରକ୍ରିୟାକୁ ନେଇ ପୁଣି ପ୍ରଶ୍ନ ଉଠାଇବା ସଙ୍ଗେ ସଙ୍ଗେ ଏସ୍ଆଇଟି ଦାବି କରିଛି। ଅନ୍ୟପଟେ ଏହି ଘଟଣା ପଛରେ କେଉଁ କାରଣ ରହିଛି ତାକୁ ନେଇ ରାଜ୍ୟବାସୀଙ୍କ ଭିତରେ ନାନାପ୍ରକାର ଚର୍ଚ୍ଚା ହେଉଥିବା ବେଳେ ବିରୋଧୀ କଂଗ୍ରେସ ଏବଂ ଭାଜପା କହିଛନ୍ତି ବ୍ୟବସାୟିକ କାରଣରୁ ରାଜନୈତିକ ଷଡ଼ଯନ୍ତ୍ର କରି ନବଙ୍କୁ ହତ୍ୟା କରାଯାଇଛି।
ଭାଜପା ବିଧାୟକ ସୁବାସ ପାଣିଗ୍ରାହୀ କହିଛନ୍ତି, ୨୦୨୪ ସାଧାରଣ ନିର୍ବାଚନ ବର୍ଷେ ଅଛି। ତେଣୁ ବର୍ଷେ ଭିତରେ ସୁନିଶ୍ଚିତ ଭାବେ ନିର୍ବାଚନ ହେବ। ସେ ଜାଣିବାରେ ନିର୍ବାଚନକୁ ଦୁଇ ମାସ ଥାଇ ମଧ୍ୟ ନିର୍ବାଚନ ହୋଇଛି। ତେଣୁ ଏବେ ନିର୍ବାଚନ ହେବାରେ କୌଣସି ଅସୁବିଧା ନାହିଁ। ବିଜେଡିର ଗୋଟିଏ ଲକ୍ଷ୍ୟ ସେମାନେ କେମିତି ନିର୍ବାଚନ ଜିତିବେ। କିଏ ମରିଗଲା କିଏ ତରିଗଲା ସେଗୁଡ଼ାକ କିଛି ସେମାନେ ଦେଖୁନାହାନ୍ତି। ନବ ଦାସଙ୍କ ବହୁ ପ୍ରକାର ବ୍ୟବସାୟ ଥିଲା। ସେଇଟା ତାଙ୍କର ଗୋଟିଏ ସାମ୍ରାଜ୍ୟ। ତାଙ୍କ ବ୍ୟବସାୟିକ ସାମ୍ରାଜ୍ୟ ଦେଖିଲେ ଜଣାପଡୁଛି ଏଠି ଏକ ବଡ଼ ଷଡ଼ଯନ୍ତ୍ର ଅଛି, ଯେଉଁଥିରେ କି ରାଜନୈତିକ ଷଡ଼ଯନ୍ତ୍ର ମଧ୍ୟ ଅଛି। ଗୋଟିଏ ଗୋଟିଏ ଖଣିର ମାଲିକ ରାଜନୈତିକ ଲୋକ ଅଛନ୍ତି। ସେମାନେ ଖଣିରୁ ଟଙ୍କା ଆଣି ରାଜନୀତିରେ ଲଗାଉଛନ୍ତି। ପଶ୍ଚିମ ଓଡ଼ିଶାରେ ନବ ଜଣେ ଟାଣୁଆ ନେତା ଥିଲେ। ତାଙ୍କ ସାମ୍ରାଜ୍ୟକୁ ଶେଷ କରି ଆଉ ଜଣେ କେହି ସେଠାରେ ପହଞ୍ଚି ସେଠାରୁ ଟଙ୍କା ଆଦାୟ କରି ନବ ଦାସଙ୍କ ଭଳି ନେତା ହେଲା ଭଳି ଜଣାପଡୁଛି। ବିଜେଡିର ଜଣେ ଉପକୂଳ ଅଞ୍ଚଳର ପ୍ରଭାବଶାଳୀ ନେତାଙ୍କର ଏଥିରେ ଷଡ଼ଯନ୍ତ୍ର ଥିବା ସୁବାସ ଅଭିଯୋଗ କରିଛନ୍ତି।
କଂଗଗ୍ରେସ ବିଧାୟକ ସନ୍ତୋଷ ସିଂ ସାଲୁଜା କହିଛନ୍ତି, ସମସ୍ତଙ୍କ ସନ୍ଦେହ ଅଛି ନବ ଦାସଙ୍କ ହତ୍ୟାର ତଦନ୍ତ କାଗଜପତ୍ରରେ ହୋଇଯିବ କିନ୍ତୁ ତାଙ୍କ ପ୍ରକୃତ ହତ୍ୟାକାରୀକୁ ସରକାର ଧରିପାରିବେ ନାହିଁ। କାରଣ ଏଥିରେ ବଡ଼ ବଡ଼ ଲୋକମାନେ ସମ୍ପୃକ୍ତ ଅଛନ୍ତି। ଏଅଥିରେ ସରକାରୀ ଦଳଠାରୁ ଆରମ୍ଭ କରି ବ୍ୟବସାୟିକ ଲିଙ୍କ୍ ନେଇ ସମସ୍ତେ ସନ୍ଦେହ ଘେରରେ ଅଛନ୍ତି। ଏହି ଘଟଣାରେ କ୍ରାଇମବ୍ରାଞ୍ଚ ତଦନ୍ତ କରି ସବୁ ତଥ୍ୟ ପ୍ରମାଣ ହଟାଇବାକୁ ଚେଷ୍ଟା କରାଯିବାର ସନ୍ଦେହ ରହିଛି। ତେଣୁ ରାଜ୍ୟ ସରକାର ଏସ୍ଆଇଟି ତଦନ୍ତ କରାନ୍ତୁ ବୋଲି ସାଲୁଜା ଦାବି କରିଛନ୍ତି।
ବିଜେଡି ବିଧାୟକ ବ୍ୟୋମକେଶ ରାୟ କହିଛନ୍ତି, ନବ ଦାସଙ୍କୁ କେଉଁମାନେ କାହିଁକି ହତ୍ୟା କରିଛନ୍ତି ତାହାର ତଦନ୍ତ କ୍ରାଇମବ୍ରାଞ୍ଚ ଦ୍ୱାରା କରାଯାଉଛି। ତେଣୁ ତଦନ୍ତ ସରିବା ପରେ କିଏ ଏବଂ କେଉଁଥିଲାଗି ନବଙ୍କୁ ହତ୍ୟା କରିଛନ୍ତି ସେସବୁ କଥା ରାଜ୍ୟବାସୀ ଜାଣିବେ ବୋଲି ବ୍ୟୋମକେଶ କହିଛନ୍ତି।
