ନୂଆଦିଲ୍ଲୀ,୨୭।୧: ଆସନ୍ତା ମାସ (ଫେବୃୟାରୀ)ରେ ଦକ୍ଷିଣ ଆଫ୍ରିକାରେ ମହିଳା ଟି -୨୦ ବିଶ୍ୱକପ୍ ଖେଳାଯିବ। ଏହି ଟୁର୍ନାମେଣ୍ଟ ପାଇଁ ଆଇସିସି ମ୍ୟାଚ ରେଫରି ଏବଂ ଅମ୍ପାୟାରଙ୍କ ନାମ ଘୋଷଣା କରିଛି। ବିଶେଷ କଥା ହେଉଛି ଏହି ୧୩ ସଦସ୍ୟ ବିଶିଷ୍ଟ ତାଲିକାରେ କେବଳ ମହିଳା ଅଧିକାରୀଙ୍କୁ ସ୍ଥାନ ଦିଆଯାଇଛି, ଯେଉଁଥିରେ ତିନିଜଣ ଭାରତରୁ ଅଛନ୍ତି। କ୍ରିକେଟ ଇତିହାସରେ ପ୍ରଥମ ଥର ପାଇଁ କୌଣସି ଆଇସିସି ଟୁର୍ନାମେଣ୍ଟରେ କେବଳ ମହିଳା ଅଧିକାରୀ ଅମ୍ପାୟାର କିମ୍ବା ମ୍ୟାଚ ରେଫରି ଭୂମିକାରେ ରହିବେ।
ଆଇସିସି ଜେନେରାଲ ମ୍ୟାନେଜର (କ୍ରିକେଟ) ୱାସିମ ଖାନ କହିଛନ୍ତି, ‘ନିକଟ ଅତୀତରେ ମହିଳା କ୍ରିକେଟ ଦ୍ରୁତ ଗତିରେ ବୃଦ୍ଧି ପାଉଛି। ଏହାର ଏକ ଅଂଶ ଭାବରେ ଆମେ ନିଶ୍ଚିତ କରିବାକୁ ଚେଷ୍ଟା କରୁଛୁ ଯେ ଅଧିକ ମହିଳା ଉଚ୍ଚ ସ୍ତରରେ ପ୍ରଦର୍ଶନ କରିବାର ସୁଯୋଗ ପାଆନ୍ତୁ। ଏହି ଘୋଷଣା ଆମର ଉଦ୍ଦେଶ୍ୟ ଏବଂ ଆମର ଯାତ୍ରା ଆରମ୍ଭର କେବଳ ପ୍ରତିଫଳନ, ଯେଉଁଠାରେ ପୁରୁଷ ଏବଂ ମହିଳାଙ୍କୁ ଖେଳରେ ସମାନ ସୁଯୋଗ ମିଳୁଛି। ଆମର ମହିଳା ମ୍ୟାଚ ଅଧିକାରୀମାନଙ୍କୁ ସମର୍ଥନ କରିବା ଏବଂ ବିଶ୍ୱ ସ୍ତରରେ ସେମାନଙ୍କର ପ୍ରତିଭା ପ୍ରଦର୍ଶନ କରିବାର ସୁଯୋଗ ପ୍ରଦାନ କରିବାକୁ ଆମେ ପ୍ରତିବଦ୍ଧ।’
ମହିଳା ଟି -୨୦ ବିଶ୍ୱକପ ୨୦୨୩ ର ମ୍ୟାଚ୍ ଅଧିକାରୀ:
ମ୍ୟାଚ ରେଫରି: ଶାଣ୍ଡ୍ରେ ଫ୍ରିଜ (ଦକ୍ଷିଣ ଆଫ୍ରିକା), ଜିଏସ ଲକ୍ଷ୍ମୀ (ଭାରତ), ମିଚେଲ ପେରେରା (ଶ୍ରୀଲଙ୍କା)
ଅମ୍ପାୟାର: ସୁ ରେଡଫର୍ନ (ଇଂଲଣ୍ଡ), ଏଲୋଏସ ଶେରିଡାନ (ଅଷ୍ଟ୍ରେଲିଆ), କ୍ଲେର୍ ପୋଲୋସାକ (ଅଷ୍ଟ୍ରେଲିଆ), ଜ୍ୟାକଲିନ ୱିଲିୟମ୍ସ(ୱେଷ୍ଟଇଣ୍ଡିଜ), କିମ କଟନ୍(ନ୍ୟୁଜିଲ୍ୟାଣ୍ଡ), ଲୌରେନ ଆଗେନବାଗ (ଦକ୍ଷିଣ ଆଫ୍ରିକା), ଆନ୍ନା ହାରିସ (ଇଂଲଣ୍ଡ), ବୃନ୍ଦା ରାଠୀ(ଭାରତ), ଏନ୍. ଜନନୀ (ଭାରତ), ନିମାଲି ପେରେରା (ଶ୍ରୀଲଙ୍କା)
