ଜଳନ୍ଧର,୧୯ ।୯: ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂଙ୍କ ଦଳ ସୋମବାର ଭାରତୀୟ ଜନତା ପାର୍ଟି(ଭାଜପା)ରେ ବିଲିନ ହୋଇଯିବ । କ୍ୟାପଟେନ ଦିଲ୍ଲୀସ୍ଥିତ ଭାଜପା ମୁଖ୍ୟ କାର୍ଯ୍ୟାଳୟରେ ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଉପସ୍ଥିତିରେ ଦଳର ପ୍ରାଥମିକ ସଦସ୍ୟତା ଗ୍ରହଣ କରିବେ । କ୍ୟାପଟେନଙ୍କ ସହ ପଞ୍ଜାବର ୬ ଜଣ ପୂର୍ବତନ ବିଧାୟକ, କ୍ୟାପଟେନଙ୍କ ପୁଅ ରଣ ଇନ୍ଦର ସିଂ, ଝିଅ ଜୟ ଇନ୍ଦର କୌର, ନାତି ନିର୍ବାଣ ସିଂ ବି ଭାଜପାରେ ସାମିଲ ହେବେ । ହେଲେ କ୍ୟାପଟେନଙ୍କ ପତ୍ନୀ ଏମ୍ପି ପରନିତ କୌର ଏବେ କଂଗ୍ରେସରେ ରହିବେ ।
ସୂଚନାଯୋଗ୍ୟ, ଗତ ବିଧାନସଭା ନିର୍ବାଚନରେ କ୍ୟାପଟେନ କଂଗ୍ରେସ ଛାଡି ପଞ୍ଜାବ ଲୋକ କଂଗ୍ରେସ ଦଳ ଗଠନ କରି ଭାଜପା ସହ ମେଣ୍ଟ କରିଥିଲେ । ସେ ସମୟରେ ତାଙ୍କ ପୁଅ ରଣ ଇନ୍ଦର ସିଂ ଭାଜପା ସହ ତାଳ ମେଳ କରି ଟିକେଟ ବାଣ୍ଟିବାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ । ହେଲେ ପଞ୍ଜାବରେ ଆମ ଆଦମୀ ପାର୍ଟି(ଏଏପି)ର ଝଡରେ କ୍ୟାପଟେନଙ୍କ ଦଳ ସହ ଭାଜପା ବି ଉଡି ଯାଇଥିଲା ।
ଏବେ ପଞ୍ଜାବରେ ଭାଜପା ଏଏପି ବିରୋଧରେ ଅପରେଶନ ଲୋଟସ ଚଳାଇଥିବା ବେଳେ କ୍ୟାପଟେନଙ୍କ ଭାଜପା ମିଶ୍ରଣ ଗୁରୁତ୍ୱ ରଖେ ବୋଲି କୁହାଯାଉଛି ।
