ଅହମଦାବାଦ, ୩।୯ : ଗୁଜରାଟର ସୁରେନ୍ଦ୍ର ନଗରରେ ସରପଞ୍ଚଙ୍କ ସହ ଆମ ଆଦମୀ ପାର୍ଟିର ଜାତୀୟ ସଂଯୋଜକ ଅରବିନ୍ଦ କେଜରିୱାଲ ସାକ୍ଷାତ୍ କରିଛନ୍ତି। ସେ କହିଛନ୍ତି ଯେ ଆଜି ସମସ୍ତ ସରପଞ୍ଚ ଏବଂ ଭିସି ଏଠାରେ ଅଛନ୍ତି। ଯଦି ସେମାନେ ଏକଜୁଟ ହେବେ ତେବେ ଭାଜପା ଗୋଟିଏ ବି ସିଟ୍ ପାଇବ ନାହିଁ। ସରପଞ୍ଚମାନଙ୍କୁ ଭାଜପା ଦାସ ବୋଲି ଭାବୁଛି। ଭାଜପା ଧମକ ଦେଉଥିବାବେଳେ ଆମ ଆଦମୀ ପାର୍ଟି ଆପଣଙ୍କୁ ସମ୍ମାନ କରୁଛି। ମୁଁ ଭାବୁନାହିଁ ଯେ ଗୋଟିଏ ବି ନିର୍ବାଚନ ପୂର୍ବରୁ ଭାଜପା ଭିସି କିମ୍ବା ସରପଞ୍ଚଙ୍କ ବୈଠକ ଡାକିଛି।
ମୁଁ ଦିଲ୍ଲୀରୁ ଆସିଛି, ମୁଁ ତୁମର ସମର୍ଥନ ଏବଂ ଭୋଟ ଚାହୁଁଛି। ତୁମର ସମସ୍ୟା ହେଉଛି ମୋର ସମସ୍ୟା। ଡିସେମ୍ବରରେ ରାଜ୍ୟରେ ବିଧାନସଭା ନିର୍ବାଚନ ଅନୁଷ୍ଠିତ ହେବ। ଡିସେମ୍ବର ୧୫ ସୁଦ୍ଧା ସରକାର ଗଠନ ହେବ। ଫେବୃଆରୀ ୨୮ ସୁଦ୍ଧା ମୁଁ ପ୍ରତିଶ୍ରୁତି ପୂରଣ କରିବି, କିନ୍ତୁ ସରକାର ଗଠନ କରିବା ତୁମର କାମ। ରାଜ୍ୟରେ ୧୮ ହଜାର ପଞ୍ଚାୟତ ଅଛି। ପ୍ରତ୍ୟେକ ପଞ୍ଚାୟତରେ ଗୋଟିଏ ସ୍କୁଲ ଏବଂ ପ୍ରତ୍ୟେକ ପଞ୍ଚାୟତରେ ଗୋଟିଏ ମୋହଲା କ୍ଲିନିକ ଖୋଲାଯିବ।
ସେ କହିଛନ୍ତି ପଞ୍ଜାବରେ ସରକାର ଗଠନ ହେବା ମାତ୍ରେ ୧୦୦ ଟି ମୋହଲା କ୍ଲିନିକ ଖୋଲାଯାଇଛି। ସିଭିଲ ହସ୍ପିଟାଲଗୁଡିକର ଅବସ୍ଥା ଖରାପ ଅଛି। ସେସବୁରେ ସୁଧାର କରାଯିବ। ଦିଲ୍ଲୀରେ ହସ୍ପିଟାଲଗୁଡ଼ିକ ଭଲ ସ୍ବାସ୍ଥ୍ୟ ସେବା ପ୍ରଦାନ କରୁଛନ୍ତି। ଆମେ ବେକାରମାନଙ୍କୁ ରୋଜଗାର ଦେବୁ। ଏଥିପାଇଁ ୫ ବର୍ଷ ସମୟ ଲାଗିବ। ସେପର୍ଯ୍ୟନ୍ତ ଆମେ ବେକାରୀ ଭତ୍ତା ଦେବୁ। ପେପର ଲିକ ହୋଇଛି। ଏହା ବିରୋଧରେ ଆଇନ ଅଣାଯିବ ଏବଂ ଯେଉଁମାନେ ଏଭଳି କରିଛନ୍ତି ସେମାନଙ୍କୁ ଜେଲ ପଠାଯିବ। ଗୋଟିଏ ବର୍ଷ ମଧ୍ୟରେ ସମସ୍ତ ପଦବୀ ପୂରଣ କରାଯିବ। ପରୀକ୍ଷା ପେପର ଲିକ ହେବ ନାହିଁ ।
ଗୁଜରାଟର ଚାବି ଆପଣଙ୍କ ହାତରେ ଅଛି, ଆପଣ ନିର୍ବାଚନ ଫଳାଫଳକୁ ଓଲଟାଇ ପାରିବେ, ବିପ୍ଳବ ଆଣିପାରିବେ, ଗୁଜରାଟ ପରିବର୍ତ୍ତନ ଚାହୁଁଛି, ଏଥିପାଇଁ ଆପଣଙ୍କ ସହଯୋଗ ଲୋଡା। ସେ କହିଛନ୍ତି ଯେ ଆମ କାର୍ଯ୍ୟରେ ଲୋକମାନେ ଖୁସି ଅଛନ୍ତି। ଆଜି ନିର୍ବାଚନ କରାଗଲେ ଆମେ ୬୫ ରୁ ଅଧିକ ସିଟ ପାଇବୁ। ଲୋକମାନେ ଭାଜପା ଯୋଗୁ ବହୁ ହଇରାଣ ହୋଇଛନ୍ତି। ଗୁଣ୍ଡାଗର୍ଦି ଦ୍ୱାରା ବିଚଳିତ ହୋଇ ଲୋକେ ମୋ ପାଖକୁ ଆସୁଛନ୍ତି। ରାଜ୍ୟରେ ଏକ ବଡ଼ ପରିବର୍ତ୍ତନ ହେବାକୁ ଯାଉଛି ବୋଲି କେଜରିଓ୍ବାଲ ଆଶା ପ୍ରକଟ କରିଛନ୍ତି।
