ଭୁବନେଶ୍ୱର,୨୭ା୮(ବ୍ୟୁରୋ): ରାଜ୍ୟରେ ଖରିଫ୍ ଚାଷ ଜୋରସୋର ଚାଲିଥିବାବେଳେ ସାର ଅଭାବ ଚାଷୀଙ୍କ ମୁଣ୍ଡବ୍ୟଥା ବଢ଼ାଇଛି। ଧାର୍ଯ୍ୟ ସମୟରେ କେନ୍ଦ୍ର ସରକାର ସାର ଯୋଗାଉନାହାନ୍ତି। ରାଜ୍ୟକୁ ମାସିକିଆ କୋଟା ମିଳୁନାହିଁ। ଖରିଫ ଋତୁରେ ଡିଏପି ସାର ୩୧% କମ୍ ମିଳିଛି। ଚାଷୀଙ୍କ ସମସ୍ୟାର ସମାଧାନ କରିବା ଲାଗି କେନ୍ଦ୍ର ସରକାର ଓଡ଼ିଶାର ମାସିକିଆ କୋଟା ଯୋଗାଇଦେବାକୁ ଦାବି କରି ଶୁକ୍ରବାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ରସାୟନ ଓ ସାରମନ୍ତ୍ରୀ ମନସୁଖ ମାଣ୍ଡଭ୍ୟଙ୍କୁ ଚିଠି ଲେଖିଛନ୍ତି।
ନବୀନ ଚିଠିରେ ଉଲ୍ଲେଖ କରିଛନ୍ତି, ଓଡ଼ିଶାର ଚାହିଦା ଅନୁସାରେ ଡିଏପି ଏବଂ ଏମ୍ଓପି ସାର ମିଳୁନାହିଁ। ଜୁଲାଇ ୩୧ ସୁଦ୍ଧା ରାଜ୍ୟକୁ ୪୭,୮୭୭ ମେଟ୍ରିକ୍ ଟନ୍ ଡିଏପି ଏବଂ ୧ ହଜାର ୧୦ ମେଟ୍ରିକ ଟନ୍ ଏମ୍ଓପି ସାର କମ୍ ମିଳିଛି। ରାଜ୍ୟରେ ଖରିଫ ଚାଷ ଚାଲିଥିଲା ବେଳେ ସାର ଅଭାବ ଚାଷୀଙ୍କୁ ଅସୁବିଧାରେ ପକାଇଛି। ଗତବର୍ଷ ୟାସ୍, ଜଓ୍ବାଦ, ଗୁଲାବ ବାତ୍ୟା ପାଇଁ ରାଜ୍ୟର ଚାଷୀ ବିପୁଳ କ୍ଷତି ସହିଛନ୍ତି। ଏଥର ଭଲ ଫସଲ ପାଇଁ ପାଗ ଅନୁକୂଳ ରହିଥିବା ଭାରତୀୟ ପାଣିପାଗ ବିଭାଗ କହିଛି। ଅଗଷ୍ଟ, ସେପ୍ଟେମ୍ବରରେ ଏମ୍ଓପି ଏବଂ ଡିଏପି ସାର ଚାହିଦା ବଢ଼ିଛି। ଏହାର ଅଭାବ ରାଜ୍ୟର ଶସ୍ୟ ଉତ୍ପାଦନ ଉପରେ ପ୍ରତିକୂଳ ପ୍ରଭାବ ପକାଇବ। ଚାଷୀମାନଙ୍କର ସ୍ବାର୍ଥକୁ ଦୃଷ୍ଟିରେ ରଖି ବ୍ୟକ୍ତିଗତ ଭାବେ ହସ୍ତକ୍ଷେପ କରିବାକୁ ନବୀନ ଚିଠିରେ କେନ୍ଦ୍ରମନ୍ତ୍ରୀ ମାଣ୍ଡଭ୍ୟଙ୍କୁ ଅନୁରୋଧ କରିଛନ୍ତି। ଅନ୍ୟପଟେ ଆବଶ୍ୟକତା ଅନୁଯାୟୀ ୟୁରିଆ ସାର ମିଳିଥିବାରୁ ମୁଖ୍ୟମନ୍ତ୍ରୀ କେନ୍ଦ୍ର ସରକାରଙ୍କୁ ଧନ୍ୟବାଦ ଜଣାଇଛନ୍ତି।
