ଭୁବନେଶ୍ୱର,୧୨୭(ବ୍ୟୁରୋ): ବିଜେବି କଲେଜ ଛାତ୍ରୀ ରୁଚିକା ମହାନ୍ତିଙ୍କ ଆତ୍ମହତ୍ୟା ଘଟଣାରେ ତାଙ୍କ ମା’ଙ୍କ ସମେତ ଧାରଣାରେ ବସିଥିବା ଅନ୍ୟମାନଙ୍କୁ ସୋମବାର ପୋଲିସ ଘୋଷାରି ଘୋଷାରି ନେଇ ଗାଡ଼ିରେ ବସାଇବା ସହିତ ଆନ୍ଦୋଳନ ସ୍ଥଳରେ ଥିବା ଟେଣ୍ଟକୁ ଭାଙ୍ଗି ଦେଇଛି। ଏଡି ଘଟଣାକୁ ବିଭିନ୍ନ ମହଲରେ ନିନ୍ଦା କରାଯାଇଛି।
କଂଗ୍ରେସ ନେତା ଶିବାନନ୍ଦ ରାୟ କହିଛନ୍ତି, ନବନିର୍ମାଣ ସଙ୍ଗଠନ ଓ ଅନ୍ୟ ଛାତ୍ରନେତାମାନେ ବିଜେବି କଲେଜ ସାମ୍ନାରେ ନ୍ୟାଯ୍ୟ ଦାବି ପୂରଣ ପାଇଁ ସପ୍ତାଏ ଧରି ଧାରଣା ଓ ଅନଶନ କରିଆସୁଥିଲେ। ସୋମବାର ରୁଚିକାଙ୍କ ଶୁଦ୍ଧିକ୍ରିୟା କରିବା ପାଇଁ ଘୋଷଣା କରାଯାଇଥିଲା। ଏହାକୁ ବରଦାସ୍ତ ନ କରି ସରକାର ପୋଲିସ ଜରିଆରେ ସମସ୍ତଙ୍କୁ ଅଚାନକ ଜୋରଜବରଦସ୍ତ ସକାଳୁ ଉଠାଇନେବା ଏକ ଅଗଣତାନ୍ତ୍ରିକ ପଦକ୍ଷେପ। ଛାତ୍ର ସମାଜର ନ୍ୟାଯ୍ୟ ଦାବି ପାଇଁ ଆନ୍ଦୋଳନକୁ ଦମନ କରିବାକୁ ପୋଲିସର ଏଭଳି ଅତ୍ୟାଚାରକୁ ବରଦାସ୍ତ କରାଯିବ ନାହିଁ। ଭାଜପା ସାଧାରଣ ସମ୍ପାଦକ ଗୋଲକ ମହାପାତ୍ର କହିଛନ୍ତି, ରୁଚିକାଙ୍କ ମା’ଙ୍କୁ ପୋଲିସ ଉଠାଇନେବା ଘଟଣା ଠିକ୍ ନୁହେଁ। ଯିଏ ଆତ୍ମହତ୍ୟା କରିଛି ସିଏ ନିଜେ ୩ ଜଣଙ୍କ ଯୋଗୁ ଏଭଳି ପଦକ୍ଷେପ ନେଇଥିବା କଥା ଉଲ୍ଲେଖ କରିଥିଲା। ତଥାପି ମଧ୍ୟ ସେମାନଙ୍କୁ ପୋଲିସ ଚିହ୍ନଟ ନ କରିପାରିବା ଏବଂ ନିଜ ବିଫଳତା ଲୁଚାଇବା ପାଇଁ ପୋଲିସ ଚେଷ୍ଟା କରିବା ନିନ୍ଦନୀୟ। ହଷ୍ଟେଲ ଓ୍ବାର୍ଡନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବା ଏସବୁ କଥା ଭିନ୍ନ ଦିଗକୁ ଦର୍ଶାଉଛି। ଓଲଟା ପୀଡ଼ିତାଙ୍କ ମା’ଙ୍କୁ ଆନ୍ଦୋଳନ ସ୍ଥଳରୁ ଉଠାଇନେଇ କ’ଣ ପ୍ରମାଣ କରିବା ଲାଗି ପୋଲିସ ଚେଷ୍ଟା କରୁଛି ବୁଝାପଡୁନାହିଁ। ତୁରନ୍ତ ରୁଚିକାଙ୍କ ମା’ଙ୍କୁ ପୋଲିସ ପ୍ରତିବାଦ କରିବାକୁ ସୁଯୋଗ ଦେବା ସହ ଦୋଷୀକୁ ପ୍ରଥମେ ଧରିବା ଦରକାର ବୋଲି ସେ କହିଛନ୍ତି।
