ମୁମ୍ବାଇ,୩।୫: ଆଇପିଏଲ ୨୦୨୨ର ୪୭ତମ ମ୍ୟାଚରେ କୋଲକାତା ନାଇଟ ରାଇଡର୍ସ ରାଜସ୍ଥାନ ରୟାଲ୍ସକୁ ୭ ଉଇକେଟରେ ପରାସ୍ତ କରିଛି। କ୍ରମାଗତ ୫ ମ୍ୟାଚ୍ ହାରିବା ପରେ କେକେଆର୍ ବିଜୟର ସ୍ବାଦ ଚାଖିଛି। କୋଲକାତାର ବିଜୟର ହିରୋ ଥିଲେ ରିଙ୍କୁ ସିଂ। ରାଜସ୍ଥାନ ବିପକ୍ଷରେ ସେ ୨୩ ବଲରୁ ଅପରାଜିତ ୪୨ ରନ କରିଥିଲେ। ଏହି ଇନିଂସରେ ରିଙ୍କୁ ୬ଟି ଚୌକା ଓ ଗୋଟିଏ ଛକା ମାରିଥିଲେ। ଏହାପୂର୍ବରୁ ରିଙ୍କୁ ଦୁଇଟି ଜବରଦସ୍ତ କ୍ୟାଚ ମଧ୍ୟ ନେଇଥିଲେ। ମ୍ୟାଚରେ ଚତୁର୍ଥ ଉଇକେଟ ପାଇଁ ରିଙ୍କୁ ନୀତୀଶ ରାଣାଙ୍କ ସହ ୩୮ଟି ବଲରୁ ଅପରାଜିତ ୬୬ ରନ ଯୋଡିଥିଲେ। ଏହି ଅଲରାଉଣ୍ଡର ପ୍ରଦର୍ଶନ ପାଇଁ ରିଙ୍କୁ ସିଂଙ୍କୁ ମ୍ୟାନ୍ ଅଫ୍ ଦ ମ୍ୟାଚ୍ ପୁରସ୍କାର ଦିଆଯାଇଥିଲା।
ମ୍ୟାଚ ପରେ ରିଙ୍କୁ ସିଂ କହିଛନ୍ତି, ମୁଁ ଆଲିଗଡରୁ ଆଇପିଏଲ ଖେଳିଥିବା ପ୍ରଥମ ଖେଳାଳି, ଅନେକ ରଣଜୀ ଟ୍ରଫି ଖେଳିଛି। ପ୍ରଥମ ଶ୍ରେଣୀ କ୍ରିକେଟ ଅପେକ୍ଷା ଆଇପିଏଲରେ ଅଧିକ ଚାପ ରହିଛି। ଗତ ୫ ବର୍ଷ ଧରି, ମୁଁ ନିରନ୍ତର ସୁଯୋଗ ପାଇନାହିଁ। ଏଭଳି ପରିସ୍ଥିତିରେ ଦଳର ବିଜୟରେ ସହଯୋଗ କରିବା ଭଲ ଲାଗେ। ମ୍ୟାଚ୍ ସମୟରେ ଖେଳ ଶେଷ କରି ଆସିବାକୁ ବାଜ (ମ୍ୟାକକୁଲମ) ମୋତେ କହିଥିଲେ ଏବଂ ମୁଁ ନୀତୀଶ ରାଣାଙ୍କ ସହ ବ୍ୟାଟିଂ କରୁଥିବାବେଳେ ସେ ମଧ୍ୟ ସମାନ କଥା କହିଥିଲେ।
ମ୍ୟାଚ ପରେ କେକେଆର୍ ଟୁଇଟର୍ ଆକାଉଣ୍ଟରୁ ରିଙ୍କୁ ସିଂଙ୍କ ଏକ ମଜାଦାର ଭିଡିଓ ଶେୟାର କରାଯାଇଛି। ଏଥିରେ ସେ ନୀତୀଶ ରାଣାଙ୍କୁ କହିଥିଲେ ଯେ, ମୁଁ ସକାଳୁ ଭାବୁଥିଲି ଆଜିର ମ୍ୟାଚରେ ରନ ସ୍କୋର କରିବି ଏବଂ ମ୍ୟାନ ଅଫ ଦି ମ୍ୟାଚ ମଧ୍ୟ ହେବି। ସେଥିପାଇଁ ମୁଁ ନିଜେ ମ୍ୟାଚ ପୂର୍ବରୁ ମୋ ପାପୁଲିରେ ଲେଖିଥିଲି ଆଜି ମୁଁ ୫୦ ରନ ସ୍କୋର କରିବି। ଏହି ଭିଡିଓ ଏବେ ଭାଇରାଲ ହେବାରେ ଲାଗିଛି।
