ନୂଆଦିଲ୍ଲୀ, ୨୦।୧: ଦେଶରେ ରହିଥିବା ଭଣ୍ଡବାବା ଅବା ଆତ୍ମଘୋଷିତ ବାବାଙ୍କ ଆଶ୍ରମ ବନ୍ଦ କରିବା ଉପରେ ବିଚାର କରିବାକୁ ସୁପ୍ରିମ୍କୋର୍ଟ ମନା କରିଛନ୍ତି। ଏନେଇ ସରକାରଙ୍କୁ ଆବେଦନ କରାଯିବା ଆବଶ୍ୟକ ବୋଲି ପ୍ରଧାନ ବିଚାରପତି ଶରଦ ଅରବିନ୍ଦ ବୋବ୍ଡେଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି। ଏହା କୋର୍ଟର ବିଚାର ପରିସର ଭୁକ୍ତ ନୁହେଁ ବୋଲି ଖଣ୍ଡପୀଠ କହିଛନ୍ତି। ତେଲଙ୍ଗାନା ବାସିନ୍ଦା ଦୁମପଲା ରାମାରେଡ୍ଡୀଙ୍କ ପକ୍ଷରୁ କରାଯାଇଥିବା ଏକ ଆବେଦନରେ ଉଲ୍ଲେଖ କରାଯାଇଥିଲା ଯେ, ୧୭ଟି ଆଶ୍ରମକୁ ଅଖିଳ ଭାରତୀୟ ଆଖଡ଼ା ପରିଷଦ ପକ୍ଷରୁ ନକଲି ଘୋଷଣା କରାଯାଇଛି। ଅପରପକ୍ଷରେ ବିରେନ୍ଦ୍ର ଦେବ ଦୀକ୍ଷୀତ୍, ଆସାରାମ୍, ରାମ ରହିମ୍, ରାଧେ ମା ଆଦି କେତେକ ଆଶ୍ରମର ସଞ୍ଚାଳକ ଜେଲ୍ରେ ରହିଛନ୍ତି ଅବା ଫେରାର ଅଛନ୍ତି। ମାତ୍ର ସେମାନଙ୍କର ସହଯୋଗୀମାନେ ଏବେ ଆଶ୍ରମ ପରିଚାଳନା କରୁଛନ୍ତି। ଏସବୁ ଆଶ୍ରମରେ ମହିଳା ନିର୍ଯାତନା ସହିତ ସାଧାରଣ ଲୋକଙ୍କ ମଧ୍ୟରେ ମିଥ୍ୟା ପ୍ରଚାର କରାଯାଉଛି ବୋଲି ଆବେଦନକାରୀଙ୍କ ପକ୍ଷରୁ କୁହାଯାଇଥିଲା। ସରକାରଙ୍କ ପାଖରେ ପଦକ୍ଷେପ ଗ୍ରହଣ ନେଇ ଦାବି ଉପସ୍ଥାପନ କରିବା ଆବଶ୍ୟକ ବୋଲି ଖଣ୍ଡପୀଠ କହିଛନ୍ତି।
