ଖୋର୍ଦ୍ଧା ଅଫିସ୍/ ବାଣପୁର, ୨୩ା୧୨ (ଡି.ଏନ୍.ଏ.):
ଖୋର୍ଦ୍ଧା ଜିଲା ବାଣପୁରର ଐତିହାସିକ ଶୈବପୀଠ ଶ୍ରୀଦକ୍ଷେଶ୍ୱର ମନ୍ଦିରରୁ ସୋମବାର ବିଳମ୍ବିତ ରାତିରେ ୨୨ଟି ଅଷ୍ଟଧାତୁ ମୂର୍ତ୍ତି ଚୋରି ହୋଇଛି। ଏନେଇ ମଙ୍ଗଳବାର ପାଳିଆସେବକ ଶଙ୍କର ନାୟକ ବାଣପୁର ଥାନାରେ ଲିଖିତ ଅଭିଯୋଗ କରିଛନ୍ତି। ଏ ସମ୍ପର୍କରେ ପୋଲିସ ଏକ ମାମଲା (ନଂ.୩୯୬/୨୦) ରୁଜୁ କରିବା ସହ ୨ଜଣଙ୍କୁ ଅଟକ ରଖି ପଚରାଉଚରା ଚଳାଇଛି।
ସୂଚନା ଅନୁଯାୟୀ, ସବୁଦିନ ପରି ପାଳିଆସେବକ ଶଙ୍କର ମନ୍ଦିର ଖୋଲିବା ଲାଗି ମଙ୍ଗଳବାର ଭୋର ସାଢ଼େ ୫ଟାରେ ମନ୍ଦିରରେ ପହଞ୍ଚିଥିଲେ। ମନ୍ଦିର ମୁଖ୍ୟ ଫାଟକ ଖୋଲାଥିବା ବେଳେ ଗର୍ଭଗୃହ କବାଟ ଭଙ୍ଗାଯାଇଥିବା ଦେଖିବାକୁ ପାଇଥିଲେ। ମନ୍ଦିର ପରିସରରେ ରହିଥିବା ୩୧ଟି ମୂର୍ତ୍ତିି ମଧ୍ୟରୁ ୨୨ଟି ମୂର୍ର୍ତ୍ତି ନ ଥିବା ଦେଖିଥିଲେ। ଚୋରି ହୋଇଥିବା ମୂର୍ତ୍ତିଗୁଡ଼ିକ ମଧ୍ୟରେ ମା’ କନକଦୁର୍ଗା, ଗୋପୀନାଥ ଦେବ, କଳିଯୁଗେଶ୍ୱର ଦେବ ଓ ଚନ୍ଦ୍ରଶେଖର, ଲକ୍ଷ୍ମୀ, ସରସ୍ବତୀ ଓ ଗଣେଶ ଆଦିି ଦେବଦେବୀଙ୍କ ପ୍ରତିମୂର୍ତ୍ତି ରହିଛି। ଏନେଇ ସେ ସଙ୍ଗେ ସଙ୍ଗେ ଦେବୋତ୍ତର କମିଟିକୁ ଜଣାଇଥିଲେ। ଖବରପାଇ ଭୁବନେଶ୍ୱର ପ୍ରତ୍ନତତ୍ତ୍ୱ ବିଭାଗୀୟ ଅଧିକାରୀ, ଏସ୍ପି ଅଜୟ ପ୍ରତାପ ସ୍ବାଇଁ, ବାଲୁଗଁା ଏସ୍ଡିପିଓ ସୁରେଶ ଦାଶ, ବାଣପୁର ତହସିଲଦାର ମନ୍ମଥ ବେହେରା, ଥାନାଧିକାରୀ ସଞ୍ଜୟ ପଟ୍ଟନାୟକ ପ୍ରମୁଖ ପହଞ୍ଚି ସିସିଟିଭି ଯାଞ୍ଚ କରିବା ସହ ତଦନ୍ତ ଆରମ୍ଭ କରିଥିଲେ। ଏହି ଘଟଣାରେ ୨ଜଣଙ୍କୁ ଅଟକ ରଖାଯାଇଛି। ଖୁବ୍ଶୀଘ୍ର ଅଭିଯୁକ୍ତମାନଙ୍କୁ ଗିରଫ କରାଯିବ ବୋଲି ଏସ୍ପି ସ୍ବାଇଁ କହିଛନ୍ତି। ଅନ୍ୟପଟେ ମନ୍ଦିରରୁ ମୂର୍ତ୍ତି ଚୋରି ନେଇ ବାଣପୁର ଐତିହ୍ୟ ସୁରକ୍ଷା ସମିତି ଏବଂ ଖୋର୍ଦ୍ଧା ଐତିହାସିକ ସମାଜର ସଦସ୍ୟମାନେ ଉଦ୍ବେଗ ପ୍ରକାଶ କରିଛନ୍ତି। ଏହି କୀର୍ତ୍ତିରାଜିର ପୁନରୁଦ୍ଧାର ଲାଗି ଦାବି କରିଛନ୍ତି।
ଐତିହ ବିଶାରଦ ପ୍ରାଧ୍ୟାପକ ଗୋପାଳକୃଷ୍ଣ ଦାସ କୁହନ୍ତି, ବାଣପୁରସ୍ଥ ଦକ୍ଷେଶ୍ୱର ମନ୍ଦିରର ଭାସ୍କର୍ଯ୍ୟ ପ୍ରତ୍ନତତ୍ତ୍ୱ ଦୃଷ୍ଟିରୁ ଓଡ଼ିଶାରେ ପ୍ରଖ୍ୟାତ। ସପ୍ତରଥ ଶୈଳୀରେ ନିର୍ମିତ ଏହି ମନ୍ଦିରର ସୂକ୍ଷ୍ମ କାରୁକାର୍ଯ୍ୟ ଅତି ମନୋରମ। ପ୍ରଖ୍ୟାତ ପ୍ରତ୍ନତତ୍ତ୍ୱବିତ୍ ଥୋମାସ୍ ଡୋନାଲ୍ଡ ସନ୍ ତାଙ୍କର ରଚିତ ହିନ୍ଦୁ ଟେମ୍ପୁଲ ଆକ୍ଟ ଇନ୍ ଓଡ଼ିଶା ଗ୍ରନ୍ଥରେ, ବିଶିଷ୍ଟ ଐତିହାସିକ କୃଷ୍ଣଚନ୍ଦ୍ର ପାଣିଗ୍ରାହୀ ଦି ହିଷ୍ଟ୍ରି ଅଫ୍ ଓରିସା ଗ୍ରନ୍ଥ ଏବଂ ଐତିହାସିକ ବ୍ରଜବନ୍ଧୁ ଦାସ ବାଣପୁର ଇତିହାସ ଗ୍ରନ୍ଥରେ ଦକ୍ଷ ପ୍ରଜାପତିଙ୍କ ମନ୍ଦିର ସମ୍ପର୍କରେ ତଥ୍ୟପୂର୍ଣ୍ଣ ଆଲୋଚନା କରିଛନ୍ତି। ମନ୍ଦିରରେ ରହିଥିବା ମୂର୍ତ୍ତିଗୁଡ଼ିକ ଅତି ପ୍ରାଚୀନ ଏବଂ ଅନ୍ତର୍ଜାତୀୟ ବଜାରରେ ଏହାର ମୂଲ୍ୟ କୋଟି କୋଟି ଟଙ୍କା ହେବା ନେଇ ଆକଳନ କରାଯାଇଛି। ମନ୍ଦିରରୁ ମୂର୍ତ୍ତି ଚୋରି ହେବା ଦୁଃଖଦାୟକ ଘଟଣା। ଏହାର ପୁନରୁଦ୍ଧାର ଜରୁରୀ ବୋଲି ସେ କହିଛନ୍ତି।
