ନୂଆଦିଲ୍ଲୀ,୨୩।୧୨: ଅଷ୍ଟ୍ରେଲିଆର ପୂର୍ବ ଅଧିନାୟକ ରିକି ପଣ୍ଟିଂ ନିଜର ଅନ୍ତରାଷ୍ଟ୍ରୀୟ କ୍ୟାରିୟରରେ ୭୧ଟି ଶତକ କରିଛନ୍ତି। ତାଙ୍କ ନେତୃତ୍ୱରେ ଦଳ ଦୁଇଥର ଦିନିକିଆ ବିଶ୍ୱକପ୍ ଚମ୍ପିଆନ୍ ମଧ୍ୟ ହୋଇଛି। ଏସବୁ ସତ୍ତ୍ୱେ ପଣ୍ଟିଂ ହରଭଜନଙ୍କ ବଲ୍କୁ ଖେଳିବାକୁ ଡରିଥାନ୍ତି। ଏକଦା ଦଳର ଭାରତ ଗସ୍ତ ସମୟରେ ସେ ଏତେ ମାତ୍ରାରେ ବିବ୍ରତ ହୋଇଯାଇଥିଲେ ଯେ ନିଜର ବ୍ୟାଟିଂ ଉପରେ ତାଙ୍କର ବିଶ୍ୱାସ ଉଠିଯାଇଥିଲା ବୋଲି ରବିଚନ୍ଦ୍ରନ ଅଶ୍ୱିନଙ୍କ ସହ ଅନ୍ଲାଇନ୍ କଥାବାର୍ତ୍ତାରେ ସେ ଏହା କହିଛନ୍ତି।
ତେବେ କ୍ୟାରିୟରରେ କିଛି ମହାନ ସ୍ପିନରଙ୍କ ସହ ସଂଘର୍ଷ ଦେଖିବାକୁ ମିଳିଛି କି ପ୍ରଶ୍ନରେ ପଣ୍ଟିଂ କହିଥିଲେ, ହରଭଜନ ସେମାନଙ୍କ ମଧ୍ୟରୁ ଜଣେ। ତାଙ୍କ ସହ ଅନେକ ଥର ଲଢ଼େଇ ହୋଇଛି। ସେଥିରୁ ଅଧିକ ଥର ସେ ଜିତିଛନ୍ତି। ଟେଷ୍ଟ କ୍ରିକେଟରେ ହରଭଜନଙ୍କଠାରୁ ବ୍ୟତିତ ଅନ୍ୟ କେହି ତାଙ୍କୁ ଅଧିକ ଥର ଆଉଟ୍ କରିପାରିନାହାନ୍ତି। ୨୦୦୧ରେ ଖେଳାଯାଇଥିବା ସିରିଜ କଥା ମନେପଡେ। ଏଥିରେ ୫ ମ୍ୟାଚ୍ରେ ହରଭଜନ ତାଙ୍କୁ ଆଉଟ୍ କରିଥିଲେ। ବହୁତ କମ୍ ବଲ୍ ପକାଇ ସେ ତାହା କରିଥିଲେ। ଏହା ତାଙ୍କୁ ଚିନ୍ତାରେ ପକାଇଦେଇଥିଲା। ଏପରିକି ସେ ଡରି ଯାଇଥିଲେ। ଧିରେ ଧିରେ ତାଙ୍କ ବଲ୍କୁ ଖେଳିବା ପାଇଁ ନୂଆ ନୂଆ ପ୍ରୟାସ ଆରମ୍ଭ କରିଥିଲେ ବୋଲି ପଣ୍ଟିଂ କହିଛନ୍ତି।
