ଗଞ୍ଜାମ, ୨୬।୫ (ବିଦ୍ୟାଧର ସାହୁ): ଓଡ଼ିଶା ପ୍ରଶାସନିକ ସେବା (OAS) ପରୀକ୍ଷାରେ ପୁଣି ଚମକିଛନ୍ତି ଗଞ୍ଜାମ ଜିଲାର ପୁଅ। ଓଡ଼ିଶା ଲୋକସେବା ଆୟୋଗ (OPSC) ଦ୍ବାରା ପ୍ରକାଶିତ ଓଡ଼ିଶା ସିଭିଲ୍ ସର୍ଭିସେସ୍ ପରୀକ୍ଷା ଫଳାଫଳରେ ଗଞ୍ଜାମ ବ୍ଳକ୍ ସାନରାମଚନ୍ଦ୍ରପୁର ପଞ୍ଚାୟତର ପ୍ରତିଭାଶାଳୀ ଯୁବକ ଖଗେଶ୍ୱର ବେହେରା କୃତକାର୍ଯ୍ୟ ହୋଇଛନ୍ତି। ସେ ରାଜ୍ୟ ସ୍ତରରେ ୯୮ ତମ ରାଙ୍କ ହାସଲ କରି ସମଗ୍ର ଅଞ୍ଚଳ ପାଇଁ ଗୌରବ ଆଣିଛନ୍ତି।
ଖଗେଶ୍ୱର ହେଉଛନ୍ତି ଗୌରାଙ୍ଗ ପାଟଣାର ମୂଳ ବାସିନ୍ଦା। ସେ ଶିକ୍ଷକ ଭାବେ କାର୍ଯ୍ୟରତ ଦେବରାଜ ବେହେରା ଏବଂ କୁନ୍ତଳା ବେହେରାଙ୍କ ସୁପୁତ୍ର। ତାଙ୍କର ଏହି ସଫଳତା ପଛରେ ଏକ ଲମ୍ବା ସଂଘର୍ଷ ଏବଂ ପରିଶ୍ରମ ରହିଛି। ଖଗେଶ୍ୱର ସ୍ଥାନୀୟ ବାମଦେବ ହାଇସ୍କୁଲ୍ରୁ ମାଟ୍ରିକ୍ ପାସ୍ କରିବା ପରେ ପରବର୍ତ୍ତୀ ସମୟରେ ବି.ଟେକ୍ (B.Tech) ଇଞ୍ଜିନିୟରିଂ ଶେଷ କରିଥିଲେ। ଏକ ସୁରକ୍ଷିତ ଇଞ୍ଜିନିୟରିଂ କ୍ୟାରିୟର ବଦଳରେ ସେ ଜନସାଧାରଣଙ୍କ ସେବା ପାଇଁ ସିଭିଲ୍ ସର୍ଭିସକୁ ବାଛିଥିଲେ। ମାତ୍ର ଦ୍ୱିତୀୟ ଉଦ୍ୟମରେ ହିଁ ସେ ଏହି ପ୍ରତିଷ୍ଠିତ ପରୀକ୍ଷାରେ ଉତ୍ତୀର୍ଣ୍ଣ ହୋଇ ନିଜର ସ୍ୱପ୍ନକୁ ସାକାର କରିଛନ୍ତି। ସେ ନିଜର ସଫଳତାର ଶ୍ରେୟ ଭଗବାନ ଏବଂ ନିଜ ପରିବାରବର୍ଗଙ୍କୁ ଦେଇଛନ୍ତି।
ନିଜର ପ୍ରତିକ୍ରିୟା ପ୍ରକାଶ କରି ଓଏଏସ୍ ଅଫିସର ଭାବେ ମନୋନୀତ ହୋଇଥିବା ଖଗେଶ୍ୱର କହିଛନ୍ତି, “ଭବିଷ୍ୟତରେ ଜଣେ ଆଇଏଏସ୍ (IAS) ଅଫିସର ହେବା ମୋର ମୂଳ ଲକ୍ଷ୍ୟ। ପ୍ରଶାସନରେ ରହି ଲୋକଙ୍କ ସେବା କରିବା ସହ ଏକ ସ୍ୱଚ୍ଛ ଓ ଦୁର୍ନୀତିମୁକ୍ତ ସମାଜ ଗଠନକୁ ମୁଁ ସର୍ବାଧିକ ପ୍ରାଥମିକତା ଦେବି।”
ଖଗେଶ୍ୱର ୯୮ ତମ ର଼୍ୟାଙ୍କ ରଖି ଓଏଏସ୍ ପାଇଥିବା ଖବର ପ୍ରସାରିତ ହେବା ପରେ ଗୌରାଙ୍ଗ ପାଟଣା ଏବଂ ସାନରାମଚନ୍ଦ୍ରପୁର ଅଞ୍ଚଳରେ ଉତ୍ସବର ପରିବେଶ ସୃଷ୍ଟି ହୋଇଛି। ଏହି ଅଦ୍ଭୁତପୂର୍ବ ସଫଳତା ପାଇଁ ତାଙ୍କ ବାସଭବନରେ ବନ୍ଧୁବାନ୍ଧବ ଓ ସ୍ଥାନୀୟ ବୁଦ୍ଧିଜୀବୀଙ୍କ ଭିଡ଼ ଜମିବା ସହ ବିଭିନ୍ନ ମହଲରୁ ତାଙ୍କ ପାଇଁ ଶୁଭେଚ୍ଛାର ସୁଅ ଛୁଟୁଛି।
