ଇନ୍ଦୋର,୨୪।୭କରୋନା ସଙ୍କଟ ଯୋଗୁ ସାରା ବିଶ୍ୱରେ ବେରୋଜଗାର ସମସ୍ୟା ଆହୁରି ବୃଦ୍ଧି ପାଇଛି। ଏହା ଅସଂଗଠିତ କ୍ଷେତ୍ରର ଶ୍ରମିକମାନଙ୍କ ଉପରେ ସିଧାସଳଖ ପ୍ରଭାବ ପକାଇଛି। ଯେଉଁମାନେ ପ୍ରତିଦିନ ଠେଲା ଲଗାଇ ପରିବାର ପ୍ରତିପୋଷଣ କରୁଛନ୍ତି ସେମାନଙ୍କ ଉପରେ ଏହାର ବିଶେଷ ପ୍ରଭାବ ପଡ଼ିଛି। କରୋନା କାଳରେ ବେରୋଜଗାର ଯୋଗୁଁ କେତେକ ଶିକ୍ଷକଙ୍କଠାରୁ ଆରମ୍ଭ କରି ଅଭିନେତା ପର୍ଯ୍ୟନ୍ତ ସମସ୍ତେ ଠେଲା ଲଗାଇ ପରିବା ବିକ୍ରି କରୁଥିବା ଦେଖିବାକୁ ମିଳୁଛି। ଇତିମଧ୍ୟରେ ନିଜ ଘର ଚଳାଇବା ପାଇଁ ଜଣେ ନାବାଳକ ରାସ୍ତାରେ ଅଣ୍ଡା ବ୍ରିକ୍ରି କରୁଥିଲେ। ସେହି ସମୟରେ ନଗର ନିଗମର ଏକ ଟିମ୍ ଆସି ଉକ୍ତ ଠେଲାକୁ ଓଲଟାଇ ଦେଇଥିଲେ। ଫଳରେ ପ୍ରାୟ ସବୁ ଅଣ୍ଡା ତଳେ ପଡ଼ି ଫାଟିଯାଇଥିଲା। ଯାହାକୁ ଦେଖି ଉକ୍ତ ନାବାଳକ ତାଙ୍କୁ ସିନା କିଛି କହିପାରି ନ ଥିଲେ, କିନ୍ତୁ ତାଙ୍କ ଆଖିରେ ଆଖି ଲୁହ ଓ ଛାତିରେ କୋହଭରି ଯାଇଥିଲା। ପରିବାର ଚଳାଇବାର ଚିନ୍ତା ଓ ଜିନିଷର କ୍ଷତି ଯେପରି ତାଙ୍କ ମୁଣ୍ଡ ଉପରେ ଚଡ଼କ ପଡ଼ିଯାଇଥିଲା। ସେହି ସମୟର ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଯାହାକୁ ନେଇ କେତେକ ୟୁଜର୍ସ ପ୍ରଶାସନ ଉପରେ ବିରକ୍ତିଭାବ ପ୍ରକାଶ କରିବା ସହ ଏହି ଘଟଣାକୁ ନିନ୍ଦା କରିଛନ୍ତି। ଏହି ଘଟଣା ମଧ୍ୟପ୍ରଦେଶର ଇନ୍ଦୋରର ବୋଲି କୁହାଯାଉଛି। ଅନ୍ୟପଟେ ଏହି ଘଟଣା ସର୍ବସମ୍ମୁଖକୁ ଆସିବା ପରେ ମ୍ୟୁନସିପାଲିଟି କର୍ପୋରେସନ କମିଶନର ଏନେଇ ଅତିରିକ୍ତ କମିଶନରଙ୍କୁ ତଦନ୍ତ ନିର୍ଦ୍ଦେଶ ଦେଇଛନ୍ତି।
