ହାଇଦ୍ରାବାଦ, ୨୮।୬- ଭାରତୀୟ ଦଳର ପ୍ରାକ୍ତନ ସ୍ପିନର ତଥା ଓଡ଼ିଆ କ୍ରିକେଟର୍ ପ୍ରଜ୍ଞାନ ଓଝା ୨୦୦୯ରେ ଖେଳାଯାଇଥିବା ଆଇପିଏଲ୍ ମ୍ୟାଚ୍ରେ ବ୍ୟାଟିଂ କିମ୍ବଦନ୍ତୀ ସଚିନ ତେନ୍ଦୁଲକରଙ୍କୁ ଆଉଟ୍ କରିଥିଲେ। ଏହାପରେ ଫ୍ରାଞ୍ଚାଇଜ ମାଲିକଙ୍କଠାରୁ ତାଙ୍କୁ ଏକ ସ୍ପେଶାଲ ଗିଫ୍ଟ ମିଳିଥିଲା। ଦୀର୍ଘ ୧୧ ବର୍ଷ ପରେ ଓଝା ଏକ ସାକ୍ଷାତ୍କାର ଅବସରରେ ଏହି ଘଟଣାର ଫର୍ଦ୍ଦାଫାଶ କରିଛନ୍ତି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ର ୨୦୦୯ ସଂସ୍କରଣ ଦକ୍ଷିଣ ଆଫ୍ରିକାରେ ଅନୁଷ୍ଠିତ ହୋଇଥିଲା। ପ୍ରଜ୍ଞାନ ସେତେବେଳେ ଡେକାନ ଚାଜର୍ସ ପକ୍ଷରୁ ପ୍ରତିନିଧିତ୍ୱ କରୁଥାନ୍ତି। ପ୍ରଜ୍ଞାନ କହିଛନ୍ତି, ‘ମୁମ୍ବାଇ ଇଣ୍ଡିଆନ୍ସ ବିପକ୍ଷ ମ୍ୟାଚ୍ ପୂର୍ବ ଦିନ ଡେକାନ ଚାର୍ଜସ ଟିମ୍ ମାଲିକ ମୋ ନିକଟକୁ ଆସିଥିଲେ। ମୋତେ କହିଲେ ଯଦି ତୁମେ ସଚିନ ତେନ୍ଦୁଲକରଙ୍କ ଉଇକେଟ୍ ହାସଲ କରିବ ତାହାଲେ ନିଶ୍ଚିତ ତୁମକୁ ଏକ ସ୍ପେଶାଲ ଗିଫ୍ଟ ପ୍ରଦାନ କରିବି। ଏହାପରେ ମୁଁ କହିଥିଲି ସାର୍ ଯଦି ସଚିନଙ୍କ ଉଇକେଟ୍ ମୁଁ ନେଇଯାଏ ତାହାଲେ ମୋତେ ଏକ ଘଣ୍ଟା ଦେବେ। ଏହା ପରଦିନ ମ୍ୟାଚ୍ରେ ମଧ୍ୟ ସେଇଆ ହିଁ ଘଟିଲା। ସଚିନ ପାଜିଙ୍କ ସମେତ ଜେପି ଡୁମିନି ଓ ଶିଖର ଧାଓ୍ବନଙ୍କ ଉଇକେଟ ମୁଁ ହାସଲ କରିଥିଲି। ଏହାପରେ ଫ୍ରାଞ୍ଚାଇଜ ମାଲିକ ମୋତେ ଗିଫ୍ଟ ଆକାରରେ ଏକ ଘଣ୍ଟା ପ୍ରଦାନ କରିଥିଲେ’ ବୋଲି ଓଝା ସାକ୍ଷାତ୍କାର ଅବସରରେ କହିଛନ୍ତି। ସଚିନଙ୍କ ଉଇକେଟ୍ ନେଇ ପ୍ରଜ୍ଞାନ ହିଁ ଏହି ମ୍ୟାଚ୍ର ମୋଡ଼ ବଦଳାଇ ଦେଇଥିଲେ। ଡେକାନ ଚାଜର୍ସ ପକ୍ଷରୁ ଧାର୍ଯ୍ୟ ୧୬୯ ରନର ଟାର୍ଗେଟ୍କୁ ପିଛା କରି ମୁମ୍ବାଇ କୌଣସି ଉଇକେଟ୍ ନ ହରାଇ ୮୧ ରନ କରିଥିଲା। ଏହାପରେ ସଚିନଙ୍କୁ ଆଉଟ୍ କରି ଓଝା ଦଳକୁ ପ୍ରଥମ ସଫଳତା ଦେଇଥିଲେ। ଏହି ମ୍ୟାଚ୍ରେ ମୁମ୍ବାଇ ୧୫୬ ରନ କରିବାକୁ ସକ୍ଷମ ହୋଇଥିଲା। ଉଲ୍ଲେଖ୍ୟଯୋଗ୍ୟ, ଚଳିତ ବର୍ଷ ଫେବ୍ରୁୟାରୀରେ କ୍ରିକେଟ୍ର ସବୁ ଫର୍ମାଟ୍ରୁ ଅବସର ନେଇଥିବା ଓଝା ଜାତୀୟ ଦଳ ପକ୍ଷରୁ ୨୪ ଟେଷ୍ଟ, ୧୮ ଦିନିକିଆ ଓ ୬ ଟି୨୦ ମ୍ୟାଚ୍ ଖେଳି ମୋଟ୍ ଉପରେ ୧୪୪ ଉଇକେଟ୍ ନେଇଛନ୍ତି।
