ନିଜ ପଢ଼ା ଭିତରୁ ସମୟ ବାହାର କରି ଅବହେଳିତ ପିଲାଙ୍କ ଭବିଷ୍ୟତ ଗଢୁଛନ୍ତି ଉତ୍ତରପ୍ରଦେଶର ବାଦୁନ ଜିଲାରେ ଜନ୍ମିତ ସତ୍ୟେନ୍ଦ୍ର ପାଲ। ସେ ଦିଲ୍ଲୀର ଏକ ଫ୍ଲାଏଓଭର ତଳେ ଅନୌପଚାରିକ ଭାବେ ସ୍କୁଲଟିଏ ଖୋଲି ପ୍ରତିଦିନ ବସ୍ତି ପିଲାଙ୍କୁ ୬ ବର୍ଷ ହେବ ମାଗଣାରେ ପଢାଉଛନ୍ତି। ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ମୋଟ ୧୫୦ ପିଲା ଏଠାରେ ପଢୁଛନ୍ତି। ଛୋଟ ପିଲାମାନଙ୍କୁ ଝାଟିମାଟି ଘରେ ଓ ଉଚ୍ଚ ଶ୍ରେଣୀର ପିଲାଙ୍କୁ ଖୋଲା ଜାଗାରେ ପଢାଉଛନ୍ତି ସତ୍ୟେନ୍ଦ୍ର। ୨୦୧୨ରେ ସତ୍ୟେନ୍ଦ୍ର ଦ୍ୱାଦଶ ପାସ୍ କରିବା ପରେ ପରିବାରର ଆର୍ଥିକ ସ୍ଥିତି ଭଲ ନ ଥିବାରୁ ଆଉ ନ ପଢି ଚାଷ କରିଥିତ୍ଲେ। କିନ୍ତୁ ୨୦୧୫ରେ ଉତ୍ତରପ୍ରଦେଶରୁ ଦିଲ୍ଲୀ ଆସିବା ପରେ ସେ ଶିକ୍ଷାର ଗୁରୁତ୍ୱ ଉପଲବ୍ଧି କରି ଏହି ସ୍କୁଲ୍ ଆରମ୍ଭ କରିଥିଲେ। ସ୍କୁଲ ପାଇଁ ତାଙ୍କ ପାଖରେ ଜାଗା କି ଟଙ୍କା ନ ଥିଲା। ପ୍ରଥମେ ସେ ଗଛମୂଳେ ସପ୍ତମ ଶ୍ରେଣୀର ୫ ଜଣ ପିଲାଙ୍କୁ ପଢ଼ାଇବା ଅରମ୍ଭ କରିଥିଲେ। ପରେ ଲୋକମାନେ ଦାନ କରିବାରୁ ଛୋଟ ଘରଟିଏ କରିଛନ୍ତି। ତାଙ୍କୁ ଏବେ ବୟସ ୨୫ ଓ ସେ ବିଏସ୍ସି (ଗଣିତ ସମ୍ମାନ) ପଢୁଛନ୍ତି। ନିଜେ ବସ୍ତିରେ ବି ରହୁଛନ୍ତି। ବସ୍ତି ବାସିନ୍ଦାମାନେ କାମକୁ ଚାଲିଯିବା ପରେ ସେମାନଙ୍କ ପିଲାମାନଙ୍କୁ ୨ କି.ମି. ଦୂର ସରକାରୀ ସ୍କୁଲ୍କୁ ଯିବାକୁ ସେମାନେ ଅନୁମତି ଦେଉ ନ ଥିଲେ। ଏହାକୁ ଲକ୍ଷ୍ୟ କରି ସତ୍ୟେନ୍ଦ୍ର ସେମାନଙ୍କୁ ପଢ଼ାଇବା ଆରମ୍ଭ କରିଥିତ୍ଲେ ଓ ଏ ଯାବତ୍ ତାହା ଚାଲୁ ରଖିଛନ୍ତି। ତାଙ୍କର ଏହି କାର୍ଯ୍ୟ ଦ୍ୱାରା ପ୍ରଭାବିତ ହୋଇ ପିଲାଙ୍କୁ ପଢ଼ାଇବାରେ ଆଉ ୫ ଜଣ ତାଙ୍କୁ ସାହାଯ୍ୟ କରୁଛନ୍ତି।
