ତିହିଡ଼ି,୧୩ା୫(ସଞ୍ଜିତ ବଳ): ଆମର ଯଦି ଦୋକାନ ଭାଙ୍ଗିବ ସମସ୍ତଙ୍କର ଭାଙ୍ଗ, ନ ହେଲେ ଫେରିଯାଅ। ଭଦ୍ରକ ଜିଲା ତିହିଡ଼ି ତହସିଲ ପୀରହାଟ ଥାନା ଅଧୀନ ଗଦି ବଜାରର ବ୍ୟବସାୟୀମାନେ ବୁଧବାର ପୂର୍ବାହ୍ନରେ ଉଚ୍ଛେଦ ସମୟରେ ଏହି ଦାବି କରିଛନ୍ତି। ଏପରିକି ଜଣେ ଦୋକାନୀ ଦେହରେ ପେଟ୍ରୋଲ ଢାଳି ଆତ୍ମାହୁତି ଦେବାକୁ ମଧ୍ୟ ଚେତାବନୀ ଦେଇଛନ୍ତି। ଏହାକୁ ନେଇ ଉତ୍ତେଜନା ପ୍ରକାଶ ପାଇଛି। ଯାହାଫଳରେ ଉଚ୍ଛେଦ ପାଇଁ ଯାଇଥିବା ଅତିରିକ୍ତ ତହସିଲଦାର ସତୀଶ କୁମାର ସାହୁ ଓ ତହସିଲ କର୍ମଚାରୀମାନେ ନିରୁପାୟ ହୋଇ ପଡ଼ିଥିବା ଜଣାଯାଇଛି।
ଘଟଣାରୁ ପ୍ରକାଶ ଯେ, ଗଦି ବଜାରରେ ସରକାରୀ ଜାଗା ଅବରୋଧ କରି କେତେକ ବ୍ୟକ୍ତି ଦୋକାନ ଗୃହ ନିର୍ମାଣ କରି ବିଭିନ୍ନ ବ୍ୟବସାୟ ଚଳାଇ ଆସୁଛନ୍ତି। ତେବେ ତହସିଲ କାର୍ଯ୍ୟାଳୟ ପକ୍ଷରୁ କିଛିଦିନ ପୂର୍ବେ ବଜାରରେ ଥିବା ୮୮ଦୋକାନୀଙ୍କୁ ଜାଗା ଖାଲି କରିବାକୁ ନୋଟିସ ଦିଆ ଯାଇଥିଲା। ଏହି ନୋଟିସ ପାଇବା ପରେ କେତେକ ଦୋକାନୀ ଦୋକାନ ଭାଙ୍ଗିବା ଆରମ୍ଭ କରିଥିଲେ। ତେବେ ବୁଧବାର ପ୍ରଶାସନ ପକ୍ଷରୁ ଗୋଟିଏ ଦୋକାନକୁ ଜେସିବି ସହାୟତାରେ ଭଙ୍ଗା ଯାଇଥିଲା। ତେବେ ବଜାରରେ ୮୮ ପରିବର୍ତ୍ତେ ୮ଟି ଦୋକାନ ଭଙ୍ଗାଯିବ ବୋଲି ଦୋକାନୀମାନେ କୌଣସି ସୂତ୍ରରୁ ଖବର ପାଇବା ପରେ ସେମାନଙ୍କ ମଧ୍ୟରେ ପ୍ରତିକ୍ରିୟା ପ୍ରକାଶ ପାଇଥିଲା। ସେମାନେ ଉଚ୍ଛେଦର ପ୍ରତିବାଦ କରି ଯଦି ଭାଙ୍ଗିବ ୮୮ ଦୋକାନ ଭାଙ୍ଗ ବୋଲି ଦାବି କରିବାରୁ ଉତ୍ତେଜନା ପ୍ରକାଶ ପାଇଥିଲା। ଖବର ଲେଖା ହେବା ପର୍ଯ୍ୟନ୍ତ ଉଚ୍ଛେଦ ପ୍ରକ୍ରିୟା ବନ୍ଦ ରଖି ଆରଆଇ କାର୍ଯ୍ୟାଳୟରେ ଅତିରିକ୍ତ ତହସିଲଦାର ରାଉତ, ଆରଆଇ ନିହାର ରଞ୍ଜନ ଦାସ, ସୁପରଭାଇଜର ଧନେଶ୍ୱର ମାରାଣ୍ଡି ଓ ଚନ୍ଦନ କୁମାର ମହାନ୍ତି ପ୍ରମୁଖ ଆଲୋଚନା ଚଳାଇଥିବା ଜଣାଯାଇଛି।
