ପଟ୍ଟାଙ୍ଗି୯।୧(ଶରତ କୁମାର ଧଳ): ରାଜ୍ୟରେ ଚାଲିଛି ସଡ଼କ ସୁରକ୍ଷା ମାସ କିନ୍ତୁ ଏଠି ନିଜେ ସଚେତନ ହେଉନାହାନ୍ତି ଲୋକେ। ସଚେତନତା କରାଇବା ଦୂରର କଥା ବର୍ଷର ଆରମ୍ଭରୁ ବିଭିନ୍ନ ସ୍ଥାନରେ ଦୁର୍ଘଟଣା ଘଟି ଗୋଟିଏ ପରେ ଗୋଟିଏ ଚାଲିଯାଉଛି ଜୀବନ । ଏହିପରି ଦୃଶ୍ୟ ଦେଖିବାକୁ ମିଳିଛି କୋରାପୁଟ ଜିଲା ପଟ୍ଟାଙ୍ଗି ଥାନା ଅନ୍ତର୍ଗତ କୁନ୍ଦୁଲି ସ୍ଥିତ ଗୁରୁକୂଳ ଆଶ୍ରମ ନିକଟରେ ।
ସୂଚନା ଅନୁସାରେ ସ୍ଥାନୀୟ ବ୍ଲକ୍ ଅଧିନସ୍ଥ ଦେଓଫଟ୍ଟାଙ୍ଗି ପଞ୍ଚାୟତର ସଲପଗୁଡା ଗ୍ରାମର ଗଙ୍ଗାଧର ପାମିୟା ନିଜ ଗ୍ରାମ ତଥା ଘରକୁ ଆସି ଗୁରୁବାର ବିଳମ୍ବିତ ରାତିରେ ସେମିଳିଗୁଡା ଫେରୁଥିବା ସମୟରେ କୈଣସି ଏକ ଅଜଣା ଗାଡ଼ି ପଛପଟରୁ ଧକ୍କା ଦେଇ ଚାଲିଯାଇଥିଲା । ଫଳରେ ଗଙ୍ଗାଧରଙ୍କ ଦୁର୍ଘଟଣାସ୍ଥଳରେ ହିଁ ଜୀବନ ଚାଲିଯାଇଥିଲା । ଖବରପାଇ ପଟ୍ଟାଙ୍ଗି ପୋଲିସ ଘଟଣା ସ୍ଥଳେ ପହଞ୍ଚି ମୃତଦେହ ଜବତ କରିଛି ।
ଏହାସହ ମୃତ ଗଙ୍ଗାଧର ଚଲାଇ ଯାଉଥିବା ମୋଟର ସାଇକେଲ ନଂ OD 10N 6208 କୁ ଜବତ କରି ତଦନ୍ତ ଆରମ୍ଭ କରିଛି । ସୂଚନାଯୋଗ୍ୟକି ମୃତ ଗଙ୍ଗାଧର ସେମିଳିଗୁଡା ସ୍ଥିତ ଏକ କଲେଜରେ ଯୁକ୍ତ ଦୁଇରେ ଦ୍ୱିତୀୟ ବର୍ଷର ଛାତ୍ର ଥିଲେ । ତେବେ ଗଙ୍ଗାଧରଙ୍କ ମୃତ୍ୟୁ ପରେ ଗ୍ରାମରେ ଶୋକର ଛାୟା ଖେଳିଯାଇଛି । ପଞ୍ଚାୟତର ସରପଞ୍ଚ ନରେନ୍ଦ୍ର ବଡନାୟକ ପଟ୍ଟାଙ୍ଗି ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚି ଗଙ୍ଗାଧରଙ୍କ ଶବ ବ୍ୟବଚ୍ଛେଦ କିପରି ହୋଇ ପାରିବ ସେନେଇ ପୋଲିସ୍ ଏବଂ ସ୍ୱାସ୍ଥ୍ୟ ବିଭାଗର ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଛନ୍ତି ।
