ଦାରିଙ୍ଗବାଡି,୨୭।୫(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଥାନା ଅଞ୍ଚଳରେ ଏକ ଗୃହ ନିର୍ମାଣ ସମୟରେ ଏକ ବଡ଼ ଅଘଟଣ ଘଟିଯାଇଛି । ବୁଧବାର ପୂର୍ବାହ୍ନ ୧୧ ଟା ବେଳେ ଗୋଟିଏ ମହଲା ଛାତରୁ ଖସି ଜଣେ ମହିଳା ଶ୍ରମିକଙ୍କ ମୃତ୍ୟୁ ହୋଇଛି । ବ୍ରହ୍ମପୁର ଏମକେସିଜିରେ ଭର୍ତ୍ତି କରାଯାଇଥିବା ବେଳେ ଡାକ୍ତର ମୃତ ଘୋଷଣା କରିଛନ୍ତି । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
ମୃତ ଶ୍ରମିକ ହେଲେ ଗଞ୍ଜାମ ଜିଲା ସୋରଡ଼ା ଥାନା କେନ୍ଦୁପଦର ଗ୍ରାମର ତିଳତୋମା ଗୌଡ଼ (୩୫ )ବୋଲି ଜଣାପଡିଛି । ସେ ବିଦ୍ୟୁତ ସଂସ୍ପର୍ଶରେ ଆସି ଛାତରୁ ଖସି ପଡିଥିବା ଆଶଙ୍କା କରିଯାଉଥିବା ନେଇ ତାଙ୍କ ସମ୍ପର୍କୀୟ ଚନ୍ଦନ ଗୌଡ଼ କହିଛନ୍ତି । ପ୍ରକାଶ ଯେ, ଦାରିଙ୍ଗବାଡିର ଏକ କୋଠା ନିର୍ମାଣ କାର୍ଯ୍ୟରେ ଗଞ୍ଜାମ ଜିଲା କେନ୍ଦୁପଦର ଗ୍ରାମର ତିଳତୋମା ଏବଂ ତାଙ୍କ ସ୍ୱାମୀ ସୁରେନ୍ଦ୍ର ଗୌଡ଼ ଶ୍ରମିକ ଭାବେ କାର୍ଯ୍ୟ କରୁଥିଲେ । ତେବେ ପ୍ରଥମ ମହଲାରେ ତିଳତୋମା କାର୍ଯ୍ୟକାରୁଥିବା ବେଳେ ଏଭଳି ଅଭାବନୀୟ ଘଟଣା ଘଟିଥିଲା । ତେବେ ବିଦ୍ୟୁତ ସଂସ୍ପର୍ଶରେ ଆସି ଥିବା କୁହାଯାଉଥିବା ବେଳେ ଏହି ଅଘଟଣ କିଭଳି ଘଟିଛି ତାର ତଦନ୍ତ ଦାରିଙ୍ଗବାଡି ଆଇଆଇସି ସଂଗ୍ରାମ କେଶରୀ ଜେନା କରୁଥିବା ଜଣାପଡିଛି ।
ଚିକିତ୍ସା କରୁଥିବା ଡାକ୍ତର ରାକେଶ କୁମାର ସ୍ୱାଇଁ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ତିଳତୋମାଙ୍କୁ ଗୁରୁତର ଅବସ୍ଥାରେ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲା । ତାଙ୍କର ମୁଣ୍ଡରେ ଶକ୍ତ ଆଘାତ ଯୋଗୁଁ ଅଚେତ ଅବସ୍ଥାରେ ଥିଲେ ଓ ରକ୍ତଚାପ ମଧ୍ୟ ଅଧିକା ଥିଲା । ପ୍ରାଥମିକ ଚିକିତ୍ସା ପରେ ତାଙ୍କୁ ଅଧିକା ଚିକିତ୍ସା ପାଇଁ ଅନ୍ୟତ୍ର ନେବାକୁ ସେ ପରାମର୍ଶ ଦେଇଥିଲେ । ତେବେ ପରିବାର ଲୋକ ଦାରିଙ୍ଗବାଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରୁ ବ୍ରହ୍ମପୁର ଏମକେସିଜିରେ ଭର୍ତ୍ତି କରିଥିଲେ । ସେଠାରୁ ଡାକ୍ତର ତାଙ୍କୁ ଭୁବନେଶ୍ୱର ଏମ୍ସକୁ ନେବାକୁ ପରାମର୍ଶ ଦେଇଥିଲେ । ଏମ୍ସ ନେବାକୁ ପ୍ରସ୍ତୁତି ଚାଲିଥିବା ବେଳେ ତିଳତୋମାଙ୍କ ମୃତ୍ୟୁ ହୋଇଯାଇଥିଲା ବୋଲି ସମ୍ପର୍କୀୟ ଚନ୍ଦନ କହିଛନ୍ତି । ଘଟଣାକୁ ନେଇ ପୋଲିସ ଏବଂ ବିଦ୍ୟୁତ ବିଭାଗ ପକ୍ଷରୁ ତଦନ୍ତ ଆରମ୍ଭ ହୋଇଥିବା ବେଳେ ଏନେଇ ବ୍ରହ୍ମପୁରରେ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର ହେବ ବୋଲି ଜଣାପଡିଛି ।
