ଭୁବନେଶ୍ୱର,୨୭ା୫(ରବିନାରାୟଣ ଜେନା) ରାଜ୍ୟରେ କେଉଁ ବିଧାୟକଙ୍କ ପ୍ରଦର୍ଶନ ସର୍ବୋତ୍ତମ ତାହାକୁ ଓଡ଼ିଶା ବିଧାନସଭା ଖୁବ୍ଶୀଘ୍ର ଲୋକଲୋଚନକୁ ଆଣିବ। ଦୀର୍ଘ ୧୦ ବର୍ଷ ଧରି ବନ୍ଦ ରହିଥିବା ଏହି ପ୍ରକ୍ରିୟାକୁ ବିଧାନସଭା ପକ୍ଷରୁ ପୁନର୍ବାର ଆପଣାଯାଇଛି ବୋଲି ଜଣେ ବରିଷ୍ଠ ବିଧାୟକ କହିଛନ୍ତି।
ସୂଚନା ଅନୁଯାୟୀ, ପ୍ରତିବର୍ଷ କେଉଁ ବିଧାୟକ ଗୃହରେ ଉତ୍ତମ ପ୍ରଦର୍ଶନ କରିଛନ୍ତି, ଯେପରିକି ଉପସ୍ଥାନଠାରୁ ଆରମ୍ଭକରି ରାଜ୍ୟର ବିକାଶ ଲାଗି ଗଠନମୂଳକ ପ୍ରସ୍ତାବ ଦେବା ପରି ଅନ୍ୟାନ୍ୟ ପ୍ରସଙ୍ଗକୁ ଗୁରୁତ୍ୱ ଦିଆଯିବ। ଏହି ପ୍ରକ୍ରିୟା ୨୦୦୨ରୁ ପ୍ରଚଳିତ ହୋଇଆସୁଥିବାବେଳେ ୨୦୧୬ ପରେ ବନ୍ଦ ରହିଥିଲା। ଏବେ ଏହାକୁ ପୁନର୍ବାର କାର୍ଯ୍ୟକାରୀ କରିବା ଲାଗି ବାଚସ୍ପତି ସୁରମା ପାଢ଼ୀଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇଛି। କମିଟିରେ ଉପବାଚସ୍ପତି ଭବାନୀ ଶଙ୍କର ଭୋଇ, ଭାଜପା ସଦସ୍ୟ ଜୟନାରାୟଣ ମିଶ୍ର, ଭାସ୍କର ମଢ଼େଇ, ପୂର୍ବତନ ସଦସ୍ୟ ଅରବିନ୍ଦ ଢାଲି, ଅମର ପ୍ରସାଦ ଶତପଥୀ ଏବଂ ବରିଷ୍ଠ ଖବରଦାତା ରାଜାରାମ ଶତପଥୀ ସଭ୍ୟ ରହିଛନ୍ତି। ଏହି କମିଟି ପକ୍ଷରୁ ଖୁବ୍ଶୀଘ୍ର ଏକ ବୈଠକ ବସିବ। ବୈଠକରେ ୨୦୧୬ ପରଠାରୁ ଅଦ୍ୟାବଧି ଯେଉଁ ବିଧାୟକମାନେ ବିଭିନ୍ନ କ୍ଷେତ୍ରରେ ଉତ୍ତମ ପ୍ରଦର୍ଶନ କରିଛନ୍ତି ସେମାନଙ୍କୁ ପୁରସ୍କୃତ କରାଯିବ। ଏନେଇ ସୋମବାର ବିଧାନସଭା ପକ୍ଷରୁ ଏକ ବିଜ୍ଞପ୍ତି ଜାରି ହୋଇଛି। ବିଜ୍ଞପ୍ତିରେ ବିଧାନସଭା ସଚିବ ସତ୍ୟବ୍ରତ ରାଉତ ଦର୍ଶାଇଛନ୍ତି, ଓଡ଼ିଶା ବେଷ୍ଟ ଲେଜିସ୍ଲେଟର ଆଓ୍ବାର୍ଡ ନିୟମ-୨୦୦୨ ଅନୁଯାୟୀ, ଉକ୍ତ କମିଟି ଶ୍ରେଷ୍ଠ ବିଧାୟକ ବାଛିବ। ଏଥିପାଇଁ ପ୍ରତିବର୍ଷ ବିଧାୟକଙ୍କ ରେକର୍ଡ ଅନୁଧ୍ୟାନ କରାଯିବ ବୋଲି ଜଣାପଡ଼ିଛି।
Dharitri – Odisha’s No.1 Odia Daily
