ଗଜପତି,୨୭।୫(ଗିରିଧାରୀ ପରିଛା): ଗଜପତି ଜିଲା ପାରଳାଖେମୁଣ୍ଡି ଠାରେ ପେଟ୍ରୋଲ ଓ ଡିଜେଲର ବର୍ଦ୍ଧିତ ଦର ପ୍ରତିବାଦରେ ଆଜି ବିଜେଡି ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି । ଜିଲା ସଭାପତି ପ୍ରଦୀପ ନାୟକଙ୍କ ଅଧ୍ୟକ୍ଷତାରେ ପାରଳାଖେମୁଣ୍ଡି ଜଙ୍ଗମ ସାହି ନିକଟସ୍ଥ ଇଣ୍ଡିଆନ ପେଟ୍ରୋଲ ପଙ୍କ ସାମ୍ନାରେ ବିଜେଡି ନେତା ଓ କର୍ମୀ ଟାୟାର ଜାଳି ରାସ୍ତାରୋକ କରିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି।
ସେମାନଙ୍କ ଅଭିଯୋଗ ଅନୁସାରେ, ପେଟ୍ରୋଲ ଡିଜେଲର ବର୍ଦ୍ଧିତ ଦର ହେତୁ ସାଧାରଣ ଓ ମଧ୍ୟବିତ୍ତ ପରିବାର ଅଣ ନିଶ୍ୱାସ ହେଲେଣି । କ୍ରମାଗତ ଭାବେ ଦୈନନ୍ଦିନ ବ୍ୟବହୃତ ସାମଗ୍ରୀ ଆକାଶ ଛୁଆଁ ଦର ହେଲାଣି । ଆଗକୁ ସାଧାରଣ ଲୋକ ବଞ୍ଚିବାର କଷ୍ଟକର ବ୍ୟାପାର ହେବ।ଲୋକଙ୍କ ସରକାର କହି କ୍ଷମତାକୁ ଆସି ରାଜ୍ୟ ଓ କେନ୍ଦ୍ରରେ ସରକାର ଗଠନ କରି ଲୋକଙ୍କୁ ଭୁଆ ବୁଲାଉଛନ୍ତି ଏହି ସରକାର।
ଆଗାମୀ ଦିନରେ ପେଟ୍ରୋଲ ଦରଦାମରେ ନିୟନ୍ତ୍ରଣ ନଆସିଲେ ବିଜେଡି ରାଜରାସ୍ତାକୁ ଓହ୍ଲାଇ ଜୋରଦାର ଆନ୍ଦୋଳନ କରିବ ବୋଲି ଚେତାବନୀ ଦେଇଛନ୍ତି ଜିଲା ସଭାପତି ପ୍ରଦୀପ ନାୟକ, ନଗର ସଭାପତି ସୁଧୀରଞ୍ଜନ ମହାପାତ୍ର, ମହିଳା ନଗର ସଭାପତି ତନୁଜା ଶତପଥୀ, ଲଷ୍ମୀକାନ୍ତ ପରିଛା ପ୍ରମୁଖ।
