କେନ୍ଦୁଝର,୨୭।୫ (ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ସଦର ବ୍ଲକରେ ତାଣ୍ତବ ରଚିଛି କାଳବୈଶାଖୀ । ବୁଧବାର ସନ୍ଧ୍ୟାରେ ଜୋରରେ ପବନ ହେବାରୁ ପନିପରିବା ଫସଲ ସମେତ ଗଛ ଉପୁଡିଵା ସହ ଘର ଦ୍ବାର ବ୍ୟାପକ କ୍ଷୟକ୍ଷତି ହୋଇଛି । ୨୦ ନମ୍ବର ଜାତୀୟ ରାଜପଥ ପାର୍ଶ୍ବ ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପାଚେରୀ ନିକଟରେ ଥିବା ଏକ ଚାଖୁଣ୍ତା ଗଛ ଡାଳ ବାଇକ୍ ଏବଂ ଏକ ସ୍କୁଟି ଉପରେ ପଡିଛି । ଫଳରେ ଉଭୟ ଗାଡି ଭାଙ୍ଗିରୁଜି ଯାଇଛି ।
ବିଦ୍ୟୁତ୍ ତାର ଛିଣ୍ତି ତଳେ ପଡିଵାରୁ ବିଦ୍ୟୁ୍ତ୍ ସରବରାହ ବିଚ୍ଛିନ୍ନ ହୋଇଛି । ନୂଆଗାଁ ପଞ୍ଚାୟତ ହାତୀକୁଚା ଗାଁରେ ଜାମୁଗଛ ଡାଳପଡି ଜଣେ ବୃଦ୍ଧା ଗୁରୁତର ହୋଇଛନ୍ତି । ଗୁରୁତର ହେଲେ ରାମଚନ୍ଦ୍ର ମହାନ୍ତଙ୍କ ସ୍ତ୍ରୀ ଉମାମଣି ମହାନ୍ତ(୬୨)। ଛେଳି ଚରାଇ ସାରି ଫେରୁଥିବାବେଳେ ପ୍ରବେଶ ପଥର ବାଉଁଶ ବାଡ ଖୋଲୁଥିବାବେଳେ ଏକ ଜାମୁଗଛ ଡାଳ ତାଙ୍କ ଉପରେ ପଡିଯାଇଥିଲା।ତାଙ୍କୁ ତୁରନ୍ତ ୧୦୮ ଆମ୍ବୁଲାନ୍ସ ଯୋଗେ କେନ୍ଦୂଜର ଧରଣୀଧର ମେଡିକାଲ କଲେଜକୁ ଅଣାଯାଇଛି। ଜିଲା ପ୍ରଶାସନ ପକ୍ଷରୁ ସରକାରୀ ସହାୟତା ଯୋଗାଇ ଦେବାକୁ ପୁଅ ଚକ୍ରଧର ମହାନ୍ତ ଦାବି କରିଛନ୍ତି ।
ନରସିଂହପୁର ଗାଁର ଛଟରାୟ ମୁଣ୍ତା ଙ୍କ ମାଟିଘର ଆଜବେଷ୍ଟର ପବନରେ ଉଡିଯାଇଛି ।ପାଣିରେ ବତୁରି ଧାନଚାଉଳ ଅବାସପତ୍ର ଆଦି ନଷ୍ଟ ହୋଇ ଯାଇଛି। ସରକାରୀ ସହାୟତା ଯୋଗାଇଦେବାକୁ ଛଟରାୟ ଦାବି କରିଛନ୍ତି । ସେହିପରି ପୁର୍ଣ୍ଣଚନ୍ଦ୍ର ମହାକୁଡଙ୍କ ଘର ଉପରେ ଏକ ଗଛ ପଡିଯାଇଥିବାଳେ ଘର ଭାଙ୍ଗି ଯାଇଛି । ତେବେ ପରିବାର କାହାରି କୈାଣସି କ୍ଷୟକ୍ଷତି ଘଟିନଥିବା ଜଣାପଡିଛି। ପବନରେ ମହଦେଇଯୋଡା ୟୁପି ସ୍କୁଲ ନିକଟରେ ଥିବା ବଡ ଆମ୍ବଗଛ ଗୁଡିକ ଉପୁଡି ପଡିଛି। ପାସେଞ୍ଜର ଅଟୋ ଉଡିଯାଇଥିବାବେଳେ ଉଦ୍ଧାର କରାଯାଇଛି ।ସଲରାପଣ୍ଠ ଗାଁରେ ଏକ ବିରାଟ ଆମ୍ବଗଛ ଉପୁଡିପଡି ଘର ଉପରେ ପଡିଥିଲା। ସୈାଭାଗ୍ୟ ବସତଃ କାହାରି କୈାଣସି କ୍ଷୟକ୍ଷତି ଘଟିନାହିଁ ।
କେନ୍ଦୁଝର ଅଗ୍ନିଶମ ବିଭାଗ କର୍ମଚାରୀ ଘଟଣା ସ୍ଥଳରେ ପହଞ୍ଚି ଗଛକାଟି ସଫା ଜାରି ରଖିଥିଲେ।ଖବର ପାଇ ସଦର ତହସିଲଦାର ସୁଭେନ୍ଦୁ କୁମାର ସାହୁ ଘଟଣା ସ୍ଥଳରେ ପହଞ୍ଚି କ୍ଷୟକ୍ଷତି ଆକୋଳନ ଥିଲେ। ମହାନ୍ତସାହିର ରାସ୍ତା ଉପରେ ଏକ ବିରାଟ ଆମ୍ବଗଛ ପଡିଥିଲା। ଗ୍ରାମବାସୀ ସଫେଇ କାର୍ଯ୍ୟ ଜାରି ରଖିଛନ୍ତି । କେନ୍ଦୁପଶି ଗାଁର ରାମଚନ୍ଦ୍ର ମୁଣ୍ତାଙ୍କ ଘର ନିକଟରେ ଥିବା ଏକ ଡେଉଚ ଗଛ ଭାଙ୍ଗି ଡାଳପଡି ଗାଁକୁ ସଂଯୋଗୀ ବିଦ୍ୟୁତ୍ ତାର ଛିଣ୍ତି ତଳେ ପଡିଥିବାବେଳେ ବିଦ୍ୟୁତ୍ ସରାବରାହ ବିଛିନ୍ନ ହୋଇଛି ।
ଅନ୍ୟପଟେ କାଦଗଡ, ନୂଆଗାଁ, ହାତୀକୁଚା, ଭାଟୁଣିଆଁ, ଟିକରପଡା, ପଦ୍ମପୁର, ବରଦାପାଳ, ମୁକୁନା, ବାଉରୀପଦା, ଗୋବର୍ଦ୍ଧନ, ବଣୁଆଁ, ପଳାଶପଙ୍ଗା, ମୁରୁସୁଆଁ, ପର୍ଜନପୁର, ସରାସକେଲା, ବଉଳମାଳ, ସିଲିସୁଆଁ, ପୋଇପାଣି, କୁସୁମିତା, ତଳକମ୍ପଡିହି, ଉପରକମ୍ପଡିହି, ସକରାପଣ୍ଠ ଆଦି ଅଞ୍ଚଳରେ ବ୍ୟାପକ ପନିପରିବା ଘରଦ୍ବାର କ୍ଷୟକ୍ଷତି ଘଟିଛି ।
