ଦାରିଙ୍ଗବାଡି, ୫।୧ (ଅରୁଣ ସାହୁ ):ଓଡିଶାର କଶ୍ମୀର ଦାରିଙ୍ଗବାଡିରେ ଆସନ୍ତା ୮ରେ ଶୀତ ମହୋତ୍ସବର ଆରମ୍ଭ ହେବାକୁ ଯାଉଛି। ଏଥିପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଥିବା ବିଡ଼ିଓ ତଥା ମହୋତ୍ସବ କମିଟିର ସମ୍ପାଦକ ପ୍ରୀତିରଞ୍ଜନ ରଥ ସୂଚନା ଦେଇଛନ୍ତି। ଆଇନ ଶୃଙ୍ଖଳାର ତଦାରଖକୁ ପ୍ରଶାସନ ଅଧିକା ଗୁରୁତ୍ୱ ଦେଇଛି। ବିଡ଼ିଓ ପ୍ରୀତିରଞ୍ଜନ ରଥଙ୍କ ନେତୃତ୍ୱରେ ମହୋତ୍ସବ ପଡିଆରେ ଦାରିଙ୍ଗବାଡି ଥାନା ଅଧିକାରୀ ତଥା ଡ଼ିଏସପି କନକ ମାଝୀ, ଅତିତିକ୍ତ ଥାନା ଅଧିକାରୀ ସଂଗ୍ରାମ କେଶରୀ ଜେନା ପ୍ରମୁଖ ପରିଦର୍ଶନ କରି ଜନ ଗହଳିକୁ କିଭଳି ନିୟନ୍ତ୍ରଣ ସହ ଦର୍ଶକ କିଭଳି ଭଲ ଭାବେ ଶୀତ ମହୋତ୍ସବର ମଜା ନେଇପାରିବେ। ଗାଡି ପାର୍କିଂ ସମେତ ଲୋକଙ୍କ ଭିଡରେ କିଭଳି କେଉଁ ରାସ୍ତା ଦେଇ ପ୍ରବେଶ କରିବେ ଓ ପ୍ରସ୍ଥାନ କରିବେ ସେନେଇ ବୁଲି ଦେଖିଥିଲେ। ସେହିପରି ମହୋତ୍ସବ ପଡିଆରେ ଲୋକଙ୍କ ପାଇଁ ପୋଲିସ ପକ୍ଷରୁ ଆସ୍ଥାୟୀ ଆଇନସେବା ବା ସହାୟତା ଯୋଗାଇ ଦିଆଯିବ। ସେଥିପାଇଁ ସ୍ଥାନ ଚୟନ ସହ ଜରୁରୀକାଳୀନ ସ୍ବାସ୍ଥ୍ୟସେବା ଓ ଅଗ୍ନିଶମ ବିଭାଗ ପାଇଁ ଅସ୍ଥାୟୀ କ୍ୟାମ୍ପ ପାଇଁ ସ୍ଥାନ ନିରୂପଣ କରାଯାଇଛି । ୮ରୁ ୧୧ ପର୍ଯ୍ୟନ୍ତ ୪ ଦିନ ଧରି ପ୍ରବଳ ଜନସାମାବେଶ ହେବ ଭିଡ଼ର ସ୍ଥିତିକୁ ନିୟନ୍ତ୍ରଣ ପାଇଁ ବ୍ୟାପକ ପୋଲିସ ମୃତୟନ ଆଦିକୁ ଗୁରୁତ୍ୱ ଦିଆଯାଇଛି ବୋଲି ବିଡ଼ିଓ କହିଛନ୍ତି। ଡିଏସପି କନକ ମାଝୀ ଏବଂ ଅତିରିକ୍ତ ଥାନା ଅଧିକାରୀ ସଂଗ୍ରାମ କେଶରୀ ଜେନା ମହୋତ୍ସବ ପଡିଆକୁ ସମ୍ପୂର୍ଣ୍ଣ ବୁଲି ଅନୁଧ୍ୟାନ କରି ଫେରିଛନ୍ତି।
Dharitri – Odisha’s No.1 Odia Daily
