ପଦ୍ମପୁର, ୬।୧୨(ପ୍ରଦୀପ୍ତ ଦାଶ):ବରଗଡ଼ ଜିଲା ପଦ୍ମପୁର ଉପଖଣ୍ଡରେ ମଣ୍ଡି ଖୋଲିବାର ସପ୍ତାହେ ବିତିଯାଇଛି, ମାତ୍ର ଚାଷୀଙ୍କ ପାଖରେ ଟୋକନ ପହଞ୍ଚି ପାରି ନ ଥିବାରୁ ଉପଖଣ୍ଡର ୯୨ମଣ୍ଡିରୁ ୫୪ମଣ୍ଡିରେ ଏପର୍ଯ୍ୟନ୍ତ ଧାନ ବସ୍ତାଏ ବି ପଡିନାହିଁ। ଅପରପକ୍ଷରେ ପଦ୍ମପୁର ଅଞ୍ଚଳର ମିଲର୍ସମାନେ ଏ ପର୍ଯ୍ୟନ୍ତ ସରକାରଙ୍କ ପାଖରେ ଚୁକ୍ତିନାମା କରି ନ ଥିବା ଜଣାପଡିଛି। ପଦ୍ମପୁର ନିୟନ୍ତ୍ରିତ ବଜାର କମିଟି (ଆର୍ଏମ୍ସି)ର ସୂଚନାରୁ ପ୍ରକାଶ, ଉପଖଣ୍ଡର ୩୮ମଣ୍ଡିରେ ୫୩ ହଜାର ୫୪୩ ପେକେଟ ଧାନ ପଡିଛି। ସେଥିମଧ୍ୟରୁ କେବଳ ସୋହେଲା ବ୍ଲକ ସରକଣ୍ଡା ମଣ୍ଡିରୁ ୩ ଜଣ ଚାଷୀଙ୍କ ୨୮୦ପେକେଟ ଧାନ ବିକ୍ରି ହୋଇଥିବା ଆର୍ଏମ୍ସି ସମ୍ପାଦକ ରବିନାରାୟଣ ପଣ୍ଡା ସୂଚନା ଦେଇଛନ୍ତି। ଅପରପକ୍ଷରେ ବର୍ତ୍ତମାନ ଟୋକନ ଟେନସନ ଯୋଗୁ ଚାଷୀ ଅସନ୍ତୋଷ ସୃଷ୍ଟି ହୋଇଛି। ବର୍ତ୍ତମାନ ସୁଦ୍ଧା ୯୫ ପ୍ରତିଶତ ଚାଷୀଙ୍କ ପାଖକୁ ଟୋକନ ଆସିନାହିଁ। ସେମାନେ ବାରମ୍ବାର ପ୍ରାଥମିକ କୃଷି ସମବାୟ କେନ୍ଦ୍ରକୁ ଦୌଡୁଛନ୍ତି। ମାତ୍ର ଏ ସମ୍ପର୍କରେ ସେମାନଙ୍କ ପାଖରେ ତଥ୍ୟ ନ ଥିବା ଉତ୍ତର ମିଳୁଛି। ସରକାରଙ୍କ ପ୍ରଦତ୍ତ କୃଷି ସହାୟକ ପୋର୍ଟାଲର ହେଲ୍ପ ଲାଇନ ନମ୍ବରକୁ କଲ କଲେ ମଧ୍ୟ ତଥ୍ୟ ମିଳୁ ନ ଥିବା ଚାଷୀମାନେ କହିଛନ୍ତି। ଚାଷୀମାନେ ବାଧ୍ୟ ହୋଇ ସେମାନଙ୍କ ଧାନକୁ ରାସ୍ତା କଡରେ କ୍ଷେତରେ ଗଦାକରି ରଖି ଟୋକନକୁ ଚାହିଁ ରହିଛନ୍ତି।
Dharitri – Odisha’s No.1 Odia Daily
