ମୁମ୍ବାଇ,୪ା୧୨: ଭାରତୀୟ ଦଳର ପୂର୍ବତନ ମୁଖ୍ୟ କୋଚ୍ ରବି ଶାସ୍ତ୍ରୀ ଦୁଇ ବରିଷ୍ଠ ଖେଳାଳି ବିରାଟ କୋହଲି ଓ ରୋହିତ ଶର୍ମାଙ୍କୁ ହଇରାଣ କରୁଥିବା ତଥା ସେମାନଙ୍କ ଫର୍ମ ଓ ଭବିଷ୍ୟତ ଉପରେ ପ୍ରଶ୍ନ ଉଠାଉଥିବା ସମାଲୋଚକମାନଙ୍କ ଉପରେ ତୀବ୍ର ବର୍ଷିଛନ୍ତି। ଏକ ସାକ୍ଷାତକାରରେ ଶାସ୍ତ୍ରୀ ଏହି ‘ଉଦ୍ଦେଶ୍ୟମୂଳକ ସମସ୍ୟା ସୃଷ୍ଟିକାରୀ’ମାନଙ୍କୁ କଡ଼ା ଚେତାବନୀ ଦେଇଛନ୍ତି।
ଶାସ୍ତ୍ରୀ କହିଛନ୍ତି, “ବିରାଟ କୋହଲି ଏବଂ ରୋହିତ ଶର୍ମା ହେଉଛନ୍ତି ଦିନିକିଆର ବିଶାଳ ଖେଳାଳି। ଆପଣ ସେଭଳି ଖେଳାଳିଙ୍କ କ୍ୟାରିୟରରେ ହସ୍ତକ୍ଷେପ କରନ୍ତୁ ନାହିଁ ବା ସେମାନଙ୍କୁ ହଇରାଣ କରନ୍ତୁ ନାହିଁ।”
ଟେଷ୍ଟ ଏବଂ ଟି20 ରୁ ଉଭୟ ଅବସର ନେଇଥିବା ବେଳେ ୨୦୨୭ ବିଶ୍ୱକପ୍କୁ ନେଇ ସେମାନଙ୍କ ଦିନିକିଆ ଭବିଷ୍ୟତ ଉପରେ ଚାଲିଥିବା ଚର୍ଚ୍ଚାକୁ ଶାସ୍ତ୍ରୀ କଡ଼ା ସମାଲୋଚନା କରିଛନ୍ତି।
‘କିଏ ସେମାନଙ୍କୁ ହଇରାଣ କରୁଛି’ ବୋଲି ପ୍ରଶ୍ନ ହେବାରୁ ଶାସ୍ତ୍ରୀ କହିଥିଲେ, “କିଛି ଲୋକ କରୁଛନ୍ତି, ମୁଁ କେବଳ ଏତିକି କହିବି। ଏଭଳି ଖେଳାଳିଙ୍କ ସହିତ ଆପଣ ମସ୍ତି କର ନାହିଁ।”
ସେ ଆହୁରି ମଧ୍ୟ କହିଥିଲେ, “ଯଦି ସେମାନଙ୍କର (କୋହଲି ଓ ରୋହିତଙ୍କ) ମୁଣ୍ଡ ଠିକ୍ ହୋଇଯାଏ ଏବଂ ସେମାନେ ସଠିକ୍ ବଟନ୍ ଦବାଇ ଦିଅନ୍ତି, ତେବେ ଏହି ସମସ୍ତ ହଇରାଣ କରୁଥିବା ଲୋକ ବହୁତ ଶୀଘ୍ର ଦୃଶ୍ୟରୁ ହଜିଯିବେ।” ୨୦୨୭ ଦିନିକିଆ ବିଶ୍ୱକପ୍ରେ ଉଭୟଙ୍କ ଚୟନ ପାଇଁ ଘରୋଇ ଦିନିକିଆ କ୍ରିକେଟ୍ ଖେଳିବାକୁ ପଡ଼ିବ ବୋଲି ସମାଲୋଚକମାନେ ମତ ଦେଉଛନ୍ତି।
ଖବର ଅନୁଯାୟୀ, ଅଜିତ ଅଗରକରଙ୍କ ନେତୃତ୍ୱରେ ଥିବା ଚୟନ କମିଟି ଏବଂ ଟିମ୍ ମ୍ୟାନେଜ୍ମେଣ୍ଟକୁ ଶାସ୍ତ୍ରୀ ଏହି ବାର୍ତ୍ତା ଦେଇଛନ୍ତି ଯେ ପ୍ରମାଣିତ ମ୍ୟାଚ୍ ବିଜେତାମାନଙ୍କୁ ସମର୍ଥନ ଦିଆଯାଉ। ରୋହିତ ‘ବିଜୟ ହଜାରେ ଟ୍ରଫି’ ଖେଳିବାକୁ ରାଜି ହୋଇଥିବା ବେଳେ ବିରାଟ କୋହଲିଙ୍କୁ ଚୟନକର୍ତ୍ତାଙ୍କ ବୁଝାମଣା ପରେ ଘରୋଇ କ୍ରିକେଟ୍କୁ ଫେରିବାକୁ ପଡ଼ିଛି।
