ରାୟଗଡ଼ା,୨୨।୯(ଆଶିଷ ରଞ୍ଜନ ପଣ୍ଡା): ରାୟଗଡ଼ା ପୌର ପରିଷଦ ଉପାଧ୍ୟକ୍ଷା ଶୁଭ୍ରା ପଣ୍ଡାଙ୍କ ବିରୋଧରେ ଆସିଥିବା ଅନାସ୍ଥା ପ୍ରସ୍ତାବ ଘଟଣାରେ ଆସନ୍ତା ଅକ୍ଟୋବର ୯ ତାରିଖରେ ଭୋଟିଂ ପାଇଁ ସୋମବାର ନୋଟିସ ଜାରି ହୋଇଛି। ଜିଲାପାଳଙ୍କ କାର୍ଯ୍ୟାଳୟ ତରଫରୁ ପୌର ପରିଷଦରେ ଥିବା ସମସ୍ତ ୨୪ ଜଣ କାଉନସିଲରଙ୍କୁ ଏହି ନୋଟିସ ଜାରି ହୋଇଛି। ଗତ ୨୦ ତାରିଖରେ କାଉନସିଲରମାନଙ୍କ ଦସ୍ତଖତ ଯାଞ୍ଚ କରାଯାଇଥିଲା। ଉପଜିଲାପାଳ କାର୍ଯ୍ୟାଳୟରେ ଏହି ଯାଞ୍ଚ ହୋଇଥିଲା। ଜିଲାପାଳ ଆଶୁତୋଷ କୂଲକର୍ଣୀଙ୍କ ନିର୍ଦ୍ଦେଶ କ୍ରମେ ଉପଜିଲାପାଳ ରମେଶ କୁମାର ଜେନା ଦସ୍ତଖତ ଯାଞ୍ଚ କରି ରିପୋର୍ଟ ଦାଖଲ କରିଥିଲେ। ଏହି ଯାଞ୍ଚ ପ୍ରକ୍ରିୟା ରିପୋର୍ଟ ଦାଖଲ ପରେ ଅନାସ୍ଥା ଭୋଟିଂ ପାଇଁ ନୋଟିସ ଜାରି ହୋଇଥିବା ଜଣାପଡିଛି। ପ୍ରକାଶ ଥାଉକି ଦସ୍ତଖତ ଯାଞ୍ଚ ବେଳେ ଅନାସ୍ଥା ଆଣିଥିବା ୧୯ ଜଣ କାଉନସିଲର ମଧ୍ୟରୁ ୧୮ ଜଣ କାଉନସିଲର ଉପସ୍ଥିତ ରହି ଉପଜିଲାପାଳଙ୍କୁ ନିଜର ଦସ୍ତଖତ ଦେଇଥିଲେ। ସେମାନେ ଲିଖିତ ଅନାସ୍ଥା କାଗଜରେ ଦେଇଥିବା ଦସ୍ତଖତ ସହିତ ଦସ୍ତଖତ ମେଳ କରାଯାଇଥିଲା। ସମସ୍ତ ଦସ୍ତଖତ ମେଳ ହେବାପରେ ଉପାଧ୍ୟକ୍ଷା ବିରୋଧରେ ଅନାସ୍ଥା ପାଇଁ ଭୋଟିଂ ହେବ। ଦସ୍ତଖତ ଯାଞ୍ଚ ବେଳେ କେବଳ ୨୨ ନମ୍ବର ୱାର୍ଡର କାଉନସିଲର ପି. ରବି ଅନୁପସ୍ଥିତ ଥିବା ଯୋଗୁଁ ଦସ୍ତଖତ ଯାଞ୍ଚ ହୋଇନଥିଲା। ପୌର ପରିଷଦ ତରଫରୁ ସମସ୍ତ ୨୪ ଜଣ କାଉନସିଲରଙ୍କୁ ଅବଗତ କରାଯିବ ବୋଲି ନିର୍ବାହୀ ଅଧିକାରୀ କୁଲଦୀପ କୁମାର କହିଛନ୍ତି। ପୂର୍ବତନ ମନ୍ତ୍ରୀ ଲାଲବିହାରୀ ହିମରିକା ଏବଂ ପୂର୍ବତନ ସାଂସଦ ଏନ. ଭାସ୍କର ରାଓ ବିଜେଡ଼ି ଛାଡିବା ପରେ ଗତ ୧୨ ତାରିଖରେ ୧୯ ଜଣ କାଉନସିଲର ଉପାଧ୍ୟକ୍ଷା ଶୁଭ୍ରା ପଣ୍ଡାଙ୍କ ବିରୋଧରେ ଅନାସ୍ଥା ପ୍ରସ୍ତାବ ଦାଖଲ କରିଥିଲେ। ଏହାପରେ ବୁଧବାର ଦିନ ଶୁଭ୍ରା ପଣ୍ଡା ଜିଲ୍ଲାପାଳଙ୍କୁ ଭେଟି ତାଙ୍କ ବିରୁଦ୍ଧରେ ଅଣାଯାଇଥିବା ଅନାସ୍ଥା ପ୍ରସ୍ତାବ ଅନୁଧ୍ୟାନ କରିବା ପାଇଁ ଅନୁରୋଧ କରିଥିଲେ। ଏଥିସହ ପୌର ପରିଷଦରେ ଅନିୟମିତତା ଅଭିଯୋଗ ମଧ୍ୟ ସେ ଆଣିଥିଲେ। ବର୍ତ୍ତମାନ ବିଜେଡି ଦଳ ପାଇଁ ଏହି ବିବାଦ ଆଗାମୀ ଦିନରେ ଜଟିଳ ପରିସ୍ଥିତିରେ ପକାଇପାରେ ବୋଲି ରାଜନୈତିକ ସମୀକ୍ଷକ ମତ ପ୍ରକାଶ କରିଛନ୍ତି।
