କୋଲକାତା,୧୯ା୪: ସ୍ପିନରଙ୍କ ଯାଦୁଗରି ବୋଲିଂ ପରେ ରିଙ୍କୁ ସିଂଙ୍କ ଅର୍ଦ୍ଧଶତକୀୟ ଇନିଂସ ବଳରେ କୋଲକାତା ନାଇଟ୍ ରାଇଡର୍ସ (କେକେଆର) ରବିବାର ଖେଳାଯାଇଥିବା ଆଇପିଏଲ୍ ମ୍ୟାଚ୍ରେ ରାଜସ୍ଥାନ ରୟାଲ୍ସ (ଆର୍ଆର୍)କୁ ୪ ଉଇକେଟରେ ପରାସ୍ତ କରିଛି। ଏହା କୋଲକାତା ପାଇଁ ସପ୍ତମ ମ୍ୟାଚ୍ରେ ପ୍ରଥମ ବିଜୟ ହୋଇଥିବା ବେଳେ ରାଜସ୍ଥାନ ଲାଗି ଷଷ୍ଠ ମ୍ୟାଚ୍ରେ ଦ୍ୱିତୀୟ ପରାଜୟ।
ଅଷ୍ଟ୍ରେଲିଆର ପୂର୍ୱତନ ଅଧିନାୟକ ଆଲାନ ବର୍ଡର ଐତିହାସିକ ଇଡେନ ଗାର୍ଡେନ୍ସ ବେଲ ବଜାଇ ଏହି ମ୍ୟାଚ୍ ଆରମ୍ଭ କରିଥିଲେ। ଏହି ଅବସରରେ ପୂର୍ୱତନ ଭାରତୀୟ ଅଧିନାୟକ ତଥା କ୍ରିକେଟ ଆସୋସିଏଶନ ଅଫ୍ ବେଙ୍ଗଲ (ସିଏବି) ମୁଖ୍ୟ ସୌରଭ ଗାଙ୍ଗୁଲି ଉପସ୍ଥିତ ଥିଲେ।
ଜିତି ବ୍ୟାଟିଂ କରିଥିବା ରାଜସ୍ଥାନକୁ ଯଶସ୍ୱୀ ଜୟସ୍ୱାଲ ଓ ବୈଭବ ସୂର୍ଯ୍ୟବଂଶୀ ବିସ୍ଫୋରକ ଆରମ୍ଭ ପ୍ରଦାନ କରିଥିଲେ। ଦୁହେଁ ପାଓ୍ୱାରପ୍ଲେରେ ୬୩ ରନ କରିବା ସହ ପ୍ରଥମ ଉଇକେଟରେ ୮.୪ ଓଭରରେ ୮୧ ରନ ଯୋଡ଼ିଥିଲେ। ବୈଭବ ୨୮ ବଲରେ ୪୬ (୬ ଚୌକା ଓ ୨ ଛକା) ଓ ଜୟସ୍ୱାଲ ୨୯ ବଲରେ ୩୯ (୪ ଚୌକା ଓ ୨ ଛକା) ରନ କରି ଆଉଟ୍ ହୋଇଥିଲେ। ଦୁଇ ଓପନର ଆଉଟ୍ ହେବା ସହ କୋଲକାତାର ସ୍ପିନରଙ୍କ ସମ୍ମୁଖରେ ରାଜସ୍ଥାନର ବ୍ୟାଟିଂ ଲାଇନ୍ ତାସଘର ଭଳି ଭୂଷୁଡ଼ି ପଡ଼ିଥିଲା। ଫଳରେ ରାଜସ୍ଥାନ ୨୦ ଓଭରରେ ୯ ଉଇକେଟ ହରାଇ ୧୫୫ ରନ କରିପାରିଥିଲା। କୋଲକାତା ପାଇଁ ବରୁଣ ଚକ୍ରବର୍ତ୍ତୀ (୩/୧୪) ଓ ସୁନୀଲ ନାରିନ (୨/୨୬)ଙ୍କ ସ୍ପିନ ଯୋଡ଼ି ୫ ଉଇକେଟ ନେଇଥିବା ବେଳେ କାର୍ତ୍ତିକ ତ୍ୟାଗୀ ୩ ଉଇକେଟ ଅକ୍ତିଆର କରିଥିଲେ।
ଜବାବରେ କେକେଆର ଆରମ୍ଭରୁ ଦୁଇ ଓପନର ଟିମ ସିଫର୍ଟ ଓ ଅଧିନାୟକ ଅଜିଙ୍କ୍ୟ ରାହାନେଙ୍କ ଉଇକେଟ ହରାଇଥିଲା। କ୍ରମାଗତ ଉଇକେଟ ପତନ ଘଟିବାରୁ କେକେଆର ଏକଦା ୧୩.୩ ଓଭର ସୁଦ୍ଧା ୮୫ ରନରେ ୬ ଉଇକେଟ ହରାଇ ପରାଜୟ ଆଡ଼େ ମୁହଁାଇଥିଲା। ଏଭଳି ପରିସ୍ଥିତିରେ ଅନୁକୂଳ ରୟ ଓ ରିଙ୍କୁ ସିଂ ଅବିଭାଜିତ ସପ୍ତମ ଉଇକେଟରେ ୩୭ ବଲରେ ୭୬ ରନ ଯୋଡ଼ି ଦଳକୁ ଜିତାଇଥିଲେ। ରିଙ୍କୁ ୩୪ ବଲରେ ୫୩ (୫ ଚୌକା ଓ ୨ ଛକା) ଓ ଅନୁକୂଳ ୧୬ ବଲରେ ୨୯ (୧ ଚୌକା ଓ ୨ ଛକା) ରନ କରି ଅପରାଜିତ ରହିଥିଲେ।
