ନୂଆଦିଲ୍ଲୀ,୭।୧: ଫିଟ୍ ହୋଇଗଲେଣି ଭାରତର ଦ୍ରୁତ ବୋଲର ମହମ୍ମଦ ଶାମି। ତଥାପି ତାଙ୍କୁ ଦଳରେ ନିଆଯାଉନାହିଁ। ନିକଟରେ ଶେଷ ହୋଇଥିବା ବର୍ଡର ଗାଭାସ୍କର ଟ୍ରଫିର ଦ୍ୱିତୀୟ ଭାଗରେ ତାଙ୍କୁ ଦଳରେ ସାମିଲ କରାଯାଇପାରେ ବୋଲି ଆଶା କରାଯାଉଥିଲା। ଏପରି ହୋଇଥିଲେ ଦଳର ସ୍ଥିତି ମଜଭୂତ ହୋଇଥାନ୍ତା। ମାତ୍ର ତାହା ନ ହେବାକୁ ନେଇ ଏବେ ପ୍ରଶ୍ନ ଉଠାଇଛନ୍ତି ପୂର୍ବତନ ଭେଟେରାନ ରବି ଶାସ୍ତ୍ରୀ ଏବଂ ରିକି ପଣ୍ଟିଂ।
ଶାମି ଆହତ ସମସ୍ୟାରୁ ସୁସ୍ଥ ହେବା ପରେ ପଶ୍ଚିମବଙ୍ଗରେ ତିନୋଟି ଫର୍ମାଟ ରଣଜୀ ଟ୍ରଫି, ସୈୟଦ ମୁସ୍ତାକ ଅଲି ଟି୨୦ ଏବଂ ବିଜୟ ହଜାରେ ଦିନିକିଆରେ ଚମତ୍କାର ପ୍ରଦର୍ଶନ କରିଥିଲେ। ଏହାପରେ ଭାରତୀୟ ଟିମ୍କୁ ସେ ଶୀଘ୍ର ଫେରିପାରନ୍ତି ବୋଲି କୁହାଯାଇଥିଲା। ହେଲେ ବିସିସିଆଇ ଅନ୍ୟ କାରଣ ଦର୍ଶାଇ ଏହାକୁ ଟାଳି ଦେଇଥିଲା।
ଏବେ ଶାସ୍ତ୍ରୀ କହିଛନ୍ତି, ସଚ୍ଚୋଟତାର ସହ କହିଲେ ମୁଁ ଗଣମାଧ୍ୟମରେ ଚାଲୁଥିବା କଥା ଶୁଣି ଚକିତ ହୋଇଥିଲି କି ଶେଷରେ ଶାମିଙ୍କ ସହ କ’ଣ ହୋଇଛି। ଯେତେବେଳେ ସେ ଫିଟ୍ ବୋଲି କୁହାଯାଉଛି ତେବେ ସେ କେଉଁଠି ଅଛନ୍ତି। କେତେଦିନ ହେଲାଣି ସେ ଏନ୍ସିଏରେ ଅଛନ୍ତି ଜଣାନାହିଁ। ସେ କେଉଁ ସ୍ଥିତିରେ ଅଛନ୍ତି ତାହାକୁ ନେଇ ଚିନ୍ତା କରାଯାଇପାରିଥାନ୍ତା। ଯଦି ମୋତେ ନିଷ୍ପତ୍ତି ନେବାକୁ ହୋଇଥାନ୍ତା ତେବେ ମୁଁ ତାଙ୍କୁ ଅଷ୍ଟ୍ରେଲିଆ ନେଇ ଆସିଯାଇଥାନ୍ତି। କାରଣ ସେଭଳି ହୋଇଥିଲେ ମେଲବର୍ନ ଏବଂ ସିଡନୀ ମୁକାବିଲା ଭାରତ ଜିତିଯାଇଥାନ୍ତା ବୋଲି ସେ କହିଛନ୍ତି।
ପଣ୍ଟିଂ ଶାସ୍ତ୍ରୀଙ୍କ ସମର୍ଥନ କରି କହିଛନ୍ତି, ମୋତେ ବାସ୍ତବରେ ଚକିତ କରିଛି ଯେ ସିରିଜ ମଝିରେ ତାଙ୍କୁ ଦଳରେ କାହିଁକି ସାମିଲ କରାଯାଇନାହିଁ। ସେ କମ୍ ଓଭର ବୋଲିଂ କରିଥିଲେ ବି ଫରକ ପଡ଼ିଥାନ୍ତି। ସେ ନ ଥିବାରୁ ଅଷ୍ଟ୍ରେଲିଆ ସପକ୍ଷରେ ସିରିଜ ଯିବା ନିଶ୍ଚିତ ବୋଲି ଜଣାଥିବା ପଣ୍ଟିଂ କହିଛନ୍ତି।
