ଲାହୋର,୧୭।୧୧: ପାକିସ୍ତାନର ଲାହୋରରେ ଲୋକମାନେ ଶ୍ୱାସରୁଦ୍ଧ ହେବାରେ ଲାଗିଛନ୍ତି। ଭୟଙ୍କର ପ୍ରଦୂଷଣ ଯୋଗୁଁ ସାଧାରଣ ଜୀବନ ଏବେ ଅସ୍ତବ୍ୟସ୍ତ ହୋଇ ପଡିଛି। ଗତ ୩୦ଦିନ ମଧ୍ୟରେ ୧୯ଲକ୍ଷରୁ ଅଧିକ ଲୋକ ଶ୍ୱାସ ରୋଗରେ ପୀଡିତ ହୋଇ ଚିକିତ୍ସା ପାଇଁ ସରକାରୀ ଡାକ୍ତରଖାନାରେ ପହଞ୍ଚିଛନ୍ତି।
କେବଳ ଶନିବାର ପାକିସ୍ତାନର ପଞ୍ଜାବ ପ୍ରଦେଶର ୭୫,୦୦୦ରୁ ଅଧିକ ଲୋକ ବିଷାକ୍ତ ଧୂଆଁ ଏବଂ ବାୟୁ ପ୍ରଦୂଷଣ କାରଣରୁ ଶ୍ୱାସକ୍ରିୟାରେ ସମସ୍ୟା ଥିବା ଅଭିଯୋଗ ନେଇ ଡାକ୍ତରଖାନାକୁ ଯାଇଥିଲେ। ଏହା ବ୍ୟତୀତ ୩,୩୫୯ ଆଜମା ରୋଗୀ, ୨୮୬ ହୃଦଘାତ ରୋଗୀ, ୬୦ଷ୍ଟ୍ରୋକ ରୋଗୀ ଏବଂ ୬୨୭ କଞ୍ଜୁକ୍ୟୁଟିଭାଇଟିସ ରୋଗୀ ଚିକିତ୍ସିତ ହୋଇଥିଲେ।
ଲାହୋରରେ ବାୟୁ ପ୍ରଦୂଷଣ ସହ ଜଡିତ ସର୍ବାଧିକ ମାମଲା ରିପୋର୍ଟ ହୋଇଛି। ଏଠାରେ ୫,୩୫୩ ଲୋକ ଶ୍ୱାସକ୍ରିୟା ସମସ୍ୟାର ସମ୍ମୁଖୀନ ହେଉଛନ୍ତି। ଏଥିମଧ୍ୟରେ ୩୫୯ ଆଜମା ରୋଗୀ, ୧୭୧ ହୃଦ ରୋଗୀ,୨୦ ଷ୍ଟ୍ରୋକ ପୀଡିତ ଏବଂ ୩୦୩ କଞ୍ଜୁକଟିଭାଇଟିସ ଅନ୍ତର୍ଭୁକ୍ତ । ଲାହୋରର ପ୍ରମୁଖ ଡାକ୍ତରଖାନାଗୁଡ଼ିକରେ ଏହି ରୋଗୀମାନଙ୍କ ଭିଡ ହୋଇଛି। ଶ୍ୱାସକ୍ରିୟା ରୋଗୀଙ୍କ ସଂଖ୍ୟା କ୍ରମାଗତ ଭାବେ ବୃଦ୍ଧି ପାଉଛି। ଏହାକୁ ଦୃଷ୍ଟିରେ ରଖି ପ୍ରାୟ ସମସ୍ତ ଡାକ୍ତରଖାନରେ ସ୍ବାସ୍ଥ୍ୟକର୍ମୀଙ୍କ ଛୁଟିକୁ ବାତିଲ କରାଯାଇଛି।
