ଜୟପୁର,୧୫।୧୧: ଚଳିତ ବର୍ଷ ରାଜସ୍ଥାନର ପୁଷ୍କର ମେଳାରେ ଆସୁଥିବା ଲୋକଙ୍କ ପାଇଁ ହରିୟାଣାର ଏକ ମଇଁଷି ଆକର୍ଷଣର କେନ୍ଦ୍ର ପାଲଟିଛି। ଗତ ବର୍ଷ ମଧ୍ୟ ଏଠାରେ ଥିବା ଲୋକଙ୍କ ମଧ୍ୟରେ ଏହି ମଇଁଷି ଚର୍ଚ୍ଚାର ବିଷୟ ହୋଇଥିଲା। ଯଦି ଆପଣ ଏହି ମଇଁଷିର ବିଶେଷତା ଜାଣିବେ ତେବେ ଆଶ୍ଚର୍ଯ୍ୟ ହୋଇଯିବେ। ହରିୟାଣାର ସିର୍ସାରେ ରହୁଥିବା ‘ଅନ୍ମୋଲ’ ନାମକ ଏହି ମଇଁଷି କେବଳ ହରିୟାଣା ଏବଂ ରାଜସ୍ଥାନରେ ନୁହେଁ ବରଂ ବିଦେଶରେ ମଧ୍ୟ ଖ୍ୟାତ।
ଚର୍ଚ୍ଚିତ ମଇଁଷିର ଓଜନ ୧୫୦୦ କିଲୋଗ୍ରାମ ଏବଂ ଏହାର ଉଚ୍ଚତା ହେଉଛି ୫ ଫୁଟ ୮ ଇଞ୍ଚ। କେବଳ ଏତିକି ନୁହେଁ, ଯଦି ଆମେ ଏହାର ଲମ୍ବ ବିଷୟରେ ଆଲୋଚନା କରିବା, ତେବେ ଏହା ୧୩ ଫୁଟ ଲମ୍ବା। ମଇଁଷିର ମାଲିକ ତାର ରକ୍ଷଣାବେକ୍ଷଣରେ ମାସକୁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରିଥାନ୍ତି। ଏହି ମଇଁଷି ପ୍ରତିଦିନ ପ୍ରାୟ ୨ ହଜାର ଟଙ୍କା ମୂଲ୍ୟର ଡାଏଫ୍ରୁଟ୍ସ ଏବଂ ଫଳ ଖାଇଥାଏ। ଶରୀରକୁ ପରିଷ୍କାର ଏବଂ ସୁସ୍ଥ ରଖିବା ପାଇଁ, ଏହି ମଇଁଷିର ମାଲିକ ଦିନକୁ ଦୁଇଥର ସ୍ନାନ କରାଇଥାନ୍ତି ଏବଂ ସ୍ବତନ୍ତ୍ର ତେଲ ଲଗାନ୍ତ। ଏହାଫଳରେ ମଇଁଷି ସୁସ୍ଥ ରହିଥାଏ।
୨୩ କୋଟି ଟଙ୍କା ଦାମ୍ ଲାଗିଛି?
ଅନମୋଲ ମାଲିକ ପରମିନ୍ଦର କହିଛନ୍ତି ଯେ ଦେଶର ଅନେକ କୃଷକ ମଇଁଷିକୁ କିଣିବା ଲାଗି ତାଙ୍କ ସହିତ ଯୋଗାଯୋଗ କରିଛନ୍ତି। ଅଷ୍ଟ୍ରେଲିଆର କୃଷକମାନେ ମଧ୍ୟ ଏହାକୁ କିଣିବାକୁ ପ୍ରସ୍ତାବ ଦେଇଛନ୍ତି। ଏହାର ମୂଲ୍ୟ ୨୩ କୋଟି ଟଙ୍କା ବୋଲି ଆକଳନ କରାଯାଇଛି। ତେବେ ପରମିନ୍ଦର ଏହି ମଇଁଷିକୁ ବିକ୍ରୟ କରିବାକୁ ପ୍ରସ୍ତୁତ ନୁହଁନ୍ତି। ଏବେ ପୁଷ୍କର ମେଳାରେ ସେ ବିଦେଶୀ ପର୍ଯ୍ୟଟକଙ୍କ ମଧ୍ୟରେ ମଧ୍ୟ ଚର୍ଚ୍ଚାର ବିଷୟ ପାଲଟିଛି। ଲୋକମାନେ ମଇଁଷି ସହିତ ସେଲ୍ଫି ନେଉଥିବାର ମଧ୍ୟ ଦେଖିବାକୁ ମିଳିଛି।
କ’ଣ ଖାଏ ଅନ୍ମୋଲ?
ସିର୍ସା ବାସିନ୍ଦା ପରମିନ୍ଦର କହିଛନ୍ତି, ସେ ଏହି ମଇଁଷିର ରକ୍ଷଣାବେକ୍ଷଣରେ ବହୁତ ଟଙ୍କା ଖର୍ଚ୍ଚ ହୋଇଥାଏ। ସେ ଏହି ମଇଁଷିର ଶୁକ୍ରାଣୁ ବିକ୍ରୟ କରି ମାସକୁ ୪-୫ ଲକ୍ଷ ଟଙ୍କା ରୋଜଗାର କରନ୍ତି। ଏହି ମଇଁଷି ପ୍ରତିଦିନ ପ୍ରାୟ ୨ ହଜାର ଟଙ୍କା ମୂଲ୍ୟର ଖାଦ୍ୟ ଖାଏ, ଯେଉଁଥିରେ ବାଦାମ, କାଜୁ, କ୍ଷୀର ଏବଂ ଓଟମିଲ ଅନ୍ତର୍ଭୁକ୍ତ। ଏହା ବ୍ୟତୀତ ଖାଦ୍ୟ ପଦାର୍ଥ ଯାହା ପଶୁମାନଙ୍କ ସ୍ବାସ୍ଥ୍ୟ ପାଇଁ ଭଲ, ତାଙ୍କୁ ଖାଇବାକୁ ଦିଆଯାଏ। ଅନେକ ମେଳାରେ ଅନମୋଲ ବିଭିନ୍ନ ପୁରସ୍କାର ଗ୍ରହଣ କରିସାରିଛି। ଏଥର ମଧ୍ୟ ଅନମୋଲ ୧୫ ଟି ମଇଁଷି ମଧ୍ୟରେ ଆନ୍ତର୍ଜାତୀୟ ଚାମ୍ପିୟନ ହୋଇଛି।
