ନୂଆଦିଲ୍ଲୀ,୨୩ା୬: ପେଟ୍ରୋଲ ଏବଂ ଡିଜେଲକୁ ଦ୍ରବ୍ୟ ଓ ସେବା ଟିକସ (ଜିଏସ୍ଟି) ପରିସରକୁ ଆଣିବା ପାଇଁ କେନ୍ଦ୍ର ସରକାର ଚାହାନ୍ତି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଶନିବାର କହିଛନ୍ତି। ତେବେ ଏହି ତୈଳ ଉପରେ ଜିଏସ୍ଟି ହାର ସମ୍ପର୍କରେ ରାଜ୍ୟ ସରକାରଗୁଡ଼ିକ ନିଷ୍ପତ୍ତି ନେବେ। ପୂର୍ବତନ ଅର୍ଥମନ୍ତ୍ରୀ ଅରୁଣ ଜେଟ୍ଲୀ ପେଟ୍ରୋଲ ଏବଂ ଡିଜେଲକୁ ଜିଏସ୍ଟି ଆଇନ ପରିସରକୁ ନେବା ଲାଗି ବ୍ୟବସ୍ଥା କରିଥିଲେ। ତେଣୁ ରାଜ୍ୟଗୁଡ଼ିକ ଏକତ୍ର ଏହା ଉପରେ ଆଲୋଚନା କରି ନିଷ୍ପତ୍ତି ନେବେ ବୋଲି ସୀତାରାମନ ସ୍ପଷ୍ଟ କରିଛନ୍ତି।
ସୂଚନାଯୋଗ୍ୟ, ୨୦୧୭ ଜୁନ୍ ୧ରେ ଜିଏସ୍ଟି କାର୍ଯ୍ୟକାରୀ ହେବା ବେଳେ ଅଶୋଧିତ ତୈଳ, ପ୍ରାକୃତିକ ବାଷ୍ପ, ପେଟ୍ରୋଲ, ଡିଜେଲ ଏବଂ ବିମାନ ଇନ୍ଧନ (ଏଟିଏଫ୍) ଜିଏସ୍ଟି ଆଇନରେ ରହିଥିଲା। ତେବେ ରାଜ୍ୟଗୁଡ଼ିକ ସହମତ ନ ହେବାରୁ ପରବର୍ତ୍ତୀ ପର୍ଯ୍ୟାୟରେ ଏହାକୁ ସାମିଲ କରିବାକୁ ନିଷ୍ପତ୍ତି ହୋଇଥିଲା। ଫଳରେ କେନ୍ଦ୍ର ସରକାର ପେଟ୍ରୋଲ ଡିଜେଲ ଉପରେ ଉତ୍ପାଦ ଶୁଳ୍କ ନେଉଥିବା ବେଳେ ରାଜ୍ୟଗୁଡ଼ିକ ଭାଟ୍ ଆଦାୟ କରିଥାନ୍ତି।
