ପଟ୍ଟାଙ୍ଗି,୭।୫(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅଧୀନ କୋଟିଆ ପଞ୍ଚାୟତକୁ ନେଇ ବିବାଦ ଥମିବାର ନା ଧରୁନାହିଁ। ଅନ୍ୟପକ୍ଷେ ଓଡ଼ିଶାକୁ ଚେକ୍ ଦେବାରେ ପଛଘୁଞ୍ଚା ଦେଉନାହିଁ ପଡୋଶୀ ଆନ୍ଧ୍ରପ୍ରଦେଶ। ଏପରି କିଛି ଘଟଣା ଆହୁରି ବିବାଦ ଆଡକୁ ଟାଣି ନେଉଥିବା ବେଳେ ଆନ୍ଧ୍ରର ଅନୁପ୍ରବେଶ ରାଜ୍ୟ ପ୍ରଶାସନିକ କ୍ଷେତ୍ରରେ କୌଣସି ପ୍ରଭାବ ପଡୁନାହିଁ।
ସୂଚନା ଅନୁଯାୟୀ, ରାଜ୍ୟରେ ଜିଲାଠୁ ଆରମ୍ଭ କରି ବ୍ଲକ, ପଞ୍ଚାୟତସ୍ତରରେ ଜନଗଣନା କାର୍ଯ୍ୟ ଆରମ୍ଭ ହୋଇଥିବା ବେଳେ ପଟ୍ଟାଙ୍ଗି ବ୍ଲକ ପ୍ରଶାସନ ପକ୍ଷରୁ ମଧ୍ୟ ଜନଗଣନା ଆରମ୍ଭ ହୋଇଛି। ଏଭଳିସ୍ଥିତିରେ ରାଜ୍ୟ ସରକାରଙ୍କ ପକ୍ଷରୁ କୋଟିଆ ପଞ୍ଚାୟତରେ ଗତ ୧୬ ତାରିଖରୁ ମ୍ୟାପିଙ୍ଗ ସହ ଜନଗଣନା କାର୍ଯ୍ୟ ଆରମ୍ଭ ହୋଇ ୩୦ ତାରିଖରେ ଶେଷ ହୋଇଥିବା ବେଳେ ବର୍ତ୍ତମାନ ପଡୋଶୀ ଆନ୍ଧ୍ରପ୍ରଦେଶ ପକ୍ଷରୁ ମଧ୍ୟ ଉକ୍ତ ପଞ୍ଚାୟତରେ ଜନଗଣନା କାର୍ଯ୍ୟ ଆରମ୍ଭ କରାଯାଇଛି।
କୋଟିଆକୁ ନେଇ ଦୁଇ ରାଜ୍ୟର ପ୍ରଶାସନ ପକ୍ଷରୁ ହେଉଥିବା ଜନଗଣନା କାର୍ଯ୍ୟ ବର୍ତ୍ତମାନ ଜନମାନସରେ ପ୍ରଶ୍ନ ସୃଷ୍ଟି କରିଛି। ଏହିପରି କି ଆନ୍ଧ୍ରର ପାର୍ୱତୀପୁରମ୍ ମାନ୍ୟମ ଜିଲାର ସାଲୁର୍ ବ୍ଲକ ପ୍ରଶାସନ ପକ୍ଷରୁ ଗତ ୧ ତାରିଖରୁ ଜନଗଣନା କାର୍ଯ୍ୟକ୍ରମ ଆରମ୍ଭ ହୋଇଥିବା ବେଳେ କୋଟିଆ ପଞ୍ଚାୟତର ସୀମାନ୍ତ ଗ୍ରାମଗୁଡିକ ଯଥା ଫାଟୁସିନେରୀ, ଫଗୁଣସିନେରୀ, ମାଡକାର, ଢୋଲିଆମ୍ୱ, ନେରିଡିବାଲସା ପରି ଗ୍ରାମରେ ଆନ୍ଧ୍ର ଅଧିକାରୀମାନେ ଅନୁପ୍ରବେଶ କରି ଜନଗଣନା ସହ ମ୍ୟାପିଙ୍ଗ କାର୍ଯ୍ୟକ୍ରମ ଆରମ୍ଭ କରିଛନ୍ତି।
ଅନ୍ୟପକ୍ଷେ ପଟ୍ଟାଙ୍ଗି ତହସିଲଦାର ଦେବେନ୍ଦ୍ର ବାହାଦୂର ସିଂ ଧାରୁଆ କୋଟିଆ ପଞ୍ଚାୟତର ସମସ୍ତ ଗ୍ରାମରେ ସଫଳତାର ସହ ଜନଗଣନା ହୋଇଥିବା ପ୍ରକାଶ କରିଛନ୍ତି। ହେଲେ କୋଟିଆ ପଞ୍ଚାୟତକୁ ନେଇ ଦୁଇ ରାଜ୍ୟ ପକ୍ଷରୁ ଜନଗଣନା କରାଯିବା ଏବେ ପ୍ରଶ୍ନ ସୃଷ୍ଟି କରିଛି। ଉକ୍ତ ସର୍ଭେ ଜିପିଏସ୍ ମାଧ୍ୟମରେ ହେଉଥିବା ବେଳେ କିପରି ଆନ୍ଧ୍ର ସରକାର କୋଟିଆରେ ଜନଗଣନା ଆରମ୍ଭ କରିଛନ୍ତି ତାକୁ ନେଇ ଦ୍ୱନ୍ଦ ଦେଖାଦେଇଛି।
ଅନ୍ୟପକ୍ଷେ ବିଧାୟକ ରାମଚନ୍ଦ୍ର କାଡାମ୍ ନିକଟରେ କୋଟିଆ ପଞ୍ଚାୟତକୁ ଦୁଇଟି ମନ୍ତ୍ରୀ ଏବଂ ପ୍ରଶାସନିକ ଅଧିକାରୀଙ୍କ ସହ ଗସ୍ତ କରି ଫେରିଥିଲେ। ରାଜ୍ୟ ସରକାର କୋଟିଆକୁ ଓଡ଼ିଶାର ଅବିଚ୍ଛେଦ ଅଙ୍ଗ ବୋଲି ଭାବୁଛନ୍ତି। ତା’ହେଲେ ସରକାର କୋଟିଆକୁ ସୁରକ୍ଷା ଦେବା ପାଇଁ ଉଚିତ ପଦକ୍ଷେପ ନେବାର ଆବଶ୍ୟକତା ରହିଛି। ହେଲେ ଅବିଚ୍ଛେଦ ଅଙ୍ଗ କହି ଆନ୍ଧ୍ରପ୍ରଦେଶକୁ ସୁହାଇଲା ଭଳି ସରକାର ଭାଷଣ ଦେବା ଅତି ଦୁର୍ଭାଗ୍ୟ ଜନକ ବୋଲି ବିଧାୟକ ପ୍ରକାଶ କରିଛନ୍ତି।
