ନୂଆଦିଲ୍ଲୀ,୭ା୫: ଲୋକ ସଭାର ବିରୋଧୀ ଦଳ ନେତା ତଥା ରାୟବରେଲିର କଂଗ୍ରେସ ଏମ୍ପି ରାହୁଲ ଗାନ୍ଧୀ ଦ୍ୱୈତ ନାଗରିକତା ମାମଲା ପରେ ଆଉ ଏକ ନୂଆ ମାମଲାରେ ଫସିଥିବା ଜଣାପଡ଼ିଛି। ଆହ୍ଲାବାଦ ହାଇକୋର୍ଟର ଲକ୍ଷ୍ନୌ ବେଞ୍ଚ କଂଗ୍ରେସ ନେତାଙ୍କ ବିରୋଧରେ ଆୟ ବହିର୍ଭୂତ ସମ୍ପତ୍ତି ମାମଲାର ତଦନ୍ତ ପାଇଁ ଏକ ଆବେଦନର ଶୁଣାଣି ପାଇଁ ମେ’ ୧୨କୁ ଧାର୍ଯ୍ୟ କରିଛନ୍ତି।
କର୍ନାଟକ ଭାଜପା କର୍ମୀ ଏସ୍. ଭିଗ୍ନେଶ ଶିଶିରଙ୍କ ଦ୍ୱାରା ଦାଖଲ ଆବେଦନ ଉପରେ ବିଚାରପତି ରାଜେଶ ସିଂହ ଚୌହାନ ଏବଂ ଜାଫିର ଅହମ୍ମଦଙ୍କ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି। ପରବର୍ତ୍ତୀ ଶୁଣାଣି ସମୟରେ ଆବେଦନଟି ବଜାୟ ରଖିବା ଯୋଗ୍ୟ କି ନାହିଁ ସେ ବିଷୟରେ କୋର୍ଟ ଯୁକ୍ତି ଶୁଣାଇବେ, ଯେଉଁଠାରେ ଉଭୟ ପକ୍ଷର ଶୁଣାଣି ହେବ।
ରାହୁଲଙ୍କ ବିରୋଧରେ ଦାୟର ଆବେଦନରେ ଆବେଦନକାରୀ ଅଭିଯୋଗ କରିଛନ୍ତି ଯେ, କଂଗ୍ରେସ ଏମ୍ପି ଏବଂ ତାଙ୍କ ପରିବାର ଲୋକଙ୍କ ଆୟ ସେମାନଙ୍କର ଜ୍ଞାତ ଆୟ ଉତ୍ସ ତୁଳନାରେ ଅଧିକ। ଯାହାର ନିରପେକ୍ଷ ଏବଂ ସ୍ବଚ୍ଛ ତଦନ୍ତ କରାଯିବା ଉଚିତ। ଗତ ବର୍ଷ ଏପ୍ରିଲ ୨୫ରେ ଆବେଦନ ଦାୟର କରାଯାଇଥିଲା।
ଆବେଦନରେ କେନ୍ଦ୍ର ସରକାର, କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ), ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି), କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ, ଉତ୍ତରପ୍ରଦେଶ ପୋଲିସ ଠକେଇ ତଦନ୍ତ କାର୍ଯ୍ୟାଳୟର ନିର୍ଦ୍ଦେଶକଙ୍କୁ ପ୍ରତିପକ୍ଷ ଭାବରେ ନାମିତ କରାଯାଇଛି। ବୁଧବାର ଖଣ୍ଡପୀଠ ମାମଲାର ଶୁଣାଣି କରିଥିଲେ, କିନ୍ତୁ ସନ୍ଧ୍ୟା ପର୍ଯ୍ୟନ୍ତ କୋର୍ଟର ଓ୍ବେବ୍ସାଇଟରେ ଆଦେଶ ଅପଲୋଡ ହୋଇ ନ ଥିଲା।
ଏହା ଉଲ୍ଲେଖନୀୟ ଯେ, ରାହୁଲଙ୍କ ବିରୋଧରେ ଏକ ଦ୍ୱୈତ ନାଗରିକତା ମାମଲା ମଧ୍ୟ କୋର୍ଟରେ ବିଚାରାଧୀନ ଅଛି। ଆବେଦନକାରୀ ଅଭିଯୋଗ କରିଛନ୍ତି ଯେ, ରାହୁଲ ଗାନ୍ଧୀ ଭାରତୀୟ ଏବଂ ବ୍ରିଟିଶ ଉଭୟ ନାଗରିକତା ଧାରଣ କରିଛନ୍ତି। ତଥାପି ଭାରତୀୟ ଆଇନ ଦ୍ୱୈତ ନାଗରିକତାକୁ ନିଷିଦ୍ଧ କରେ। ନାଗରିକତା ଆଇନ ୧୯୫୫ ଅନୁଯାୟୀ, ଯଦି ଜଣେ ବ୍ୟକ୍ତି ଅନ୍ୟ ଦେଶର ନାଗରିକତା ଗ୍ରହଣ କରନ୍ତି, ତେବେ ତାଙ୍କୁ ଭାରତୀୟ ନାଗରିକତା ଛାଡ଼ିବାକୁ ପଡ଼ିବ।
କୋର୍ଟ କହିଛନ୍ତି, ରାହୁଲ ଗାନ୍ଧୀଙ୍କ ବିରୋଧରେ ଦ୍ୱୈତ ନାଗରିକତାର ଅଭିଯୋଗକୁ ଅଣଦେଖା କରାଯାଇପାରିବ ନାହିଁ। ଏହି ମାମଲାକୁ ଗମ୍ଭୀରତାର ସହିତ ତଦନ୍ତ କରାଯିବା ଉଚିତ। କୋର୍ଟ ଉତ୍ତରପ୍ରଦେଶ ସରକାରଙ୍କୁ ନିଜେ କିମ୍ବା ଏକ ତଦନ୍ତକାରୀ ସଂସ୍ଥା ମାଧ୍ୟମରେ ମାମଲାର ତଦନ୍ତ କରିବାକୁ ନିର୍ଦ୍ଦେଶ ଦେଇଛନ୍ତି।
