ରାୟପୁର,୬।୫: ପିଠିରେ ଯନ୍ତ୍ରଣା ଯୋଗୁ ଲକ୍ଷ୍ନୌ ବିପକ୍ଷ ମ୍ୟାଚ୍ରୁ ବାଦ ପଡ଼ିଥିବା ମୁମ୍ବାଇ ଇଣ୍ଡିଆନ୍ସ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଏବେ ସମ୍ପୂର୍ଣ୍ଣ ଫିଟଥିବା ଜଣାପଡ଼ିଛି। ରବିବାର ଦିନ ରଜତ ପାଟିଦାରଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ବିପକ୍ଷ ଗୁରୁତ୍ୱପୂର୍ଣ୍ଣ ମ୍ୟାଚ୍ରୁ ସେ ଦଳର ନେତୃତ୍ୱ ନେବେ।
ବୁଧବାର ଦିନ ମୁମ୍ବାଇ ଇଣ୍ଡିଆନ୍ସର ଖେଳାଳିମାନେ ରାୟପୁର ଗସ୍ତ କରିଥିବା ବେଳେ ହାର୍ଦ୍ଦିକ ସେମାନଙ୍କ ସହ ନ ଥିଲେ। ଏହାକୁ ନେଇ ସେ ଆଗାମୀ ମ୍ୟାଚ୍ ଖେଳିବେ କି ନାହିଁ, ସେ ନେଇ ସନ୍ଦେହ ସୃଷ୍ଟି ହୋଇଥିଲା। କିନ୍ତୁ ସଦ୍ୟତମ ସୂଚନା ଅନୁଯାୟୀ, ହାର୍ଦ୍ଦିକଙ୍କ ସମେତ ଅନ୍ୟ କିଛି ଖେଳାଳି ବିଳମ୍ବରେ ଦଳ ସହ ଯୋଗ ଦେବେ।
ଅଙ୍କ ତାଲିକାରେ ମୁମ୍ବାଇ ଇଣ୍ଡିଆନ୍ସର ଅବସ୍ଥା ଏବେ ବହୁତ ଶୋଚନୀୟ।
ଦଳ ୧୦ ମ୍ୟାଚ୍ ଖେଳିଥିବା ବେଳେ ୩ଟିରେ ବିଜେତା ହୋଇଛନ୍ତି। ସେହିଭଳି ୭ଟିରେ ପରାଜିତ ହୋଇଛନ୍ତି। ଏବେ ଦଳ ପଏଣ୍ଟ ତାଲିକା ୯ମ ସ୍ଥାନରେ ଅଛନ୍ତି। ପ୍ଲେ-ଅଫ ଦୌଡ଼ରେ ରହିବାକୁ ହେଲେ ମୁମ୍ବାଇକୁ ଏବେ ପ୍ରତିଟି ମ୍ୟାଚ ଜିତିବାକୁ ପଡ଼ିବ। ରୋହିତ ଶର୍ମା ଏବଂ ରିକଲଟନଙ୍କ ଭଲ ଫର୍ମ ଦଳ ପାଇଁ ଏକ ସକାରାତ୍ମକ ଦିଗ ସାଜିଛି।
ଚଳିତ ସିଜନରେ ହାର୍ଦ୍ଦିକ ଉଭୟ ବ୍ୟାଟିଂ ଓ ବୋଲିଂରେ ବିଫଳ ହୋଇଛନ୍ତି। ୮ଟି ମ୍ୟାଚ୍ରେ ମାତ୍ର ୧୪୬ ରନ୍(ହାର ୨୦.୮) କରିଛନ୍ତି। ୮ଟି ମ୍ୟାଚ୍ରେ ମାତ୍ର ୪ଟି ଉଇକେଟ ଏବଂ ୧୧.୯ ଇକୋନୋମି ରେଟ୍ରେ ରନ ଦେଇଛନ୍ତି।
ଲକ୍ଷ୍ନୌ ବିପକ୍ଷ ମ୍ୟାଚ୍ରେ ତାଙ୍କୁ ବିଶ୍ରାମ ନେବାକୁ ପରାମର୍ଶ ଦିଆଯାଇଥିଲା, କିନ୍ତୁ ଆରସିବି ବିପକ୍ଷ କର ବା ମର ମ୍ୟାଚ ପାଇଁ ସେ ପଡ଼ିଆକୁ ଓହ୍ଲାଇବା ଏକ ପ୍ରକାର ନିଶ୍ଚିତ ହୋଇଛି।
