ମୁମ୍ବାଇ,୭।୫: ତରଭୁଜ ଖାଇବା ପରେ ଗୋଟିଏ ପରିବାରର ଚାରି ଜଣଙ୍କ ମୃତ୍ୟୁ ମାମଲା ସମ୍ପର୍କରେ ଏକ ବଡ଼ ଖୁଲାସା ହୋଇଛି। ମୁମ୍ବାଇର ଭିଣ୍ଡି ବଜାର ଅଞ୍ଚଳରେ ଏହି ଚାରି ଜଣଙ୍କ ମୃତ୍ୟୁ ଘଟିଥିଲା। ଏହି ମାମଲା ସମ୍ପର୍କରେ ବର୍ତ୍ତମାନ ପର୍ଯ୍ୟନ୍ତ ସବୁଠାରୁ ଗୁରୁତ୍ୱପୂର୍ଣ୍ଣ ଏବଂ ଆଶ୍ଚର୍ଯ୍ୟଜନକ ସୂଚନା ସାମ୍ନାକୁ ଆସିଛି। ତଦନ୍ତରୁ ଜଣାପଡିଛି ଯେ ଚାରି ଜଣଙ୍କ ମୃତ୍ୟୁ ମୂଷା ମରା ଔଷଧରେ ଥିବା ବିଷ ଯୋଗୁ ହୋଇଥିଲା।
ଫରେନସିକ ପରୀକ୍ଷାରୁ ମୃତକଙ୍କ ଶରୀରରେ ଜିଙ୍କ ଫସଫାଇଡ – ସାଧାରଣତଃ ମୂଷା ବିଷରେ ବ୍ୟବହୃତ ହେଉଥିବା ପଦାର୍ଥର ଚିହ୍ନ ଚିହ୍ନଟ ହୋଇଛି। ଏହା ବ୍ୟତୀତ, ପରିବାର ସଦସ୍ୟଙ୍କ ସ୍ବାସ୍ଥ୍ୟ ଖରାପ ହେବା ପୂର୍ବରୁ ଯେଉଁ ତରଭୁଜ ଖାଇଥିଲେ ତାହାର ନମୁନାରେ ଜିଙ୍କ ଫସଫାଇଡର ଚିହ୍ନ ମଧ୍ୟ ମିଳିଛି।
୧୧ ଦିନର ତଦନ୍ତ ପରେ, ଏହି ଚାଞ୍ଚଲ୍ୟକର ମାମଲାକୁ ନେଇ ରହସ୍ୟ ଶେଷରେ ଖୋଲିବା ପରି ମନେ ହେଉଛି। ମାତ୍ର କିଛି ଘଣ୍ଟା ମଧ୍ୟରେ ଡୋକାଡିଆ ପରିବାରର ଚାରି ଜଣଙ୍କର ହଠାତ ମୃତ୍ୟୁ ପରେ ମାସର ୨୬ ତାରିଖରେ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଥିଲା।
ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ସେମାନେ ତରଭୁଜ ଖାଇବା ପରେ ସେମାନଙ୍କ ସ୍ବାସ୍ଥ୍ୟ ଖରାପ ହୋଇଯାଇଥିଲା। ଶେଷରେ ସେମାନଙ୍କ ମୃତ୍ୟୁ ହୋଇଥିଲା। ମୃତକମାନେ ହେଲେ ଅବଦୁଲ୍ଲା ଡୋକାଡିଆ (୪୪), ତାଙ୍କ ସ୍ତ୍ରୀ ନସରିନ (୩୫), ଏବଂ ସେମାନଙ୍କ ଝିଅ ଆୟେଶା (୧୬) ଏବଂ ଜୈନବ (୧୩)। ଚାରି ଜଣଙ୍କ ମୃତ୍ୟୁ ସମଗ୍ର ଅଞ୍ଚଳରେ ଦୁଖର ପରିସ୍ଥିତି ସୃଷ୍ଟି କରିଥିଲା।
