ନ୍ୟୁୟର୍କ/ନୂଆଦିଲ୍ଲୀ, ୧୬।୮: ସଂଯୁକ୍ତ ରାଷ୍ଟ୍ର ସୁରକ୍ଷା ପରିଷଦ(ୟୁଏନଏସସି)ରେ ପାକିସ୍ତାନକୁ ପୁଣି ଝଟକା। ଜମ୍ମୁ-କଶ୍ମୀରରୁ ଅନୁଚ୍ଛେଦ ୩୭୦ ଉଠିବା ପରେ ବିଚଳିତ ପାକିସ୍ତାନକୁ ୟୁଏନଏସସିରେ କେବଳ ଚାଇନାକୁ ଛାଡି କୌଣସି ଦେଶ ସମର୍ଥନ ଦେଇନାହିଁ। ପାକିସ୍ତାନର ବାରମ୍ବାର ଅନୁରୋଧ ପରେ ଜାତିସଂଘ ସୁରକ୍ଷା ପରିଷଦ ଶୁକ୍ରବାର ଏହା ଉପରେ ବନ୍ଦ କୋଠରୀରେ ଚର୍ଚ୍ଚା କରିବାକୁ ନିଷ୍ପତ୍ତି ନେଇଥିଲା। ଚାଇନା ମଧ୍ୟ ଏଥିରେ ପାକିସ୍ତାନକୁ ସମର୍ଥନ କରି ଜାତିସଂଘ ସୁରକ୍ଷା ପରିଷଦଙ୍କୁ ବୈଠକ ଡାକିବା ପାଇଁ ଦାବି ଜଣାଇଥିଲା। ଏହି ବୈଠକରେ ଭାରତ ଜମ୍ମୁ-କଶ୍ମୀରରୁ ୩୭୦ ଧାରା ଉଚ୍ଛେଦ କରିବା ଉପରେ ଆଲୋଚନା କରାଯାଇଥିଲା। ୟୁଏନଏସସିରେ ୧୫ଟି ଦେଶ ସଦସ୍ୟ ଅଛନ୍ତି। ୫ଟି ସ୍ଥାୟୀ ଏବଂ ୧୦ଟି ଅସ୍ଥାୟୀ ଦେଶ ରହିଛନ୍ତି। ସ୍ଥାୟୀ ସଦସ୍ୟଙ୍କ ମଧ୍ୟରେ ଆମେରିକା, ରୁୁଷ, ବ୍ରିଟେନ, ଚାଇନା ଏବଂ ଫ୍ରାନ୍ସ ଅଛନ୍ତି। କେବଳ ଚାଇନାକୁ ଛାଡିଦେଲେ ଅନ୍ୟ ଦେଶମାନେ ପାକିସ୍ତାନକୁ ସମର୍ଥନ ଦେଉନାହାନ୍ତି।
