ଅହମ୍ମଦାବାଦ,୧୭।୧୧: ନିଜର ଘାତକ ବୋଲିଂକୁ ନେଇ ବିଶ୍ୱକପ୍ରେ ଚର୍ଚ୍ଚାର ପରିସରକୁ ଆସିଛନ୍ତି ଭାରତୀୟ ବୋଲର୍ ମହମ୍ମଦ ଶାମି। ଚାପରେ ଥିବା ସତ୍ତ୍ୱେ ସେମିଫାଇନାଲ ମୁକାବିଲାରେ ୭ ଉଇକେଟ ନେଇ ଦଳକୁ ଜିତାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ ସେ। ଅନେକେ ତାଙ୍କ ବୋଲିଂକୁ ‘ଅସାଧାରଣ’ ବୋଲି କହୁଥିବା ବେଳେ ସେ ଏବେ ନିଜ ସଫଳତାକୁ ନେଇ ମୁହଁ ଖୋଲିଛନ୍ତି।
ଷ୍ଟାର ସ୍ପୋଟ୍ସକୁ ଶାମି କହିଛନ୍ତି, ତାଙ୍କ ବୋଲିଂରେ କିଛି ଅସାଧାରଣ ନାହିଁ। ସେ କେବେହେଲେ ଖେଳାଳିଙ୍କୁ ଦେଖନ୍ତି ନାହିଁ। ସର୍ବଦା ପିଚ୍ରେ ବଲ୍ କିଭଳି ବ୍ୟବହାର କରୁଛି ତାହାକୁ ଲକ୍ଷ୍ୟ କରିଥାନ୍ତି। ଯଦି ବଲ୍ ସ୍ବିଙ୍ଗ୍ ହୋଇ ନ ଥାଏ ତେବେ ‘ଷ୍ଟମ୍ପ ଟୁ ଷ୍ଟମ୍ପ’ ବୋଲିଂ କରିବାକୁ ଚେଷ୍ଟା କରିଥାନ୍ତି, ଫଳରେ ଉଇକେଟ ମିଳିଥାଏ ବୋଲି ସେ କହିଛନ୍ତି।
କହିରଖୁଛୁ, ଶାମି ବିଶ୍ୱକପ୍ ପୂର୍ବର ୪ ମୁକାବିଲାରେ ଦଳରେ ସାମିଲ ହୋଇ ନ ଥିଲେ। ହାର୍ଦ୍ଦିକ ପାଣ୍ଡ୍ୟା ଆହତ ହୋଇ ଟୁର୍ନାମେଣ୍ଟରୁ ବାଦ୍ ପଡ଼ିବା ପରେ ତାଙ୍କୁ ଏକାଦଶରେ ସ୍ଥାନ ମିଳିଥିଲା। ଏହାପରଠାରୁ ସେ ବୋଲିଂରେ ନିଜର ସ୍ବତନ୍ତ୍ର ଛାପ ଛାଡ଼ିଛନ୍ତି। ଫାଇନାଲ ମୁକାବିଲାରେ ମଧ୍ୟ ସେଭଳି ଘାତକ ବୋଲିଂ ସେ କରିବେ ବୋଲି ପ୍ରଶଂସକମାନେ ଆଶା ରଖିଛନ୍ତି।
