ନୂଆଦିଲ୍ଲୀ,୧୦।୧୧: ସରକାରୀ ବଙ୍ଗଳାକୁ ଖାଲି କରିବାକୁ ଆମ ଆଦମୀ ପାର୍ଟି (ଏଏପି)ନେତା ରାଘବ ଚଢାଙ୍କୁ ନୋଟିସ ଜାରି ହୋଇଥିଲା। ଯାହାକୁ ନେଇ ସେ ଦିଲ୍ଲୀ ହାଇକୋର୍ଟର ଦ୍ୱାରସ୍ଥ ହୋଇଥିଲେ। ବଙ୍ଗଳା ଛାଡିଲେ ସେ ଅସୁରକ୍ଷିତ ଓ ଆତଙ୍କବାଦୀ ବିପଦ ଥିବା କୋର୍ଟରେ କହିଛନ୍ତି। ରାଘବ ଚାଢାଙ୍କ ଓକିଲ ଅଭିଷେକ ମନୁ ସିଂଭି ଦିଲ୍ଲୀ ହାଇକୋର୍ଟରେ କହିଛନ୍ତି , ସେପ୍ଟେମ୍ବର ୨୨, ୨୦୨୨ରେ ଉପରାଷ୍ଟ୍ରପତି ଜଗଦୀପ ଧନଖର ଚଢାଙ୍କ ପାଇଁ ଟାଇପ ୭ ବଙ୍ଗଳା ଆବଣ୍ଟନକୁ ଅନୁମୋଦନ କରିଛନ୍ତି । କାରଣ ପଞ୍ଜାବରୁ ତାଙ୍କୁ ଧମକ ଦିଆଯାଉଥିବାରୁ ତାଙ୍କୁ ଜେଡ ପ୍ଲସ ସୁରକ୍ଷା ମିଳିଛି। ସେହିପରି ସୁରକ୍ଷା ସମୀକ୍ଷା କମିଟି ଟାଇପ ୬ ବଙ୍ଗଳାକୁ ତାଙ୍କ ପାଇଁ ଅନୁପଯୁକ୍ତ ବୋଲି ଘୋଷଣା କରିଛି। ଚାଢାଙ୍କ ଓକିଲ ସିଂଭି ଆହୁରି କହିଛନ୍ତ, ପ୍ରତିଦିନ ତାଙ୍କ ବାସଭବନକୁ ଶହ ଶହ ଲୋକ ଆସନ୍ତି। ତେଣୁ ଉଭୟ ସୁରକ୍ଷା ଏବଂ ଜନସାଧାରଣଙ୍କ ସୁବିଧା ଦୃଷ୍ଟିରୁ କେବଳ ଟାଇପ ୭ ବଙ୍ଗଳା ଉପଯୁକ୍ତ ଅଟେ।
ସୁରକ୍ଷା କର୍ଡନ ଅନୁଯାୟୀ ତାଙ୍କ ଘର ହସ୍ତାନ୍ତର କରିବା ବିପଜ୍ଜନକ ବୋଲି ରାଘବ ଚଢା ହାଇକୋର୍ଟରେ ଯୁକ୍ତି ବାଢିଛନ୍ତି। ହଇରାଣ କରିବା ଉଦ୍ଦେଶ୍ୟରେ ଏହିଭଳି କାର୍ଯ୍ୟ କରାଯାଉଛି ବୋଲି ସେ ଦାବି କରୁଛନ୍ତି।
