ବୀରମହାରାଜପୁର,୨୮।୩(ଡି.ଏନ.ଏ.): ସୁବର୍ଣ୍ଣପୁର ଜିଲା ଦେଇ ପ୍ରବାହିତ ମହାନଦୀରେ ମାଛ ମାରିବା ପାଇଁ ବ୍ଲାଷ୍ଟିଂ କରାଯାଉଥିବା ବିଭିନ୍ନ ସମୟର ଅଭିଯୋଗ ହେଉଛି। ହେଲେ ପ୍ରଶାସନ ଏନେଇ କୌଣସି ପଦକ୍ଷେପ ନେଉନାହିଁ। ଏହାର ପ୍ରତିବାଦ କରି ସୋମବାର ବୀରମହାରାଜପୁର ବ୍ଲକ ଯୁବ କଂଗ୍ରେସ ପକ୍ଷରୁ ଜିଲାପାଳଙ୍କୁ ଫେରାଦ ହୋଇ ଦାବିପତ୍ର ପ୍ରଦାନ କରାଯାଇଛି। ଏଥିରେ ଉଲ୍ଲେଖ କରାଯାଇଛି ଯେ, ବୀରମହାରାଜପୁର ଉପଖଣ୍ଡ ଅଧୀନ ଉଲୁଣ୍ଡା ବ୍ଲକର ଏସ.ପତ୍ରାପାଲି, ସିଣ୍ଢୋଲ, ଚଢେଇପଙ୍କ, ନିମ୍ନା, ପଞ୍ଚମହଲା, ମୁଣ୍ଡୋଘାଟ, ମହଦା ପଞ୍ଚାୟତ ସହିତ ବୀରମହାରାଜପୁର ବ୍ଲକର ଉଫୁଲା, ବାଗବର, ଜଟେସିଙ୍ଘା, ସୁବଳୟା, ପିତାମହୁଲ ଆଦି ପଞ୍ଚାୟତ ଅଧୀନ ଅନେକ ଗ୍ରାମର ମତ୍ସଜୀବୀ ଦୈନନ୍ଦିନ ମହାନଦୀରୁ ମାଛ ମାରି ପରିବାର ପ୍ରତିପୋଷଣ କରିଥାନ୍ତି। ଏବେ ମାଛ ମାରିବା ପାଇଁ କେତେକ ବ୍ୟକ୍ତି ମହାନଦୀରେ ବ୍ଲାଷ୍ଟିଂ କରୁଛନ୍ତି। ଏଥିଯୋଗୁ ନଦୀରେ ମାଛ ବଂଶ ଲୋପ ପାଇବାରେ ଲାଗୁଛି। ବେଆଇନ ବ୍ଲାଷ୍ଟିଂ ଯୋଗୁଁ ସରକାର ମତ୍ସ ବିଭାଗ ଦ୍ବାରା ମହାନଦୀରେ ମାଛ ଉତ୍ପାଦନ ବୃଦ୍ଧି ସହ ମତ୍ସ୍ୟଜୀବୀଙ୍କୁ ଜୀବିକା ବୃଦ୍ଧି ନେଇ ଯେଉଁ ପ୍ରୟାସ କରୁଛନ୍ତି ତାହାର ଏହାର ପରିପନ୍ଥୀ ସଦୃଶ ହୋଇଛି। ବ୍ଲଷ୍ଟିଂ ଯୋଗୁ ମହାନଦୀ ଅବବାହିକାରେ ଥିବା ଗ୍ରାମବାସୀ ମଧ୍ୟ ଭୟଭୀତ ଥିବା ଦେଖାଯାଉଛି। ବ୍ଲାଷ୍ଟିଂକୁ ପ୍ରତିରୋଧ ସହିତ ବ୍ଲାଷ୍ଟିଂକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ମତ୍ସ୍ୟଜୀବୀମାନେ ପ୍ରଶାସନ ନିକଟରେ ଅଭିଯୋଗ କରୁଥିଲେ ହେଁ ସୁଫଳ ମିଳୁନାହିଁ। ସୋମବାର ବୀରମହାରାଜପୁରରେ ଚାଲିଥିବା ଜିଲାପାଳ ଓ ଏସ୍ପିଙ୍କ ଯୁଗ୍ମ ଅଭିଯୋଗ ଶୁଣାଣି ଶିବିରରେ ଯୁବ କଂଗ୍ରେସ ତରଫରୁ ଦାବିପତ୍ର ପ୍ରଦାନ କରାଯାଇଛି। ଜିଲା ଯୁବ କଂଗ୍ରେସ ସଭାପତି ପ୍ରିୟବ୍ରତ ସାହୁଙ୍କ ନେତୃତ୍ୱରେ ଜିଲା ପରିଷଦ ସଭ୍ୟ ଲବକୁମାର ସାହୁ, ବ୍ଲକ ଯୁବ କଂଗ୍ରେସ ସଭାପତି ବିଦ୍ୟାଧର ଖୁର୍ଡିଆ, ବ୍ଲକ କଂଗ୍ରେସ ସଭାପତି ବସନ୍ତ ମହାକୁରଙ୍କ ସମେତ ବହୁ ନେତା ଓ କର୍ମୀ ବ୍ଲାଷ୍ଟିଂ ବନ୍ଦ ସହ ମତ୍ସଜୀବୀଙ୍କ ଜୀବିକା ଏବଂ ମହାନଦୀରେ ବିଭିନ୍ନ ପ୍ରଜାତିର ମାଛ ବଂଶ ବୃଦ୍ଧିରେ ସହାୟକ ପାଇଁ ପଦକ୍ଷେପ ନେବାକୁ ଜିଲାପାଳଙ୍କୁ ଫେରାଦ ହୋଇଥିଲେ। ଜିଲାପାଳ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଉପଜିଲାପାଳ ଅଶୋକ କୁମାର ଭୋଇଙ୍କୁ ନିର୍ଦ୍ଦେଶ ଦେଇଥିବା ଜଣାପଡିଛି।
