ସୁନ୍ଦରଗଡ,୨୩।୪(ଜୟ ନାରାୟଣ ମେଣ୍ଡୁଳି): କର୍ମଚାରୀମାନଙ୍କୁ ଦୁର୍ବ୍ୟବହାର କରିବା ଅଧିକାରୀଙ୍କୁ ପଡିଛି ମହଙ୍ଗା । ଆଜି ଏଭଳି ଏକ ଘଟଣା ଦେଖିବାକୁ ମିଳିଥିଲା ସୁନ୍ଦରଗଡ ସହର ମଧ୍ୟ ଭାଗରେ ଥିବା କ୍ଷୁଦ୍ର ଜଳସେଚନ ବିଭାଗ, ଡିଭିଜନ କାର୍ଯ୍ୟାଳୟ ମଧ୍ୟରେ। ଏହି ଡିଭିଜନରେ କାର୍ଯ୍ୟରତ ୩ଜଣ ସହକାରୀ ଯନ୍ତ୍ରୀ, ୫ଜଣ କନିଷ୍ଠ ଯନ୍ତ୍ରୀଙ୍କ ସମେତ ୩୦ରୁ ଉର୍ଦ୍ଧ ମହିଳା ଓ ପୁରୁଷ କର୍ମଚାରୀ ଅଧୀକ୍ଷଣ ଯନ୍ତ୍ରୀ ଧୀରେନ୍ଦ୍ର କୁମାର ନାଏକଙ୍କ ସହ ତାଙ୍କ ପ୍ରକୋଷ୍ଠରେ ପ୍ରାୟ ୩ଘଣ୍ଟା କାଳ ଯୁକ୍ତିତର୍କ ଓ ପାଟିତୁଣ୍ଡ ଘଟଣା ଦେଖିବାକୁ ମିଳିଥିଲା। କର୍ମଚାରୀମାନଙ୍କ ପ୍ରତି ଅଧିକାରୀଜଣଙ୍କ ବିଭିନ୍ନ ସମୟରେ ଉଦ୍ଦେଶ୍ୟମୂଳକ ଭାବେ ଗାଳିଗୁଲଜ କରି ମାନସିକ ନିର୍ଯାତନା ଦେଉଥିବା କର୍ମଚାରୀମାନେ ଖୋଲାଖୋଲି ଅଭିଯୋଗ କରିଥିଲେ। ଏପରିକି ତଳକର୍ମଚାରୀଙ୍କଠାରୁ ଆରମ୍ଭ କରି ମହିଳା ଯନ୍ତ୍ରୀ, ସହକାରୀ ଯନ୍ତ୍ରୀ ଓ କର୍ମଚାରୀ ମାନଙ୍କୁ ବିଳମ୍ବିତ ରାତି ପର୍ଯ୍ୟନ୍ତ ଅଫିସ ଡକାଇ କାର୍ଯ୍ୟ କରାଇବା ସହ ଗାଳିମନ୍ଦ କରୁଥିବା ଅଭିଯୋଗ ହୋଇଥିଲା। ଏଭଳି ପରିସ୍ଥିତିରେ କର୍ମଚାରୀମାନେ କାର୍ଯ୍ୟ ଛାଡିବେ ନ ହେଲେ ଆପଣ ଏଠାରୁ ଅନ୍ୟତ୍ର ବଦଳି ହୋଇ ଚାଲିଯିବାକୁ କହିଥିଲେ।
ଅଧିକାରୀଙ୍କ ଏଭଳି ବ୍ୟବହାର ସମ୍ପର୍କରେ କର୍ମଚାରୀମାନେ ଅଭିଯୋଗ କରିଆସୁଥିଲେ ମଧ୍ୟ ଏଦିଗରେ କୌଣସି ପରିବର୍ତ୍ତନ ନ ହେବା ପରେ ଗୁରୁବାର ଏମପି ତଥା କେନ୍ଦ୍ର ମନ୍ତ୍ରୀ ଜୁଏଲ ଓରାମଙ୍କ ପ୍ରତିନିଧି ସୁଖଲାଲ ମୁଣ୍ଡାଙ୍କ ଉପସ୍ଥିତିରେ ଏହି ପ୍ରସଙ୍ଗରେ କର୍ମଚାରୀମାନେ ଅଧୀକ୍ଷଣ ଯନ୍ତ୍ରୀ ନାଏକଙ୍କ ସହ ଆଲୋଚନା ହୋଇଥିଲା। ଆଲୋଚନା ବେଳେ କର୍ମଚାରୀମାନେ ନିଜର ଅସନ୍ତୋଷ ପ୍ରକାଶ କରିଥିଲେ। ଅଧୀକ୍ଷଣ ଯନ୍ତ୍ରୀ ନାଏକ ନିଜର ଏଭଳି ବ୍ୟବହାର ଆଗକୁ ପୁନର୍ବାର ନ କରିବା ପାଇଁ କର୍ମଚାରୀମାନଙ୍କୁ କହିଥିଲେ। ହେଲେ କର୍ମଚାରୀମାନେ ଏଠାରୁ ତାଙ୍କର ବଦଳି ଜିଦରେ ଅଟଳ ରହିଥିଲେ। ଫଳରେ ଅଧୀକ୍ଷଣ ଯନ୍ତ୍ରୀ ସେଠାରୁ ଅଫିସ ପ୍ରକୋଷ୍ଠରୁ ଉଠି ଚାଲିଯାଇଥିଲେ। ପରେ କର୍ମଚାରୀମାନେ ଅଫିସ ବାହାରକୁ ଆସି ତାଙ୍କ ବଦଳି ଦାବିରେ ନାରା ଦେବା ସହ ବଦଳି ନ ହେବା ପର୍ଯ୍ୟନ୍ତ କାର୍ଯ୍ୟ ବନ୍ଦ ଆନ୍ଦୋଳନ ପାଇଁ ଚେତାବନୀ ଦେଇଛନ୍ତି। ଅପରପକ୍ଷରେ ଅଧୀକ୍ଷଣ ଯନ୍ତ୍ରୀ ନାଏକ କାର୍ଯ୍ୟ ସୂଚାରୁ ରୂପେ ସମ୍ପାଦନ କରିବା ପାଇଁ କିଛି କର୍ମଚାରୀଙ୍କୁ ତାଗିଦ କରିଥିଲେ। ହେଲେ ଉଦ୍ଦେଶ୍ୟମୂଳକ ଭାବରେ କୌଣସି କର୍ମଚାରୀମାନଙ୍କୁ ଗାଳିମନ୍ଦ କରିବା ଅଭିଯୋଗକୁ ଖଣ୍ଡନ କରିଛନ୍ତି।
