କେନ୍ଦୁଝର/ହାଟଡିହୀ/ଆନନ୍ଦପୁର,୨୩।୪(ନରେଶ ଚନ୍ଦ୍ର ପଟ୍ଟନାୟକ, ଶୁଭକାନ୍ତ ନାୟକ, ସୁଶାନ୍ତ କୁମାର ସାହୁ): କେନ୍ଦୁଝର ଜିଲା ଖଣିଜ ପ୍ରତିଷ୍ଠାନ (DMF) କାର୍ଯ୍ୟାଳୟର ଜଣେ କର୍ମଚାରୀଙ୍କୁ ଚାକିରିରୁ ବିଦା କରିବା ଘଟଣାରେ ମାନ୍ୟବର ଓଡ଼ିଶା ହାଇକୋର୍ଟ କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ଏହି ମାମଲାରେ କୋର୍ଟ କେନ୍ଦୁଝର ଜିଲାପାଳଙ୍କୁ ନୋଟିସ ଜାରି କରିବା ସହ କର୍ମଚାରୀଙ୍କ ଆବେଦନକୁ ଆଇନ ଅନୁଯାୟୀ ବିଚାର କରିବାକୁ ନିର୍ଦ୍ଦେଶ ଦେଇଛନ୍ତି।
DMF କାର୍ଯ୍ୟାଳୟରେ କାର୍ଯ୍ୟରତ କର୍ମଚାରୀ ରଞ୍ଜିତ ସାହୁ ବର୍ଦ୍ଧିତ ଦରମା ଦାବି କରିବାରୁ ତାଙ୍କୁ କୌଣସି ନୋଟିସ ନଦେଇ ମୌଖିକ ଭାବେ ଚାକିରିରୁ ବାହାର କରିଦିଆଯାଇଥିବା ଅଭିଯୋଗ ହୋଇଥିଲା। ଏହାକୁ ବିରୋଧ କରି ରଞ୍ଜିତ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଘଟଣାରେ ତୃତୀୟ ଥର ଲାଗି ଦାୟର ମାମଲା (କେସ ନଂ WP(C)-୧୧୭୪୨/୨୦୨୬ )ର ଶୁଣାଣି କରି ଗତ ୨୨ ତାରିଖ ବୁଧବାର ଦିନ ହାଇକୋର୍ଟ ଜିଲାପାଳଙ୍କୁ କୈଫିୟତ ମାଗିଛନ୍ତି। ଯଦି କର୍ମଚାରୀ ଜଣକ ଚାକିରି ବଜାୟ ରଖିବା ପାଇଁ ଲିଖିତ ଆବେଦନ କରନ୍ତି, ତେବେ ଜିଲାପାଳ ତାହାକୁ ଆଇନଗତ ଭାବେ ବିଚାର କରିବାକୁ କୋର୍ଟ କହିଛନ୍ତି।
ଏହା ପୂର୍ବରୁ ମଧ୍ୟ ହାଇକୋର୍ଟ ୧୦ ଡିସେମ୍ବର ୨୦୨୫ରେ ଏହି ଅଭିଯୋଗର ବିଚାର ପାଇଁ ୪ ସପ୍ତାହ ସମୟ ଦେଇଥିଲେ। ମାତ୍ର ନିର୍ଦ୍ଧାରିତ ସମୟରେ ନିର୍ଦ୍ଦେଶ ପାଳନ ନ ହେବାରୁ ଜିଲାପାଳ ବିଶାଲ ସିଂଙ୍କ ନାମରେ ଅଦାଲତ ଅବମାନନା ମାମଲା (CONTC-୧୮୭୦/୨୦୨୬) ଦାୟର ହୋଇଥିଲା।
ସୂଚନାଯୋଗ୍ୟ, ଜିଲାପାଳ ଏପ୍ରିଲ ୨ରେ ଏକ ଅର୍ଡର ପ୍ରକାଶ କରିଥିଲେ। ଏଥିରେ ଅର୍ଡର ନଂ ୬୧୧/୯ ମାର୍ଚ୍ଚ ୨୦୨୬ ବୋଲି ଉଲ୍ଲେଖ ଥିବା ବେଳେ ୨୧ ଦିନ ପରେ ଅର୍ଥାତ ଚଳିତ ମାସ ଗତ ଏପ୍ରିଲ ୨ ରେ ମେଲ ଜରିଆରେ ଅଭିଯୋଗକାରୀ ରଞ୍ଜିତଙ୍କୁ ପ୍ରେରଣ କରିଥିଲେ, ଯେଉଁଥିରେ ଚାକିରିରୁ ବାହାର କରାଯିବା ନେଇ କୌଣସି ଉଲ୍ଲେଖ ନ ଥିଲା। ଏହି ଆଧାରରେ ରଞ୍ଜିତ ଏପ୍ରିଲ ୪ରେ କାର୍ଯ୍ୟରେ ଯୋଗ ଦେବାକୁ ଯାଇଥିବା ବେଳେ DMF ସିଇଓ ଡ. ରୀନା ପ୍ରଧାନ ତାଙ୍କୁ ବାରଣ କରିଥିଲେ। ଜଣେ ଆଇଏଏସ ଅଧିକାରୀଙ୍କ ଏଭଳି ପଦକ୍ଷେପ ଏବଂ କୋର୍ଟଙ୍କ ନିର୍ଦ୍ଦେଶ ପରେ ମଧ୍ୟ କାର୍ଯ୍ୟରେ ଅବହେଳାକୁ ନେଇ ଏବେ ସାଧାରଣରେ ଚର୍ଚ୍ଚା ଜୋର ଧରିଛି।
ପ୍ରକାଶ ଥାଉ କି, ସିଇଓ ଭାବେ ଡ. ରୀନା ପ୍ରଧାନ (ଆଇଏଏସ )ଗତ ଜୁଲାଇ ୨୦୨୫ରୁ ଏଠାରେ ଦାୟିତ୍ୱ ନିର୍ବାହ କରୁଛନ୍ତି।
