କୋଲକାତା,୨୩।୪: 2026 ପଶ୍ଚିମବଙ୍ଗ ବିଧାନସଭା ନିର୍ବାଚନ ପୁଣି ଥରେ ଦେଶର ଦୃଷ୍ଟି ଆକର୍ଷଣ କରିଛି। ନିର୍ବାଚନ ବେଳେ ବିଭିନ୍ନ ସ୍ଥାନରେ ହିଂସା, ବୋମାମାଡ଼, ସଂଘର୍ଷ ଖବର ଆସିଥିବା ବେଳେ ସନ୍ଧ୍ୟା ୫ଟା ସୁଦ୍ଧା ପ୍ରାୟ ୯୦ ପ୍ରତିଶତ ମତଦାନ ହୋଇଥିବା ନିର୍ବାଚନ କମିଶନଙ୍କ ତଥ୍ୟ ଅନୁସାରେ ସୂଚନା ମିଳିଛି। ଅନ୍ୟପକ୍ଷେ ପଶ୍ଚିମବଙ୍ଗରେ ଏଥର ଐତିହାସିକ ୯୫ ପ୍ରତିଶତ ମତଦାନରେ ପହଞ୍ଚିପାରେ ବୋଲି ରାଜନୈତିକ ବିଶେଷଜ୍ଞ ଆକଳନ କରିଛନ୍ତି।
ମତଦାନ ଆରମ୍ଭରୁ ବିଭିନ୍ନ ପୋଲିଂ ବୁଥରେ ଭୋଟ ଦେବାଲାଗି ଲୋକଙ୍କ ଲମ୍ବା ଧାଡ଼ି ଦେଖିବାକୁ ମିଳିଥିଲା। ଗ୍ରାମାଞ୍ଚଳରୁ ସହରାଞ୍ଚଳ ସବୁଠି ମହିଳା, ବୟସ୍କ ଏବଂ ଯୁବକମାନେ ବହୁ ସଂଖ୍ୟାରେ ମତଦାନ କେନ୍ଦ୍ରକୁ ଆସିଥିଲେ। ମାଳତୀପୁରର ଏକ ମତଦାନ କେନ୍ଦ୍ରରେ ଜଣେ ମହିଳା ମତଦାତାଙ୍କ ମୃତ୍ୟୁ ଘଟିଥିବା ସୂଚନା ମିଳିଛି। ଏହି ଦୁଃଖଦ ଘଟଣା ସତ୍ତ୍ୱେ ଭୋଟ ଦେବାକୁ ଜନସାଧାରଣଙ୍କ ଉତ୍ସାହକୁ ହ୍ରାସ ପାଇ ନ ଥିବା ଦେଖିବାକୁ ମିଳିଛି।
ସୂଚନା ଯୋଗ୍ୟ, ଅପରାହ୍ନ ୩ଟା ସୁଦ୍ଧା ମତଦାନ ୭୮.୭୭ ପ୍ରତିଶତ ଅତିକ୍ରମ କରିବା ମାତ୍ରେ ସ୍ପଷ୍ଟ ହୋଇଥିଲା ଯେ, ଏଥର ମତଦାନ ଏକ ରେକର୍ଡ ହେବାର ସମ୍ଭାବନା ରହଇଛି। ସନ୍ଧ୍ୟା ସୁଦ୍ଧା, ଏହି ସଂଖ୍ୟା ୮୯.୨୪ ପ୍ରତିଶତରେ ପହଞ୍ଚି ଥିବା ବେଳେ ଯାହା ନିର୍ବାଚନ ସମୀକରଣକୁ ଆହୁରି ଆକର୍ଷଣୀୟ କରିଦେଇଛି।
ପଶ୍ଚିମବଙ୍ଗ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟରେ ୧୫୨ଟି ଆସନ ପାଇଁ ମୋଟ ୧୪୭୮ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଛନ୍ତି। ରାଜ୍ୟର ୩ କୋଟି ୬୦ ଲକ୍ଷ ଭୋଟର ମତଦାନ ଦେବେ। ଭାଜପା ସମସ୍ତ ୧୫୨ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଥିବା ବେଳେ ଟିଏମ୍ସି ୧୪୮ଟି ଆସନରେ ପ୍ରତିଦ୍ୱନ୍ଦ୍ୱିତା କରୁଛି।
