ମୁମ୍ବାଇ,୨୩ା୪: ଚଳିତ ଆଇପିଏଲ୍ରେ ଗୁରୁବାର ଖେଳାଯାଇଥିବା ମ୍ୟାଚ୍ରେ ଦୁଇ ଚିରପ୍ରତିଦ୍ୱନ୍ଦ୍ୱୀ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଏବଂ ମୁମ୍ବାଇ ଇଣ୍ଡିଆନ୍ସ (ଏମ୍ଆଇ) ପରସ୍ପରକୁ ଭେଟିଛନ୍ତି। ସଞ୍ଜୁ ସାମସନଙ୍କ ବିସ୍ଫୋରକ ଶତକ ବଳରେ ସିଏସ୍କେ ପ୍ରତିପକ୍ଷ ମୁମ୍ବାଇ ସମ୍ମୁଖରେ ୨୦୮ ରନ୍ର ଚ୍ୟାଲେଞ୍ଜିଂ ଟାର୍ଗେଟ ଛିଡ଼ା କରିଛି।
ହାଇ ସ୍କୋରିଂ ପିଚ୍ରେ ମୁମ୍ବାଇ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମେ ବ୍ୟାଟିଂ କରିଥିବା ସିଏସ୍କେ ପାଇଁ ଫର୍ମରେ ଥିବା ସାମସନ ଗୋଟିଏ ପକ୍ଷ ସମ୍ଭାଳି ରଖିଥିବା ବେଳେ ଅନ୍ୟ ବ୍ୟାଟରମାନେ ତାଙ୍କୁ ଉପଯୋଗୀ ସମର୍ଥନ ପ୍ରଦାନ କରିଥିଲେ। ଅଧିନାୟକ ଋତୁରାଜ ଗାଏକ୍ୱାଡ ଓ ସାମସନ ୩ ଓଭରରେ ଦଳୀୟ ସ୍କୋରକୁ ୩୨ ରନରେ ପହଞ୍ଚାଇଥିଲେ। ଏପର୍ଯ୍ୟନ୍ତ ଫର୍ମ ସହ ସଂଘର୍ଷ କରୁଥିବା ଋତୁରାଜ ୧୪ ବଲରେ ୨୨ (୩ ଚୌକା ଓ ୧ ଛକା) ରନ କରି ପ୍ରଥମ ବ୍ୟାଟର ଭାବେ ଆଉଟ୍ ହୋଇଥିଲେ। ତାଙ୍କ ପରେ ସର୍ଫରାଜ ଖାନ (୮ ବଲ, ୧୪ ରନ ଓ ୩ ଚୌକା) ଷଷ୍ଠ ଓଭରରେ ମିଚେଲ ସାଣ୍ଟନରଙ୍କ ବଲରେ କ୍ଲିନ ବୋଲ୍ଡ ହୋଇଥିଲେ। ସିଏସ୍କେ ପାଓ୍ବାରପ୍ଲେରେ ୨ ଉଇକେଟ ହରାଇବା ସତ୍ତ୍ୱେ ୭୩ ରନ କରିଥିଲା। ନଂ.୪ରେ ଆସିଥିବା ଶିବମ ଦୁବେ (୫) ବିଫଳ ହୋଇଥିବା ବେଳେ ଡଓ୍ବୋଲ୍ଡ ବ୍ରେଭିସ ଆଟାକିଂ ବ୍ୟାଟିଂ କରି ୧୧ ବଲରେ ୨୧ (୧ ଚୌକା ଓ ୨ ଛକା) ରନ କରି ଆଉଟ୍ ହୋଇଥିଲେ। ଫଳରେ ସିଏସ୍କେ ୧୧ ଓଭରରେ ୪ ଉଇକେଟ ହରାଇ ୧୨୨ ରନ କରିଥିଲା। ଏହିଠାରୁ ସାମସନ ଓ କାର୍ତ୍ତିକ ଶର୍ମା (୧୮ ରନ, ୨ ଛକା) ପଞ୍ଚମ ଉଇକେଟରେ ୪୩ ରନ ଯୋଡ଼ିଥିଲେ। ଜେମି ଓଭରଟନ ୭ ବଲରେ ୧୫ (୨ ଚୌକା ଓ ୧ ଛକା) ରନ କରି ପାଭିଲିଅନ ଫେରିଥିଲେ। ଅନ୍ତିମ ଓଭରରେ ସାମସନ ୨ ଛକା ଓ ୧ ଚୌକା ମାରି ଶତକ ପୂରଣ କରିବା ସହ ଦଳୀୟ ସ୍କୋରକୁ ୨୦୦ ଅତିକ୍ରମ କରାଇଥିଲେ। ଫଳରେ ସିଏସ୍କେ ୨୦ ଓଭରରେ ୬ ଉଇକେଟ ହରାଇ ୨୦୭ ରନ କରିଥିଲା। ସାମସନ ୫୪ ବଲରେ ୧୦ ଚୌକା ଓ ୬ ଛକା ସହିତ ୧୦୧ ରନ କରି ଅପରାଜିତ ରହିଥିଲେ। ଏହା ଚଳିତ ସିଜନରେ ତାଙ୍କର ଦ୍ୱିତୀୟ ଓ ମୋଟ ଉପରେ ପଞ୍ଚମ ଆଇପିଏଲ୍ ଶତକ।
