ଓ୍ବାଶିଂଟନ,୨୧।୩ : ଆମେରିକାରେ ମଧ୍ୟ ପାକିସ୍ତାନ ପରି ତୋସାଖାନା ଦୁର୍ନୀତି ମାମଲା ସାମ୍ନାକୁ ଆସିଛି। ଅଭିଯୋଗ ହୋଇଛି ଯେ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରାଷ୍ଟ୍ରପତି ଥିବାବେଳେ କୋଟି କୋଟି ଟଙ୍କାର ଉପହାର ହଡ଼ପ କରି ନେଇଛନ୍ତି। ଏକ ରିପୋର୍ଟରେ କୁହାଯାଇଛି ଯେ ଡୋନାଲ୍ଡ ଟ୍ରମ୍ପ ଏବଂ ତାଙ୍କ ପରିବାରକୁ ବିଦେଶୀ ନେତାଙ୍କ ଦ୍ୱାରା ଦିଆଯାଇଥିବା ୨ ଲକ୍ଷ ୫୦ ହଜାର ଡଲାର (ଦୁଇ କୋଟି ଟଙ୍କା) ଉପହାର ସମ୍ପର୍କରେ ପ୍ରକାଶ କରିବାକୁ ବିଫଳ ହୋଇଛନ୍ତି।
ଡେମୋକ୍ରାଟ୍ସ କମିଟିର ରିପୋର୍ଟରେ ଏହି ଅଭିଯୋଗ କରାଯାଇଛି। ଏହି ରିପୋର୍ଟରେ ଦର୍ଶାଯାଇଛି ଯେ ଟ୍ରମ୍ପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ପୂର୍ବତନ ରାଷ୍ଟ୍ରପତି ରାମ ନାଥ କୋବିନ୍ଦ ଏବଂ ୟୁ.ପି.ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଠାରୁ ଗ୍ରହଣ କରିଥିବା ଉପହାର ସମ୍ପର୍କରେ ମଧ୍ୟ ତଥ୍ୟ ପ୍ରକାଶ କରାଯାଇ ନାହିଁ। ଏହି ଉପହାରଗୁଡ଼ିକର ମୂଲ୍ୟ ପ୍ରାୟ ୪୭ ହଜାର ଡଲାର।
ରିପୋର୍ଟ ଅନୁଯାୟୀ, ଡକ୍ୟୁମେଣ୍ଟଗୁଡିକରୁ ଜଣାପଡିଛି ଯେ ଟ୍ରମ୍ପ ପରିବାର ଭାରତରୁ ମୋଟ ୧୭ଟି ଅଜ୍ଞାତ ଉପହାର ଗ୍ରହଣ କରିଛନ୍ତି। ଏହି ଉପହାରଗୁଡ଼ିକ ମଧ୍ୟରେ ଯୋଗୀ ଆଦିତ୍ୟନାଥଙ୍କ ୮,୫୦୦ ଡଲାରର ଫୁଲ ପାତ୍ର, ୪,୬୦୦ ଡଲାରର ତାଜମହଲର ମଡେଲ, ପୂର୍ବତନ ରାଷ୍ଟ୍ରପତି କୋବିନ୍ଦଙ୍କର ୬,୬୦୦ ଡଲାର ଭାରତୀୟ ଗାମୁଛା, ପ୍ରଧାନମନ୍ତ୍ରୀ ମୋଦିଙ୍କର ୧,୯୦୦ ଡଲାରର କଫଲିଙ୍କ ରହିଛି।
ଏହି ନିଖୋଜ ବଡ ଉପହାର ଖୋଜିବା ପାଇଁ ଡେମୋକ୍ରାଟ୍ସ କମିଟି ଦାବି କରିଛି । ଏହି ଉପହାରଗୁଡ଼ିକରେ ଗଲ୍ଫ କ୍ଲବ, ଏଲ ସାଲଭାଡୋରର ଟ୍ରମ୍ପଙ୍କ ଫଟୋ ଏବଂ ଅନ୍ୟାନ୍ୟ ଅଜ୍ଞାତ ଉପହାର ଅନ୍ତର୍ଭୁକ୍ତ। ରାଷ୍ଟ୍ରପତିଙ୍କୁ ପ୍ରଭାବିତ କରିବା ପାଇଁ ଏଗୁଡିକ ବ୍ୟବହୃତ ହୋଇଛି କି ନାହିଁ କମିଟି ମଧ୍ୟ ଅନୁସନ୍ଧାନ କରୁଛି। ରିପୋର୍ଟରେ ଆହୁରି କୁହାଯାଇଛି ଯେ ଟ୍ରମ୍ପ ଏବଂ ତାଙ୍କ ପରିବାର ୧୦୦ ରୁ ଅଧିକ ବିଦେଶୀ ଉପହାରର ହିସାବ କରିବାରେ ବିଫଳ ହୋଇଥିଲେ। ଏହି ଉପହାରଗୁଡ଼ିକର ମୂଲ୍ୟ ଏକ ଲକ୍ଷ ଡଲାରରୁ ଅଧିକ ବୋଲି କୁହାଯାଉଛି।
