ସୋନପୁର,୧୫।୪(ମୃତ୍ୟୁଞ୍ଜୟ ଶତପଥୀ): ସୁବର୍ଣ୍ଣପୁର ସହର ସ୍ଥିତ ଏସ୍ବିଆଇ ମୁଖ୍ୟ ଶାଖା ସମ୍ମୁଖରେ ପୋଲିସ ଚଢାଉ କରି ବିପୁଳ ପରିମାଣର ଜାଲ ନୋଟ ଜବତ କରିଛି । ଏଥିରେ ଏକ ର଼୍ୟାକେଟ୍ କାମ କରୁଛି। ପଡୋଶୀ ଜିଲା ବରଗଡ ଓ ପଡୋଶୀ ରାଜ୍ୟ ଛତିଶଗଡକୁ ମଧ୍ୟ ଏହି ଅପରାଧର ଚେର ଲମ୍ବିଛି । ୨ ଜଣ ଯୁବକ ଏକ କଳା ରଙ୍ଗର ସ୍କୋର୍ପିଓରେ ଆସି ଜାଲ ନୋଟ କାରବାର କରୁଥିବା ସୁବର୍ଣ୍ଣପୁର ପୋଲିସକୁ ବିଶ୍ୱସ୍ତ ସୂତ୍ରରୁ ସୂଚନା ମିଳିଥିଲା। ସୋନପୁର ଟାଉନ ପୋଲିସ ଆଇଆଇସି ଯାଦବ ବାଗଙ୍କ ନେତୃତ୍ୱରେ ମଙ୍ଗଳବାର ବିଳମ୍ବିତ ରାତିରେ ପୋଲିସ ଟିମ୍ ସହରରେ ପେଟ୍ରୋଲିଂ କରୁଥିଲେ।
ଏକ କଳା ରଙ୍ଗର ସ୍କୋର୍ପିଓ କ୍ଲାସିକ୍ ଏସ ୧୧(ନଂ ଓଡି୩୪ଜେଡ-୧୯୧୯)କୁ ଏସଆଇ ଅନିଲ ବେହେରା ଅଟକ ରଖି ତନଖି କରିବା ସମୟରେ ନୀଳ ରଙ୍ଗର ବ୍ୟାଗ୍ରୁ ୫୦୦ଟଙ୍କିଆ ଜାଲ ନୋଟ ବଣ୍ଡଲ ମିଳିଥିଲା ବୋଲି ଏସ୍ପି ନାରାୟଣ ନାୟକ ବୁଧବାର ଜିଲା ପୋଲିସ ମୁଖ୍ୟାଳୟରେ ଆୟୋଜିତ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ଏସ୍ପି କହିଛନ୍ତି ଏହା ଜାଲ ନୋଟ ବୋଲି ଖାଲି ଆଖିରେ ଦେଖିଲେ ଜଣା ପଡିଯାଉଛି। ସେହିପରି ସବୁ ନୋଟର କ୍ରମିକ ନଂ ୦୦ ୦୦ ୦୦ ଥିଲା। ଗଣତି ପରେ ୫୦୦ଟଙ୍କିଆ ମୋଟ ୧୬୯୫ଟି ଜାଲ ନୋଟ ଜବତ ହୋଇଥିଲା। ଏହାର ସମୁଦାୟ ମୂଲ୍ୟ ୮ଲକ୍ଷ ୪୭ହଜାର ୫୦୦ଟଙ୍କା। ଏହି ଘଟଣାରେ ପୋଲିସ ଯାଜପୁର ଜିଲା ଯାଖପୁରା ଅଞ୍ଚଳର ଅଭିଳାଶ ପୁରୁଷୋତ୍ତମ ଶତପଥୀ(୨୧) ଓ ନୟାଗଡ ଜିଲା ଖନପା ଥାନା ମର୍ଦ୍ଦରାଜପୁର ଅଞ୍ଚଳର ପ୍ରଶାନ୍ତ ଦାସ(୩୪)ଙ୍କୁ ଗିରଫ କରିଛି। ଉଭୟଙ୍କ ନିକଟରୁ ଜାଲ ଭାରତୀୟ ମୁଦ୍ରା ନୋଟ, ସ୍କୋର୍ପିଓ ଓ ୨ଟି ମୋବାଇଲ ପୋଲିସ ଜବତ କରିଥିବା ଏସ୍ପି କହିଛନ୍ତି । ଏ ନେଇ ସୋନପୁର ଥାନାରେ ଏକ ମାମଲା(ନଂ.୧୨୬/୨୬) ରୁଜୁ ହୋଇଛି। ଏହି ଜାଲ ନୋଟ କାରବାରରେ ବରଗଡ ଓ ଛତିଶଗଡର ଲିଙ୍କ୍ ମିଳିଛି। ଅଧିକ ତଦନ୍ତ ଜାରି ରହିଛି। ଏସ୍ଆଇ ସୁକାନ୍ତ ଜେନା ମାମଲାର ତଦନ୍ତ କରୁଛନ୍ତି।
ଏସ୍ପି ନାୟକ କହିଛନ୍ତି, ଜାଲନୋଟ କାରବାର ସମ୍ପର୍କରେ ଗୋଇନ୍ଦା ସୂତ୍ରରୁ ସୂଚନା ମିଳିଥିଲା। ତଦନୁଯାୟୀ ସହରରେ ପୋଲିସ ପେଟ୍ରୋଲିଂ କଡାକଡି କରାଯାଇଥିଲା। ଏହି ର଼୍ୟାକେଟ୍ରେ ଅନ୍ୟ କେଉଁମାନେ ସମ୍ପୃକ୍ତ ଅଛନ୍ତି ଓ ବଜାରକୁ କେତେ ପରିମାଣର ଜାଲ ନୋଟ ଛଡାଯାଇଛି ସେ ନେଇ ଅଧିକ ତଦନ୍ତ ଜାରି ରହିଛି । ଜବତ ନୋଟ ଗୁଡିକୁ ପରୀକ୍ଷା ପାଇଁ ଆରବିଆଇର କଲିକତା ସ୍ଥିତ ଆଞ୍ଚଳିକ କାର୍ଯ୍ୟାଳୟକୁ ପଠାଯିବ ବୋଲି ଏସ୍ପି କହିଛନ୍ତି । ତେବେ ଜିଲାର ବିଭିନ୍ନ ସ୍ଥାନରୁ ଜାଲ ନୋଟ ଜବତ ହେବା ସାଧାରଣ ଲୋକଙ୍କୁ ଚିନ୍ତାରେ ପକାଇଛି। ଏହି ସମ୍ମିଳନୀରେ ଅତିରିକ୍ତ ଏସ୍ପି କେ କେ ହରିପ୍ରସାଦ ଉପସ୍ଥିତ ଥିଲେ।
