ନୂଆଦିଲ୍ଲୀ,୧୫।୪: ଭାରତୀୟ ପ୍ରିମିୟର ଲିଗ୍ ର ଏକ ରୋମାଞ୍ଚକର ମୁକାବିଲାରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ନିଜର ଘରୋଇ ଗ୍ରାଉଣ୍ଡ ଏମ୍.ଏ. ଚିନ୍ନାସ୍ୱାମୀ ଷ୍ଟାଡିୟମରେ ଲକ୍ଷ୍ନୌ ସୁପର ଜାଏଣ୍ଟସ (LSG) କୁ ପରାସ୍ତ କରିଛି। ବୋଲରଙ୍କ ଶାଣିତ ବୋଲିଂ ପରେ ବ୍ୟାଟରଙ୍କ ବିସ୍ଫୋରକ ପ୍ରଦର୍ଶନ ବଳରେ ଆରସିବି ଏହି ମ୍ୟାଚକୁ ୫ ଉଇକେଟରେ ଜିତି ନେଇଛି। ଏହି ବିଜୟ ସହ ଆରସିବି ପ୍ରଥମ ଥର ପାଇଁ ନିଜ ଘରୋଇ ମଇଦାନରେ ଲକ୍ଷ୍ନୌକୁ ହରାଇବାରେ ସଫଳ ହୋଇଛି।
ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ ଆରସିବି ଅଧିନାୟକ ରଜତ ପାଟିଦାର। ଆରମ୍ଭରୁ ହିଁ ଲକ୍ଷ୍ନୌ ବ୍ୟାଟରମାନେ ସଂଘର୍ଷ କରୁଥିବା ଦେଖିବାକୁ ମିଳିଥିଲା।ଏଡେନ ମାତ୍ର ୧୨ ରନ କରି ଆଉଟ୍ ହୋଇଥିବାବେଳେ, ଅଧିନାୟକ ଋଷଭ ପନ୍ତ ଆହତ କାରଣରୁ କିଛି ସମୟ ପାଇଁ ପଡ଼ିଆ ବାହାରକୁ ଯାଇଥିଲେ। ପରେ ସେ ଫେରିଥିଲେ ମଧ୍ୟ ମାତ୍ର ୧ ରନ କରି ଆଉଟ୍ ହୋଇଥିଲେ। ଲକ୍ଷ୍ନୌ ପକ୍ଷରୁ ଆୟୁଷ ବଦୋନୀ (୩୮) ଏବଂ ମୁକୁଲ ଚୌଧୁରୀ (୩୯)ଲଢୁଆ ବ୍ୟାଟିଂ କରି ଦଳୀୟ ସ୍କୋରକୁ ୧୪୬ ପର୍ଯ୍ୟନ୍ତ ନେଇଥିଲେ। ଆରସିବି ପକ୍ଷରୁ ରସିଖ ଦାର ସର୍ବାଧିକ ୪ଟି ଉଇକେଟ ନେଇଥିବା ବେଳେ ଭୁବନେଶ୍ୱର କୁମାର ୩ଟି ଓ କୃନାଲ ପାଣ୍ଡ୍ୟା ୨ଟି ଉଇକେଟ ହାସଲ କରିଥିଲେ।
୧୪୭ ରନର ବିଜୟ ଲକ୍ଷ୍ୟକୁ ପିଛା କରି ଆରସିବି ଟିମ୍ ବିରାଟ କୋହଲିଙ୍କୁ ‘ଇମ୍ପାକ୍ଟ ପ୍ଲେୟାର’ ଭାବେ ପଡ଼ିଆକୁ ଓହ୍ଲାଇଥିଲା। କୋହଲି ଆରମ୍ଭରୁ ହିଁ ଆକ୍ରମଣାତ୍ମକ ବ୍ୟାଟିଂ କରି ୩୪ ବଲରେ ୪୯ ରନ (୬ ଚୌକା, ୧ ଛକା) ସଂଗ୍ରହ କରି ଜିତିବା ସହଜ କରିଦେଇଥିଲେ। ଦେବଦତ୍ତ ପଡିକଲ କୋହଲିଙ୍କ ସହ ମିଶି ଦ୍ୱିତୀୟ ଉଇକେଟ ପାଇଁ ଗୁରୁତ୍ୱପୂର୍ଣ୍ଣ ଭାଗିଦାରୀ କରିଥିଲେ। ରଜତ ପାଟିଦାର ମାତ୍ର ୧୩ ବଲରେ ୨୭ ରନ କରିଥିଲେ। ଶେଷରେ ଟିମ୍ ଡେଭିଡ୍ ଏବଂ ରୋମାରିଓ ଶେଫର୍ଡ ମ୍ୟାଚକୁ ୧୫.୧ ଓଭରରେ ଶେଷ କରି ଦଳକୁ ଏକ ବଡ଼ ବିଜୟ ଦେଇଥିଲେ।
ସଂକ୍ଷିପ୍ତ ସ୍କୋର:
LSG: ୧୪୬/୧୦ (୨୦ ଓଭର)
RCB: ୧୪୭/୫ (୧୫.୧ ଓଭର)
ଫଳାଫଳ: RCB ୫ ଉଇକେଟରେ ବିଜୟୀ।
