ଭୁବନେଶ୍ୱର,୧୫।୪(ସୁନିତ୍ ମିଶ୍ର):୨୦୨୭ରେ ରାଜ୍ୟରେ ପଞ୍ଚାୟତ ନିର୍ବାଚନ ହେବ। ଏଥିଲାଗି ପ୍ରସ୍ତୁତି ଏକ ପ୍ରକାର ଆରମ୍ଭ ହୋଇସାରିଛି। ଆସନ ସଂରକ୍ଷଣ ଆସନ୍ତା ୩୦ ତାରିଖ ସୁଦ୍ଧା ଶେଷ କରିବାକୁ ପଞ୍ଚାୟତିରାଜ ବିଭାଗ ପକ୍ଷରୁ ସବୁ ଜିଲାପାଳଙ୍କୁ ନିକଟରେ ଚିଠି କରାଯାଇଛି। ଏହି ଖବର ପ୍ରକାଶିତ ହେବା ପରେ ରାଜ୍ୟରେ ଯଥା ସମୟରେ ପଞ୍ଚାୟତ ନିର୍ବାଚନ ହେବ ନା ନାହିଁ ତାକୁ ନେଇ ଚର୍ଚ୍ଚା ଚାଲିଛି। ଏହା ଭିତରେ ମେଣ୍ଟ କଥାକୁ ନେଇ ଆଲୋଚନା ଜୋର୍ ଧରିବାରେ ଲାଗିଛି। ଆଗକୁ ହେବାକୁ ଥିବା ପଞ୍ଚାୟତ ନିର୍ବାଚନରେ ବିଜେଡି ଏବଂ କଂଗ୍ରେସ ଭିତରେ ମେଣ୍ଟ ବୁଝାମଣା ହେବ ନା ଅଲଗା ରାସ୍ତାରେ ଯିବେ ତାହା ବର୍ତ୍ତମାନ ଆଲୋଚନାର ବିଷୟବସ୍ତୁ ପାଲଟିଛି। ଏଭଳି ସ୍ଥିତିରେ ଭାଜପା ରାଜ୍ୟ ସଭାପତି ମନମୋହନ ସାମଲ କହିଛନ୍ତି , ରାଜ୍ୟରେ ସଶକ୍ତ ବିରୋଧୀ ଦଳ ରହିବା ଦରକାର। ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ଭକ୍ତ ଚରଣ ଦାସ କହିଛନ୍ତି, ବିଜେଡି ଏବଂ କଂଗ୍ରେସ ଭିତରେ ପଞ୍ଚାୟତ ଭୋଟ ସମୟରେ ମେଣ୍ଟ ହେବ କି ନାହିଁ ସେକଥା ଦଳର ବଡ଼ ନେତାମାନେ ସ୍ପଷ୍ଟୀକରଣ କରିବେ। ସେକଥା ସେ ଏବେଠାରୁ କହିପାରିବେ ନାହିଁ। ଦିନକ ପୂର୍ବରୁ ମଧ୍ୟ ଭକ୍ତ ଦଳର ହାଇକମାଣ୍ଡ ନିଷ୍ପତ୍ତି ନେବେ ବୋଲି କହିଛନ୍ତି।
ବିଜେଡିର ବରିଷ୍ଠ ନେତା ଦେବୀପ୍ରସାଦ ମିଶ୍ର କହିଛନ୍ତି, ମେଣ୍ଟ ବାବଦରେ କେବଳ ଚର୍ଚ୍ଚା ହେଉଛି। ରାଜନୀତିରେ ସବୁବେଳେ ଚର୍ଚ୍ଚା ହୋଇଥାଏ। କିନ୍ତୁ ଏପର୍ଯ୍ୟନ୍ତ କୌଣସି ନିଷ୍ପତ୍ତି ହୋଇନାହିଁ। ବର୍ତ୍ତମାନ ସ୍ଥିତିରେ ନଈ ନ ଦେଖୁଣୁ ଲଙ୍ଗଳା ହେବାର ଆବଶ୍ୟକତା ନାହିଁ ବୋଲି ସେ କହିଛନ୍ତି। ମନମୋହନ ସାମଲ ଏହି ପ୍ରସଙ୍ଗରେ ନିଜର ପ୍ରତିକ୍ରିୟା ରଖି କହିଛନ୍ତି, ସବୁ ବିରୋଧୀ ଦଳ ଏକାଠି ହୋଇ ଦଳ ଗଢ଼ନ୍ତୁ। ବିଜେଡି-କଂଗ୍ରେସ ମଧ୍ୟରେ ମେଣ୍ଟକୁ ନେଇ କିଛି କହିବା ଠିକ୍ ନୁହେଁ। ଗଣତନ୍ତ୍ର ପାଇଁ ଏକ ଶକ୍ତିଶାଳୀ ବିରୋଧୀ ଦଳ ସବୁବେଳେ ଶୁଭଙ୍କର। ସବୁ ବିରୋଧୀ ଏକାଠି ହୋଇ ରାଜ୍ୟର ବିକାଶ ଦିଗରେ କାର୍ଯ୍ୟ କରନ୍ତୁ। ବିରୋଧ ପାଇଁ ବିରୋଧ ନ କରି ଗଠନମୂଳକ ପ୍ରସ୍ତାବ ଦିଅନ୍ତୁ ବୋଲି ମନମୋହନ କହିଛନ୍ତି। ସୂଚନାଯୋଗ୍ୟ, ଗତ ରାଜ୍ୟ ସଭା ନିର୍ବାଚନ ସମୟରେ ବିଜେଡି ଏବଂ କଂଗ୍ରେସ ମିଳିତ ଭାବେ ପ୍ରାର୍ଥୀ ଦେଇଥିଲେ। ଏହାପରେ ବିଧାନସଭାର ବଜେଟ ଅଧିବେଶନ ସମୟରେ ଉଭୟେ ଏକାଠି ହୋଇ ଶାସକ ଦଳ ବିରୋଧରେ ବିଭିନ୍ନ ପ୍ରସଙ୍ଗରେ ବିରୋଧ ଜାରି ରଖିଥିଲେ। ଉଭୟ ବିଜେଡି ଏବଂ କଂଗ୍ରେସର ନେତାମାନଙ୍କ ମତକୁ ଦେଖିଲେ ମେଣ୍ଟ କଥାକୁ ଉଭୟ ଦଳର ନେତା ସମ୍ପୂର୍ଣ୍ଣ ଖଣ୍ଡନ କରିପାରିନାହାନ୍ତି।
Dharitri – Odisha’s No.1 Odia Daily
