ଅଗରତାଲା,୫।୨: ତୃଣମୂଳ କଂଗ୍ରେସ (ଟିଏମସି) ରବିବାର ତ୍ରିପୁରା ବିଧାନସଭା ନିର୍ବାଚନ ପାଇଁ ଘୋଷଣାପତ୍ର ଜାରି କରିଛି। ଦୁଇ ଲକ୍ଷ ଚାକିରି ଏବଂ ବେରୋଜଗାର ଯୁବକମାନଙ୍କ ପାଇଁ ମାସିକ ୧୦୦୦ ଟଙ୍କା ଭତ୍ତା ପ୍ରତିଶୃତି ଦେଇଛି ଟିଏମସି। ଏହା ସହିତ ପଶ୍ଚିମବଙ୍ଗ ରାଜ୍ୟ ଭଳି ତ୍ରିପୁରାରେ ସାମାଜିକ କଲ୍ୟାଣ ଯୋଜନା ଆରମ୍ଭ କରିବାକୁ ମଧ୍ୟ ଘୋଷଣାପତ୍ରରେ କୁହାଯାଇଛି।
ଅଗରତାଲାଠାରେ ଘୋଷଣାପତ୍ର ପ୍ରକାଶ କରି ପଶ୍ଚିମବଙ୍ଗର ଶିକ୍ଷା ମନ୍ତ୍ରୀ ବ୍ରତ୍ୟ ବସୁ କହିଛନ୍ତି, ଯଦି ଟିଏମସି ରାଜ୍ୟରେ କ୍ଷମତାକୁ ଆସେ ତେବେ ପ୍ରଥମ ବର୍ଷରେ ୫୦,୦୦୦ ନୂତନ ନିଯୁକ୍ତି ଦେବ। ସରକାରୀ ବିଭାଗରେ ଥିବା ସମସ୍ତ ଖାଲି ପଦବୀକୁ ପ୍ରାଥମିକତା ଭିତ୍ତିରେ ପୂରଣ କରାଯିବ। ବେରୋଜଗାର ଯୁବକମାନଙ୍କୁ ଟିଏମସି ମାସକୁ ୧୦୦୦ ଟଙ୍କା ଭତ୍ତା ଦେବ।
ଟିଏମସି ମୁଖ୍ୟ ତଥା ବେଙ୍ଗଲ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତ୍ରିପୁରା ଗସ୍ତର ଗୋଟିଏ ଦିନ ପୂର୍ବରୁ ଦଳ ଏହି ଘୋଷଣାପତ୍ର ପ୍ରକାଶ କରିଛି। ଟିଏମସି ତ୍ରିପୁରାର ୨୮ଟି ବିଧାନସଭା ଆସନରେ ପ୍ରାର୍ଥୀ ଦେଇଛି। ଫେବୃଆରୀ ୧୬ରେ ତ୍ରିପୁରାର ୬୦ଟି ଆସନରେ ନିର୍ବାଚନ ଅନୁଷ୍ଠିତ ହେବ।
