ଓ୍ବାଶିଂଟନ୍,୧୨।୧: ଗତବର୍ଷର ସୁପରହିଟ୍ ପାନ୍ ଇଣ୍ଡିଆ ଫିଲ୍ମ ‘ଆର୍ଆର୍ଆର୍’ର ଗୀତ ‘ନାଟୁ ନାଟୁ’କୁ ‘ଗୋଲ୍ଡେନ୍ ଗ୍ଲୋବ୍’ ଆଓ୍ବାର୍ଡ ପ୍ରଦାନ କରାଯାଇଛି। ବେଷ୍ଟ୍ ଅରିଜିନାଲ୍ ସଙ୍ଗ୍ କାଟାଗୋରି ପାଇଁ ଏହି ପୁରସ୍କାର ଦିଆଯାଇଥିବାବେଳେ ଏହା ହେଉଛି ଭାରତୀୟ ମନୋରଞ୍ଜନ ଜଗତ ପାଇଁ ପ୍ରଥମ ଗୋଲ୍ଡେନ୍ ଗ୍ଲୋବ୍ ଆଓ୍ବାର୍ଡ। ବେଷ୍ଟ୍ ନନ୍-ଇଂଲିଶ ଲାଙ୍ଗୁଏଜ୍ ଫିଲ୍ମ ବର୍ଗର ଦୌଡ଼ରେ ଜର୍ମାନୀର ‘ଓ୍ବେଷ୍ଟର୍ନ ଫ୍ରଣ୍ଟ୍’ ବେଲଜିୟମ୍ର ‘କ୍ଲୋଜ୍’ ଏବଂ ଦକ୍ଷିଣ କୋରିଆର ‘ଡିସିସନ୍ ଟୁ ଲିଭ୍’କୁ ଫିଲ୍ମ ଆର୍ଆର୍ଆର୍ ପଛରେ ପକାଇଦେଇଛି।
ନାଟୁନାଟୁ ଗୀତର କମ୍ପୋଜର ଏମ୍ଏମ୍ କୀରଭାନି ମଞ୍ଚକୁ ଯାଇ ପୁରସ୍କାର ଗ୍ରହଣ କରିଥିଲେ। ଏହି ଅବସରରେ କୀରଭାନି ଭାବବିହ୍ବଳ ହୋଇ ପଡ଼ିଥିବା ଦେଖିବାକୁ ମିଳିଥିଲା। ନିର୍ଦ୍ଦେଶକ ଏସ୍ଏସ୍ ରାଜାମୌଲିଙ୍କ ସହ ସେ ବହୁ ଫିଲ୍ମରେ କାମ କରିଥିବାବେଳେ ଏହି ସଫଳତା ପାଇଁ ଟିମ୍ର ପ୍ରତ୍ୟେକ ସଦସ୍ୟଙ୍କ ଯୋଗଦାନ ରହିଥିବା ସେ କହିଛନ୍ତି। ଏଥିସହ ଗୋଲ୍ଡେନ୍ ଗ୍ଲୋବ୍ ଆଓ୍ବାର୍ଡ ନେଇ ସେ ଖୁସି ବ୍ୟକ୍ତ କରିଛନ୍ତି। ଚଳଚ୍ଚିତ୍ର ଜଗତରେ କାମ କରିବା ପର୍ଯ୍ୟନ୍ତ ସେ ନୂଆ ନୂଆ ଜିନିଷ ଶିଖିବାକୁ ଚେଷ୍ଟା କରିବେ ବୋଲି କୀରଭାନି କହିଛନ୍ତି। ଚଳିତବର୍ଷର ୮୦ତମ ଗ୍ଲୋବାଲ ଗୋଲ୍ଡ ଆଓ୍ବାର୍ଡ ସମାରୋହ ଲସ୍ଏଞ୍ଜେଲ୍ସରେ ଅନୁଷ୍ଠିତ ହୋଇଥିଲା। ହାସ୍ୟ ଅଭିନେତା ଜେରୋଦ କାର୍ମିଚିଲ କାର୍ଯ୍ୟକ୍ରମର ହୋଷ୍ଟ ସାଜିଥିଲେ। ନାଟୁନାଟୁର ସଫଳତାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଓ କଳାକାର ଟିମ୍କୁ ଶୁଭେଚ୍ଛା ଜଣାଇଛନ୍ତି।
୧୯୨୦ ମସିହା ବ୍ରିଟିଶ ଶାସନାଧୀନ ଭାରତ ଉପରେ ଏହି ଫିଲ୍ମର କାହାଣୀ ଆଧାରିତ। ଦକ୍ଷିଣ ଭାରତୀୟ ଚଳଚ୍ଚିତ୍ର ଜଗତର ଲୋକପ୍ରିୟ ଅଭିନେତା ଜୁନିୟର୍ ଏନ୍ଟିଆର୍ ଏବଂ ରାମଚରଣ ଫିଲ୍ମରେ ମୁଖ୍ୟ ଭୂମିକାରେ ଅଭିନୟ କରିଥିବାବେଳେ ଅଜୟ ଦେବଗନ, ଆଲିଆ ଭଟ୍ଟ ଓ ବ୍ରିଟିଶ ଅଭିନେତା ରେ ଷ୍ଟେଭେନ୍ସନ୍, ଆଲିସନ୍ ଡୁଡି ଏବଂ ଓଲିଭିଆ ମୋରିସ୍ ମଧ୍ୟ ଅଭିନୟର ଯାଦୁକରୀରେ ଦର୍ଶକଙ୍କ ମନ ମୋହିଛନ୍ତି॥ ଫିଲ୍ମଟି ବିଶ୍ୱବ୍ୟାପୀ ୧୨୦୦ କୋଟି ଟଙ୍କାର ବ୍ୟବସାୟ କରିଛି। ଗ୍ଲୋବାଲ ଗୋଲ୍ଡ ଆଓ୍ବାର୍ଡରେ ସମ୍ମାନିତ ହେବା ପୂର୍ବରୁ ନିର୍ଦ୍ଦେଶକ ରାଜାମୌଲିଙ୍କୁ ନ୍ୟୁୟର୍କ ଫିଲ୍ମ କ୍ରିଟିକ୍ ସର୍କଲ୍ ଆଓ୍ବାର୍ଡରେ ସମ୍ମାନିତ କରାଯାଇଛି। ଅନ୍ୟପକ୍ଷେ ଓସ୍କାର ଆଓ୍ବାର୍ଡ ପାଇଁ ଫିଲ୍ମକୁ ବିଭିନ୍ନ କାଟାଗୋରିରେ ଚୟନ କରାଯାଇଛି।
