ଅହମଦାବାଦ,୨୮।୧୧ : ଡିସେମ୍ବର ୧ ଏବଂ ୫ ରେ ଗୁଜୁରାଟରେ ବିଧାନସଭା ନିର୍ବାଚନ ପାଇଁ ମତଦାନ ଅନୁଷ୍ଠିତ ହେବାକୁ ଯାଉଛି। ଏଭଳି ପରିସ୍ଥିତିରେ ସମସ୍ତ ରାଜନୈତିକ ଦଳ ଭୋଟରଙ୍କୁ ଆକର୍ଷିତ କରିବା ଲାଗି ବିଭିନ୍ନ ପ୍ରତିଶ୍ରୁତି ଦେବାରେ ଲାଗିଛନ୍ତି। କିନ୍ତୁ ଗୁଜରାଟର ଉପକୂଳବର୍ତ୍ତୀ ଅଞ୍ଚଳରେ ରହୁଥିବା ଧୀବରମାନଙ୍କ ପାଇଁ ଏହି ନିର୍ବାଚନ ପ୍ରତିଶ୍ରୁତି ଆଲୋଡ଼ା ହୋଇପଡ଼ିଛି।
ସେମାନେ କହିଛନ୍ତି ଯେ ଆମେ କୌଣସି ଭତ୍ତା କିମ୍ବା ପ୍ରତିଶ୍ରୁତି ପାଇଁ ଆଗ୍ରହୀ ନୁହଁ। ଆମର ଭୋଟ ସେହି ପାର୍ଟିକୁ ଯିବ ଯେଉଁଦଳ ପାକିସ୍ତାନର ଜେଲରେ ବନ୍ଦୀ ଥିବା ଆମ ପୁଅମାନଙ୍କୁ ଫେରାଇ ଆଣିବ। ବାସ୍ତବରେ, ଶହ ଶହ ଭାରତୀୟ ଧୀବର ଗତ କିଛି ବର୍ଷ ଧରି ପାକିସ୍ତାନୀ ଜେଲରେ ଅଛନ୍ତି। ଭାରତୀୟ ସାମୁଦ୍ରିକ ସୀମା ବାହାରେ ମାଛ ଧରୁଥିବା ସମୟରେ ସେମାନଙ୍କୁ ପାକିସ୍ତାନ ତଟରକ୍ଷୀ ବାହିନୀ ଗିରଫ କରିଥିଲେ। ସେମାନଙ୍କ ପରିବାର ଆଶା କରୁଛନ୍ତି ଯେ ନୂଆ ସରକାର ସେମାନଙ୍କୁ ଫେରାଇ ଆଣିବେ।
ଗୁଜରାଟର ଉପକୂଳବର୍ତ୍ତୀ ଅଞ୍ଚଳର ପ୍ରାୟ ୬୫୫ ମତ୍ସ୍ୟଜୀବୀ ପରିବାରର ସଦସ୍ୟ ପାକିସ୍ତାନର ଜେଲରେ ରହିଛନ୍ତି। ସେମାନଙ୍କ ପରିବାର କହିଛନ୍ତି ଯେ ଆସନ୍ତା ନିର୍ବାଚନରେ ସେମାନେ ସେହି ଦଳକୁ ଭୋଟ ଦେବେ, ଯିଏ ସେମାନଙ୍କ ସମ୍ପର୍କୀୟଙ୍କୁ ଫେରାଇ ଆଣିବାକୁ ନିଶ୍ଚିତ କରିବ।
ଏହି ମତ୍ସ୍ୟଜୀବୀଙ୍କ ପରିବାର କହିଛନ୍ତି ଯେ ସେମାନେ ସରକାରଙ୍କ ଠାରୁ ଦୈନିକ ୩୦୦ ଟଙ୍କା ଭତ୍ତା ପାଇଥାନ୍ତି। ତେବେ ପରିବାର ଚଳାଇବା ପାଇଁ ଏହା ପର୍ଯ୍ୟାପ୍ତ ନୁହେଁ । ଅଲ ଇଣ୍ଡିଆ ମତ୍ସ୍ୟଜୀବୀ ସଂଘର ଜାତୀୟ ସଭାପତି ଭେଲଜୀଭାଇ ମସାନି କହିଛନ୍ତି ଯେ ଗୁଜରାଟ ସରକାରଙ୍କ ନିୟମ ଅନୁଯାୟୀ ସରକାର କେବଳ ସେହି ପରିବାରକୁ ଦିନକୁ ୩୦୦ ଟଙ୍କା ଭତ୍ତା ପ୍ରଦାନ କରୁଛନ୍ତି ଯେଉଁମାନଙ୍କୁ ପାକିସ୍ତାନୀ ଜେଲରେ ପ୍ରଥମ ଥର ପାଇଁ ବନ୍ଦୀ ରହିଛନ୍ତି।
ଯଦି ସମାନ ବ୍ୟକ୍ତିଙ୍କୁ ଦ୍ୱିତୀୟ ଥର ଧରାଯାଏ, ତେବେ ସରକାର କୌଣସି ଭତ୍ତା ଦିଅନ୍ତି ନାହିଁ। ଯଦି ଜଣେ ଧୀବର ପ୍ରଥମ ଥର ପାଇଁ ପାକିସ୍ତାନୀ ଜଳକୁ ପ୍ରବେଶ କରନ୍ତି, ଏହା ଏକ ଅଜଣା ଭୁଲ ଭାବରେ ବିବେଚନା କରାଯାଏ। କିନ୍ତୁ ଯଦି ସେ ଦ୍ୱିତୀୟ ଥର ପାଇଁ ଗିରଫ ହୁଅନ୍ତି ତେବେ ତାହାକୁ ଉଦ୍ଦେଶ୍ୟମୂଳକ ବୋଲି କୁହାଯାଇଥାଏ।
