ଦାରିଙ୍ଗବାଡି,୨୩।୪(ଅରୁଣ ସାହୁ): ଓଡ଼ିଶାର କାଶ୍ମୀର କୁହାଯାଉଥିବା ଦାରିଙ୍ଗବାଡିକୁ ଅଳିଆ ମୁକ୍ତ କରିବାକୁ ପ୍ରଶାସନ ପକ୍ଷରୁ ପଦକ୍ଷେପ ନିଆଯାଇଛି। ଏନେଇ କ୍ଲିନ ଦାରିଙ୍ଗବାଡି ଗ୍ରୀନ୍ ଦାରିଙ୍ଗବାଡି ଅଭିଯାନ ଆରମ୍ଭ ହେବାକୁ ଯାଉଛି। ଏହାକୁ ବ୍ୟାପକ କରାଯିବା ନେଇ ଗୁରୁବାର ବିଡ଼ିଓ ପ୍ରୀତିରଞ୍ଜନ ରଥଙ୍କ ଅଧ୍ୟକ୍ଷତାରେ ଏକ ବୈଠକ ବ୍ଲକ ସଭାଗୃହରେ ଅନୁଷ୍ଠିତ ହୋଇଯାଇଛି। ବୈଠକରେ ଅନ୍ୟ ଅଧିକାରୀଙ୍କ ମଧ୍ୟରେ ତହସିଲଦାର ଧୀରଜ ପାତ୍ର, ସବ୍ ଇନ୍ସପେକ୍ଟର ଲଷ୍ମୀ ମାଝୀ ପ୍ରମୁଖ ମଞ୍ଚାସୀନ ରହି ଦାରିଙ୍ଗବାଡିର ପରିବେଶକୁ ସ୍ବଚ୍ଛତା ରଖିବା ପାଇଁ ଉପସ୍ଥିତ ଅଞ୍ଚଳବାସୀଙ୍କୁ ସଚେତନ କରିଥିଲେ।
ସେହିପରି ଦାରିଙ୍ଗବାଡିକୁ ସ୍ବଚ୍ଛତା ରଖିବା ପାଇଁ ହେଲେ ପ୍ରତି ସପ୍ତାହରେ ଜନସଚେତନ କରାଯିବା ସହ ସଫେଇ କରିବାକୁ ବୈଠକରେ ନିଷ୍ପତି ଗ୍ରହଣ କରାଯାଇଛି। ପ୍ରତେକ ଗୁରୁବାର ଏହି ସଫେଇ କାର୍ଯ୍ୟକ୍ରମ କରାଯିବା ବାଧ୍ୟତାମୂଳକ ବୋଲି କୁହାଯାଇଛି।
ଆସନ୍ତା ୩ ରୁ ୪ ମାସ ମଧ୍ୟରେ ଦାରିଙ୍ଗବାଡି ସମ୍ପୂର୍ଣ୍ଣ ଅଳିଆ ମୁକ୍ତ କରାଯିବ ବୋଲି ବିଡ଼ିଓ ରଥ ବୈଠକରେ ଜଣାଇଥିଲେ। ଦାରିଙ୍ଗବାଡି ସହର ସମେତ ପର୍ଯ୍ୟଟନକ୍ଷେତ୍ରଗୁଡିକୁ ମଧ୍ୟ ସ୍ବଚ୍ଛତା ରଖାଯିବାକୁ ଆବଶ୍ୟକ ପଦକ୍ଷେପ ନେବାକୁ କୁହାଯାଇଥିଲା।
ଯେ କୌଣସି ଦୋକାନୀ ତାଙ୍କ ଦୋକାନ ସମ୍ମୁଖରେ ପ୍ଲାଷ୍ଟିକ, ଅଳିଆ ଆବର୍ଜନା କରିବେ ସେମାନଙ୍କୁ ଜରିମାନା ଆଦାୟ କରାଯିବ ବୋଲି ବିଡ଼ିଓ ଚେତାବନୀ ଦେଇଛନ୍ତି। ଲୋକେ ନ ଶୁଣିଲେ ପ୍ରଶାସନ କଠୋର ହେବ ବୋଲି ବିଡ଼ିଓ ଶୁଣାଇ ଦେଇଛନ୍ତି। ଏପରିକି ଦାରିଙ୍ଗବାଡିକୁ ପ୍ଲାଷ୍ଟିକ ମୁକ୍ତ କରିବାକୁ ଗୁରୁତ୍ୱ ଦିଆଯାଇଛି। ବୈଠକରେ ବଣିକ ସଙ୍ଘ, ହୋଟେଲ ସଙ୍ଘ, ସ୍ବେଚ୍ଛାସେବୀ ଅନୁଷ୍ଠାନଙ୍କ ସମେତ ଲୋକପ୍ରତିନିଧି ଉପସ୍ଥିତ ରହିଥିଲେ।
